भांगरभूंय | प्रतिनिधी
देसाक ७५ वर्सां उपरांत नवें संसद भवन मेळ्ळें. सुदारप करून गोंयचें मंत्रालय नवे दिकेन व्हरतना नव्या शिक्षण धोरणाचो आरंभ करपाक सरकार पावलां मारता. तंत्रज्ञान, वातावरणाचो अभ्यास करून 20 वर्सां उपरांत मंत्रालयांत बदल केल्ल्यान प्रशासनय नेटान वावराक लागतलें, समेस्तांचीं आडमेळीं पयस जातलीं, अशी आस्त बाळगूया.
मंत्रालयाच्या उक्तावणाक आमदार दिगंबर कामत, जलस्रोतमंत्री सुभाष शिरोडकार हांची हजेरी म्हत्त्वाची. मुख्यमंत्र्यांक श्री. कामत हांचे वरी अणभवी मार्गदर्शक मेळ्ळ्यात, तांच्या आधारान प्रादेशिक आराखडो 2035 फुडल्या स म्हयन्यां भितर तयार करपाची मोख सरकारान दवरची. वैज्ञानिक डाॅ. रघुनाथ माशेलकार हांचे फुडारपणा खालचे समितीन केल्लो गोंयच्या मुखेल क्षेत्रांच्या फुडाराचो 2035 आराखडो सरकारान मतींत दवरचो. नवे शिक्षण सचीव ह्या आराखड्यांत व्हड वांटेकार आशिल्ले, तो श्री. कामत हांच्या सरकारान करून घेतलो, आदले मुख्यमंत्री मनोहर पर्रीकार हांणींय आपणायलो. डाॅ. सावंत सरकारान नव्या आराखड्यां आदीं श्री. माशेलकार हांच्या आराखड्या प्रमाण फुडें गेल्यार येणावळीचे मार्ग दिसतलेच, त्या भायर हेर प्रस्नय सुटावे जावं येतात.
गोंयची भूंय, सैम, उदक, दोंगर आनी दोंगुल्ल्यो सांबाळपाचो सोपूत घेवनच अंदुंचो पर्यावरण दीस मनयतना मंत्र्यांच्या खात्यांचो नियाळ करचो. एकादऱ्या मंत्र्याक खातें आवडूंक ना, खात्याचें वजें पेलवना जाल्यार समेस्तांचीं कामांय आडावन उरतात. पोरूं सरकाराच्या वावराचेर टीका जावनय सरकारान नवें कितें तरी करून दाखयलां, सरकार सामकें उणे पडूंक ना, हेंय सत.
जी 20 परिशदांच्या बसकांच्या आयोजना वांगडा सरकारान राष्ट्रीय खेळां सर्तीच्यो साधन-सुविधा उबारपा पासत वावर सुरू केला. केंद्रांत भाजपा सरकार आशिल्ल्यान डाॅ. सावंत केंद्रीय निधी मेळोवपाक जैतवंत जाल्यात. सरकारान वीस वर्सां आदीं केल्ल्या येवजणींत बदल करचो, साधन- सुविधांचे निर्मणे बराबर भूंय, उदक, दोंगर आनी दोंगुल्ल्यांच्या सांबाळा कडेन खास लक्ष दिवपाची गरज आसा. तरुच गोंयचो पर्यटन वेवसाय तिगतलो, राज्य स्वयंसिद्ध जातलें. पर्यटनाची नवी दिकाय माशेलकार आराखड्यांत दाखोवन दिल्या, गोंयची मुळावी संस्कृताय, दायज भोंवडेकारां मुखार दवरतनाय जतनाय घेवपाक जाय. गोंयांत सर्वधर्म संस्कृतायेंतल्यान एकचार तिगून आसा, शिक्षणांतल्यान एकचाराचें बीं शिंपडूंक नवें शिक्षण धोरण सगल्यांनी आपणावचें पडटलें. कुशळताय शिक्षणांतल्यान नवें मनीसबळ घडटा, सरकारी नोकऱ्यां खातीरच न्हय जाल्यार खासगी कंपन्यांक (गोंयांत आनी गोंयां भायर) तें उपेगी पडटलें.
कृषी म्हाविद्यालय, मोपा विमानतळाचीं व्हड सपनां पुराय करतना प्रशिक्षीत शिक्षक, प्रशासन घडोवपाक यंत्रणेची बांदावळ जाल्या. ज्येष्ठांक, जाण्टेल्यांक तांच्या सपनांतले गोंय कशें मेळटलें? गोंयकारांचे आतांचे, फुडले पिळगेक येवकार दिवपी गोंय घडोवपाच्या वावराक सरकार लागल्यार ज्येष्ठांनी, कालच्यांनी आपली मानसिकता बदलप समा जातलें.
सैम म्हळ्ळ्यार गोंय हीं मनोहर पर्रीकार हांचीं उतरां तशेंच सैममोगी प्रतापसिंह राणे हांचो आदर्श दोळ्यां मुखार दवरूनच सरकारान प्रादेशिक आराखडो वर्सा भितर घट्ट बांदचो पडटलो. आराखडो नेमावळी प्रमाण चालीक लावपाक मनीसबळाचे बांदावळीचें नियोजन जाय. नियोजन, वेवस्थापन शास्त्राचे शिक्षण आर्टस, काॅर्मस, वेवसायिक, विज्ञान शिक्षणातच न्हय जाल्यार इंजिनियरिंग आनी वैजकी शिक्षणातय म्हायती तंत्रज्ञानाबरोबर मेळपाक जाय. पर्यावरण दिसा निमतान एक सप्तक नितळसाणी खातीर प्रशासकीय पावंड्यार दिल्यार? अधिकारी, कर्मचाऱ्यां खातीर पर्यावरण सांबाळपाक विचार मांडपाची सर्त दवल्ल्यार?
मांडवी न्हंयेक राखण दितना पणजे एक वाॅक वे बांदला. वाॅक वे चेर बसपाचीच न्हय न्हिदपाची सुविधा बांदिल्ल्यान मिरामार दर्यादेगे परस समेस्त चोम्यांनी येतात. वाॅक वे चेर खावचें, पिवचें न्हय अशी सुचवणी तकट्यार केल्या. तकटो वाचपी, केल्ल्यो सुचोवण्यो शिस्तीन पाळपी कमी, पुलीस सगलो वेळ नासतात. नवो वाॅक वे मिरामार दर्यादेग ते पणजे बाजारा मेरेन वचपाक वापरपाक येता, न्हंयेची नवी देगय तयार जाता, उदकांत देवप, सेल्फी घेवप पर्यटकांक म्हारग पडचें ना हे खातीर सरकारान जतनाय घेवची. कला अकादमीचे फाटले सुवातेंत चाफ्याचीं झाडां सोबा हाडटात. व्हडा प्रमाणात चिंच, मशिंग, आंबे, पेरीची रोपां लायल्यार? कला अकादमीचो वाठार थंडसाण दिवपी आसाच, आनीक झाडां लावन तीं वाडयल्यार सैमाच्या सांगातात वाजप, गावप, नाचप, कार्यावळीय रंगयाळ्यो जातल्यो. कला अकादमीतल्यान गोंय संगीत म्हाविद्यालयाचो जल्म जाल्लो. खेळां गुण शिक्षणात आसपाविल्ल्यान 10 वी, 12 वी विद्यार्थ्यांची टक्केवारी वाडली. भुरग्यां भितल्ले कला गुण सोदून तांकां कलेच्या शिक्षणा कडेन धाडल्यार, गायन, वादन, नाट्य, नाच शिक्षणाचो विस्तार केल्यार गोंय परतून एकदां कलेची खण जावपाक कळाव लागचोना. कला शिक्षकांचे भरतेचो वाद सोंपलो? कला अकादमीचें उक्तावण केन्ना जातलें? कला अकादमीक संगीत वा वाद्य शास्त्रांतले गुणवंत अध्यक्ष मेळ्ळ्यार? राजकारणा पसून कला, खेळा मळां पयस दवल्ल्यार गोंयांत राष्ट्रीय खेळां सर्तीचे उपरांत देस पावंड्यावेल्यो संगीत सर्ती कित्याक जावच्यो न्हय? खेळांचे स्कूल, विद्यालय, म्हाविद्यालय सुरू करपाचे येत्न सरकारान करचे. उच्च शिक्षणात गोंय खूब मळांनी फाटीं आसा, भूंय, उदक, दोंगर ते पासत सांबाळपाक जाय आनी भुंयेच्या उपेगाचो नकाशो करतना मेकळे जागे नकाशांत दाखोवन ते राखचे. विरोधी वांगड्यांक घटना समजावन सांगूनय ते शाणे जावचे ना, पूण सरकारान थांबप कित्याक? सरकारान फुडें वचचेंच, सैम सांबाळून खणकामय मार्गाक लावपाक जाय.
राखणे मंत्रालयान घालून दिल्ली नेमावळ पाळूंक नाशिल्ल्यान मुरगाव तालुक्याची संतुळा इबाडल्यात, तें उत्तर गोंयांत जावचें न्हय. प्रशासनस्तंभ बांदपाक पणजेंतल्यो शंभर वर्सां आदल्यो बिल्डिंगो, घरां मातयेभरवण करपाचो विचार जावचो, पाट्यार आनी लागसल्ल्या वाठारांत बांदकामाचेर शीम म्हेर दवरची. तो वाठार मिठागरांचो, खाजनांचो, शेतां आनी तळीं, झऱ्यांचो हाची याद सरकाराक करून दिवपी आसतलेच. म्हादयचो प्रवाह जंय मांडवी अरबी समुद्राक मेळटा थंय पावला, कांपाल मिरामारा वरी शिरदोण, दोनापावल, कांदोळे, कळंगुटेचे दर्यादेग वाठारांक राखण दिवपा पासत येवजण जावची. दर्यांत, न्हंयांनी कोयर जावचो ना, नितळसाण उरची, शिस्त मोडटल्यांक ख्यास्त दिवपाक, रानां राखपाक ‘एआय’चो आधार घेवचो
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
