भांगरभूंय | प्रतिनिधी
शिक्षण पुराय जालें काय सगलेच नोकरे फाटल्यान धांवतात, खास करून सरकारी नोकरी. कारण ती मेळ्ळी काय अर्थीक येणावळीचो हुस्को मेकळो. खाजगी नोकरेंत ही शाश्वती नासता. बेकारेची तरसाद कायम माथ्यार हुमकळत आसता. अर्थांत बरें काम करप्यांक आनी तांचे विशीं संबंदीत मळा वयल्या लोकांक खबर आसल्यार बेकारेची भिरांत नासता. प्रामाणीक, मेहनती, उमेदी उमेदवाराक तसो चड काळ बेकार रावचो पडना. मात, नोकरे परस उद्देग, वेवसाय, घरगुती उद्देगाची आयज आमच्या देशाक खूब गरज आसा. केंद्र सरकारान स्टार्ट अप, मेक इन इंडियाचेर भर दिला तो हेच खातीर. थळाव्या तरणाट्यांक स्वताचो वेवसाय, भायल्या कंपनींक भारतांत उद्देग सुरू करपाक सरकारान येवजण्यो आंखल्यात. गोंय सरकारानूय पयर उद्देगीक गुंतवणूक वाडून रोजगार तयार जावचो म्हूण मुख्यमंत्री कळंतर (व्याज) सवलत येवजणें बदल केला. हातूंत उद्देग सुरू करप्यांक रिणांत सवलत मेळटली. उद्देग- धंद्यांच्या बाबतींत गोंय स्वावलंबी जालें तर तें सगले नदरेन मुखार वतलें. राज्याची अर्थवेवस्था वाडटलीच, वयर बेरोजगारीय उणी जातली. तरणाट्यांनीय हाचेर विचार करुंक फावो. कारण नोकरी करचे परस नोकरी दिवपी जावप सदांच बरें.
मुख्यमंत्री कळंतर येवजणे खाला आतां पेडणें, सत्तरी, सांगें, केपें, काणकोण, दिवचल आनी धारबांदोडें म्हालांतल्या उद्देगांक रिणांच्या व्याजांत 5 टक्के सवलत मेळटली. हे म्हाल उदरगतीचे बाबतींत मागास मानतात. थंय उद्देग सुरू करप्यांक वा सध्या आसा त्या उद्देगांकूय हे येवजणे खाला ईडीसीचें रीण घेवचें पडटलें. गोंयकार भागीदार आशिल्ल्या कंपनींक 2 टक्के सवलत मेळटली. तांच्या उद्देगांनी उणेच 75 टक्के गोंयकार आसचे पडटले. 15 वर्सां गोंयांत रावप्यांक गोंयकार मानतले. ही सवलत 31 मार्च 2028 मेरेन आसा. तेन्ना चडांत चड गोंयकार तरणाट्यांनी मुखार येवपाक जाय.
गोंयचे बरेच पारंपरीक उद्देग बंद पडल्यात. तांकां नवी जीण दिवपाचो यत्न जावप गरजेचें. बऱ्याच घराब्यांचो पारंपरीक वेवसाय आसा. पूण, फुडल्यो पिळग्यो सरकारी नोकऱ्यो करतात. म्हणटकच हे उद्देग, वेवसाय बंद पडल्यात…. आनी ते करपाक जाण्ट्यां कडेन जी जिद्द, आत्मविस्वास, मेहनत घेवपाची तयारी आशिल्ली, ती नवे पिळगे कडेन ना. ‘हार्ड वर्किंग युथ’ हालींसराक सांपडप कठीण जालां. आडवाद आसतले. पूण, आयच्या कामगार, कर्मचाऱ्यांचें चड लक्ष रजा, आंग मारप, काम करचें पडत म्हूण कुशळटाय लिपोवन दवरप, कामां परस हक्क, अधिकारांचेर चड भर दिवप, संप करप, आळसाय…. हाचेर आसता. ताका लागून थोडे तरणाटे मुखार पावतात आनी उरिल्ले धनयांच्या, वरिश्ठांच्या नांवान स्राप सोडीत भितरले भितर घुसमटत स्वताच्या करियराची वाट लावन घेतात. गोंयांतल्या उद्देगांनी भायले भरल्यात, ताचे फाटलें हें एक कारण. अर्थांत उद्देजक, वेवसायीक हांचीय चूक आसा. ते सगल्याच कामगारांक ‘उणें दाम (पगार), चड काम’ तागडेंत जोखूंक पळयतात.
आतां गोंय गुंतवणूक उर्बा मंडळान 518 कोटी गुंतवणुकेचे 10 प्रकल्प मंजूर केल्यात. साडेतीन हजार नोकऱ्यो मेळटल्यो अशेंय जाहीर जालां. हे प्रकल्प फार्मास्युटीकल्स, डिस्टीलरी, हाॅस्पिटेलिटी मळा वयले आसात. हातूंतल्यो निदान 75 टक्के नोकऱ्यो थळाव्यांक मेळटल्यो, अशी अट कंपनींक घालूं येता. बरेच गोंयकार आतां भायल्या राज्यांनी वा देशांत कामाक वतात. ते नेमके कसलें काम करतात, ताचो अभ्यास जावंक जाय. म्हणटकच तसले उद्देग, वेवसाय गोंयांत हाडपाक मेळटले. शक्यतो प्रदुशण नाशिल्ले उद्देग आयल्यार चड बरें. कारण गोंय धाकटुलें. प्रदुशण जावं येता, असो कारखानो घालपाक आतां रानां उरूंक नात. फुडाराक आयटी मळ आनीक तरतरलें. ते उद्देग हांगा हाडूं येतात. घरगुती उद्देगांक फाटबळ दिवपी व्हडले उद्देग उपकारतात. देखीक, लोणचें, पापड, जॅम, आंब्या – पणसाचे जिनस, काथ्याचे उद्देग. सरबराय मळाचेर तर गोंयचो हात धरपी कोण ना…. पूण ते विशींचें प्रशिक्षण, शिक्षण दिवपी संस्था वाडूंक जाय. फुडल्या 10 वर्सांनी ताचो फायदो जातलो. फकत भायल्या कामगाराक संवकळीचे आशिल्ले, कश्टाचें काम आशिल्ले उद्देग हाडून गोंयकारांचे नवे पिळगेक कांयच फायदो जावचो ना…. येवजण्यांचो लाव घेवन गोंयांत येतात, सुरू जातात ते उद्देग बरे चलतले, हाचेरूय बारीक नदर दवरची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
