न्यायालया कडल्यान आस्त

भांगरभूंय | प्रतिनिधी

तो मेरेन लोकांक सैमीक स्रोत सोडून फक्त आनी फक्त नळाचेंच उदक वापरपाची संवय लागिल्ली. आयज ती आमच्या शिरंतरांनी रिगल्या.

गोंयांत उदकाची टंचाय ही सदचीच. धरणांनी फावो तितलो उदकाचो सांठो आसतना मार्च लागलो काय खंयच्या ना खंयच्या म्हालांत लोक उदका खातीर सरकारी खात्यांची दारां बडयतात. पर्यटकांचो आंकडो खूब वाडला, तळीं, व्हाळा सारके सैमीक स्रोत दिसान दीस उणे जायत आसात. कांय इबाडल्यात. टँकर वेवसायिकांक लागून कांय कडेन बांयो आटल्यात, अशे आरोप जावपाक लागल्यात. न्हंयो प्रदुशीत जाल्यात. नळाचें उदक वापरपी कुटुंबांचोय आंकडो वाडटा. हीं उदका टंचायेचीं कांय कारणां. हालींच न्यायालयान हाची आपुण जावन दखल घेतली आनी दोनापावलाच्या ला ओशियाना काॅलनींत आनी सरभोंवतणच्या वाठारांत दिसांतल्यान तीन वरां उदका पुरवण करपाचे निर्देश बांधकाम खात्याक दिले. काॅलनींत रावपी साल्वादोर त्रिनिदाद, एस्लिंदा गोम्स, कार्लुस नोरोन्हा आनी फेली राॅड्रिग्ज ह्या ज्येश्ठ नागरिकांनी खंडपीठाच्या प्रशासकी न्यायाधीशांक हालींच पत्र बरयिल्लें. ताची दखल न्यायालयान घेतली.
ही खबर सोशल मिडियाचेर पातळटकच कांय नागरिकांनी उरिल्ल्या वाठाराचें कितें, असो प्रस्न केला. कारण राज्यांत बरेच कडेन सारकी उदका पुरवण जायना. थंयच्या लोकांनी आतां न्यायालयाक पत्र बरोवचे पयलीं बांदकाम खात्याच्या अधिकाऱ्यांनी सगल्यांक उदक मेळटलें हाची खबरदारी घेवची पडटली. ला ओशियाना काॅलनींक दिसांतल्यान पाऊण ते सवाय वरूच उदक मेळटा. फाटले कांय दीस आमकां टँकरांचें नितळ नाशिल्लें उदक पियेवचें पडटा, अशें त्या ज्येश्ठ नागरिकांनी न्यायालयाक पत्रा वरवीं कळयिल्लें. न्यायालयान हाची दखल घेवन सुनावणी सुरू केली. राज्य सरकार आनी मुख्य बांधकाम अभियंत्याक तांणी प्रतिवादी केला. हे विशीं बांदकाम खात्याक प्रतिज्ञापत्रूय दिवपाक सांगलां. आतां फुडली सुनावणी १६ मेक जातली. ते दीस मानादीक न्यायमूर्ती पुराय गोंयचे उदका टंचायेचेर भाश्य करतले, अशी आस्त गोंयकार बाळगून आसतले. उदकाच्या स्रोतांची जतनाय करप हें आमचें सैमीक कर्तव्य. ते विशींय सरकारी यंत्रणांक, स्वराज्य संस्थांक सांगपाक जाय.
उदक म्हणल्यार जीवन. ताचे बगर मनीस जितो उरपाकूच शकना. तेन्ना प्रत्येक कुटुंबाक दिसांतल्यान तीन वरां तरी नळाचें उदक मेळपाक जाय. तेंय बी पूर्ण प्रेशरान. हालींच्या वर्सांनी भोवतेक बिल्डर बांय, पंप, टांकये वरवीं इमारतींत रावप्यांक उदकाची पुरवण करतात. बांयो आशिल्ल्या लोकांनीय पंप, टांकी बसयल्या. तरीय बऱ्याच गोंयकारांक उदका खातीर वळवळे काडचे पडटात. कपडे उमळपाक न्हंयेचेर वचपाचें प्रमाण कमी जालां. पोरसां, भाटां, बागायतीं खातीरुय बरेच जाण नळाचें उदक वापरतात. गांव सोडून शारांनी रावपी लोक वाडल्यात. कोणा- कोणांक पावतलें हें नळाचें उदक!!
1980 च्या दशकांत गोंयांत नळा वरवीं घर घर जल मेळपाक लागलें. तेन्ना भौशीक नळूय सुरू केल्ले. लोकांनी अर्थांत ताचो भरपूर फायदो घेतलो. कपडे, आयदनां, गाडयो धुंवप, न्हांवप हें नळाचेरुच जावपाक लागलें. कांय जाण गोरवां पसून ह्या नळांचेर धुवपाक लागले. मदीं हे नळ मोडटाले, उदक रातदीस व्हांवताले. तेन्ना सहसा कोणे उदकाचो इबाड जाता, हजारांनी लीटर फुकट वता, असो बोवाळ केलो ना. मात घर घर नळ जातकच सरकारान हें भौशीक नळ बंद केले. तो मेरेन लोकांक सैमीक स्रोत सोडून फक्त आनी फक्त नळाचेंच उदक वापरपाची संवय लागिल्ली. आयज ती आमच्या शिरंतरांनी रिगल्या. दोन वरां नळ गेल्यार आमी वयर सकयल जातात. बांय, पंप, टांकी नाशिल्ले तर चडूच. कारण तांकां टँकर मागोवपा बदला दुसरो पर्यायूच उरूंक ना.
पिड्ड्यार जाल्ले सगले उदका स्रोत आदले वरीं जातले, हे खातीर सरकारान यत्न करूंक फावो. अंत्रुज म्हालांत कांय खाजगी संस्था हें काम करतात. मागीर सरकाराक कित्याक शक्य ना? गोंयच्यो न्हंयो, व्हाळ खोलावपाक जाय, तांच्यो धडो काँक्रिटान बांदून काडपाक जाय, तातूंत कोण रसायनां सोडचो ना, कोयर उडोवचो ना, हें पळोवंक जाय. साळ न्हंय, सांतिनेज खारीज बुरशें कित्याक जालें, हाचे फाटलीं कारणां सोदलीं जाल्यार राज्यांतल्या न्हंयो, तळयो, व्हाळांक जिवे करप सहज शक्य आसा. ही जापसालदारकी पंचायत, पालिकांक दिवची. सांकवाळ प्रकरणाक लागून उदका स्रोत खात्यान आतां टँकराच्या उदकाचेर दुबाव उक्तायला. तातूंत शिमे पलतडच्या हावक्यान म्हादयचेर घुरी घाल्या.
रोखडोच पावस रकतलो. तो मेरेन लोकांक उदका खातीर तान्हेल्ले रावचें पडटलें. राज्यभर सगळ्यांक सकाळीं, दनपरां, सांजवेळा 3-3 म्हणजे दिसाक णव वरां उदक दित जाल्यार घडये उदका टंचाय सोंपतली.