‘पीपीपी’ फायद्याचें थारूं

भांगरभूंय | प्रतिनिधी

संगणकाचे खूब फायदे आसात. तातूंतलो म्हत्वाचो म्हणल्यार, डाटा सांबाळून दवरूंक मेळटा. ताचो फायदो फुडाराक जाता. खास करून स्वराज्य संस्था, सरकारी खात्यांक आनी साबार वेवसायिकांक ताच्या आदारान फुडल्यो येवजण्यो आंखपाक मेळटात. गांवाची उदरगत जाल्या काय ना, ताचो अदमास येता. कांय राजकी फुडारी गांवांचो, गांवकारांचो डाटा दवरतात. कितले जाण्टे आसात, कोण गरीब आसात, कितले तरणाटे, बेकार कितलें, गांवांत कोण कसल्या येवजण्यांचो लाव घेता, ही सगली म्हायती दवरप संगणकाक लागून शक्य जाल्या. हरियाणा आनी गुजरातांत राज्यांतल्या दरेका कुटुंबाचो डाटा दवरला. प्रत्येक कुटुंबाक पीपीपी कार्ड दिलां. म्हणल्यार परिवार पहचान पत्र. गुजरातांत ताका ‘सीएम डॅशबोर्ड’ अशें नांव दिलां. ताचे वरवीं सरकारी येवजण्यांचो कोणी लाव घेतला, घेवंक ना, कोणाक ताची गरज आसा, हाची म्हायती सांठोवन दवरल्या. विशेश म्हणल्यार हो डाटा विस्वास दवरपा सारको अचूक आसा. परिवाराची परवानगी घेवन तो डिजीटल पद्दतीन तयार केला. ह्या पुराय डाटा पद्दतीचो अभ्यास करून ती गोंयांत चालीक लावपाचो विचार गोंय सरकारान केला, ही खोशेची गजाल. फक्त कुटुंबांच न्हय, तर फुडाराक प्रत्येक खात्यान तसो डाटा तयार करून दवरपाक जाय. देखीक, कोरोनाक लागून खंयच्या गांवांत कितले मेले, तांच्या कुटुंबाक मजत मेळ्ळ्या काय ना, हाची म्हायती 2- 3 की दाबतच मेळपाक जाय. ‘पीपीपी’ चो डाटा सांठोवन दवरपाक मनीसबळ लागतलें. हांगा आळसाय उपकारची ना. सध्या कांय खात्यांचो डाटा आसा. आरटीआय अर्ज घालतकच तो मेळटा.
सरकारी नोकऱ्यो वा सवलती सगल्यांकूच मेळटात अशें ना. कांय घरांतले 3- 3 मनीस सरकारी नोकरी करतात, तर थोड्या कुटुंबांनी 30- 30 वर्सां सरकारी नोकरेचें तोंड पळयिल्लें ना. हरयाणा सरकारान कुटुंब कार्ड साबार सरकारी कार्यालयांच्या समाजकल्याण येवजण्यांक जोडपाचें काम सुरू केलां. म्हणटकच वेगवेगळ्यो शिश्यवृत्ती, सवलती, अनुदान, निधी हांची म्हायती कुटुंबांक मेळटली. इतलेंच न्हय, तर पात्र लाभार्थ्याचें नांव आपशीच सरकाराक कळटलें खंय. हे येवजणे खातीर एक वर्साच्या राबीतो दाखल्याची अट घाल्या आनी हरयाणाचो कायमचो नागरीक आशिल्ल्यांकूच ह्यो सगल्यो सवलती मेळटल्यो. लग्न करपाचें आसा जाल्यार पसून हें कुटुंब कार्ड सक्तीचें केलां. सरकार दरबारांत थळाव्यांचे म्हत्वाच्या गजालींची नोंद ही जावपाकूच जाय, अशी अट आसा.
गोंयांत प्रत्येक गजाली खातीर विरोध हो जाताच. गुजरात, हरियाणा आनी हांगाची परिस्थिती वेगळी आसा. कुटुंब कार्ड जातकच कोणे कितल्यो सवलती घेतल्यात वा तांकां कितल्यो सरकारी येवजण्यो मेळटात, हें उक्ताडार येतलें, ह्या भंयान तें कार्ड नाकाच म्हणपी खूब लोक आसतले. मात, ह्यो सवलती, अनुदानां मेळोवपाक उत्पन्नाची मर्यादा आशिल्ल्यान ताचो लाव सगल्यांकूच मेळटलो अशें ना. अर्थांत कार्ड हें सगल्यांकूच करचें पडटलें. गोंयांत समाजीक, वैजकी अशीं तरातरांचीं कार्डां आसात. ताचो फायदो कितल्या जाणाक जाता, हाचो अभ्यास जावप गरजेचो. उत्पन्नाचे बोगस दाखले लावन लोकप्रतिनिधींचे वा तांच्या मुखेल वावुरप्यांचे वळखीन येवजण्यो हातासपी बरेच लोक गोंयांत आसात. तेन्ना ह्या कार्डाचो दुरुपेग जावचो ना, हाची जतनाय सरकारी यंत्रणांक घेवची पडटली.
कुटुंबाची अर्थीक स्थिती ह्या कार्डां वरवीं कळटली, म्हणटकच पात्र कुटुंबांकूच सरकारी येवजण्यांचो फायदो मेळटलो. बेकारी पयस करपाक, स्वयंपूर्ण गोंय येवजण आनीक नेटान चालीक लावपाक, खऱ्या शेतकारांची वळख पटोवन तांकां मजत करपाक हें कार्ड फायद्याचें थारूं येता. म्हत्वाचें आनी कठीण काम म्हणल्यार हें कार्ड सदांच अपडेट दवरचें पडटलें. सरकारी येवजण घेतल्या ती वापरल्या काय ना, हाचीय फाटपुरवण गरजेची. देखीक, कोणे कामधेनू येवजणे खाला गायो घेवपाक सरकारी अनुदान घेतलें आनी कांय दिसांनी गायी मेल्यो अशें सांगून तें लाटलें, जाल्यार तें सरकारी यंत्रणांक कळचें. कोणाच्या मरणाचो दाखलो काडलो काय त्या कार्डा वरवीं यंत्रणांक तें कळचें. ताची विधवा नोकरी करता काय करीना, तें कळ्ळें जाल्यार सरकाराक तिका नोकरी दिवपाक मेळटली. हे पीपीपी कार्ड कुटुंबांचो अर्थीक,
शिक्षणीक, समाजीक, वैजकी, संस्कृतीक थर वयर काडपाक आदारभूत थारचें. गुगल सर्चांत एखादें उतर मारलें
काय म्हायतीचो घसघसो कोसळटा, तेच तरेन बटन दाबलो काय कुटुंबाची म्हायती मेळ्ळ्यार ही कार्ड येवजण सार्थकी लागतली.