भांगरभूंय | प्रतिनिधी
भायल्यान येवपी नुस्त्यांत फाॅर्मेलीन आसता, असो आरोप कांय जागृत नुस्तेमार संघटनांनी केला. ताका लागून भायल्यान येवपी नुस्त्याची तपासणी जातली, अशें नुस्तेमारी मंत्री नीळकंठ हळर्णकार हांणी जाहीर केलां. म्हणजे आतां मेरेन तपासणी जायच नासली तर?? नुस्तें चड दीस तिगून उरचें म्हूण ताका फाॅर्मेलीन सारयतात, असो आरोप कांय वर्सां पयलीं गोंयांत जाल्लो. व्हडलो खवदळ जाल्लो. बातमी, वार्तापत्रां, लेखांचो पावस पडिल्लो. मात, उपरांत व्हडलेंशें कांय जावंक ना. कर्नाटक, आंध्रांतल्यान नुस्ते गोंयांत पावता म्हणसर बरोच वेळ लागता. तो मेरेन नुस्तें पोंवटें जायत म्हूण ताका फाॅर्मेलीन लायतात, अशें म्हणटाले. ह्याच काळांत गोंयांतले कांय पेजाद नुस्तें वेवसायिक, नुस्तेकारुय ताचो वापर करतात आनी तातूंत कांय राजकी फुडाऱ्यांचो हात आसा, असोय आरोप जाल्लो. 15 दीस नुस्तें आयातीचेर बंदी पसून घाल्ली. आतां नुस्तेमारी मंत्र्यांच्या वक्तव्याक लागून परतून हो तपास जातलो. कोण सांपडलो जाल्यार दोन दीस बोवाळ जातलो आनी मागीर शांत… शांत…
कुटबण नुस्तेमारी सोसायटी आनी गोंयचो रापोणकारांचो एकवोट अश्या कांय संघटनांनी भायल्यान येवपी नुस्त्याचेर फाॅर्मेलिनाचो लेपोड आसता, असो गंभीर आरोप केला. गोंयकारांची नुस्त्याची गरज भागतली इतलें नुस्तें गोंयांत आसा. भायल्यान नुस्तें हाडपाची मात पसून गरज ना, असो दावोय ह्या फाॅर्मेलीन विरोधकांनी केला. तेवटेन, ह्या नुस्त्याची तपासणी जावची म्हूण नुस्तेमारी मंत्र्यान अन्न आनी वखद प्रशासन खात्याक (एफडीए) पत्र बरोवपाची घोशणा केल्या. आपल्या खात्या कडेन तपासणी अधिकारी नाशिल्ल्यान एफडीएन हो तपास करचो, अशें नुस्तेमारी मंत्र्यान म्हणलां. हो अधिकारी नेमप शक्य ना? खरें म्हणल्यार नुस्त्याचो दर्जो तपासपी घोळटे पंगड नेमपाक जाय. लोकांनी पसून लिटमस पेपर विकत हाडून घरचे घरा तपासणी करूं येता, अशें तांणी सांगलां. खाणावळीं विशीं कितें? कारण घरांतल्या परस आतां खाणावळींनी चड लोक जेवतात. हालींसराक दुयेंसां वाडल्यात. तीं घडये फाॅर्मेलीन, भेसळ, फ्रिजांत चेंपून दवरिल्ल्या नुस्त्या खातीर आसुये.
फाॅर्मेलीन हो मेथाॅनल गॅसीचो एक प्रकार. चड करून नुस्तें तिगचें म्हूण तें वापरतात. मड्या कुडींनीय मडीं तिगोवन दवरपाक फाॅर्मेलीन वापरतात. पेशी कुसच्यो न्हय, म्हूण. तें चड प्रमाणांत पोटांत गेल्यार किडनी, स्वास नलिका, मेंदवाचेर परिणाम जाता. कांतीचे, पुलमांवाचें दुयेंस जावं येता. कॅन्सर पसून जावपाची भिरांत आसता. मात, आमचे बरेच लोक सुवार्थी जाल्ल्यान तांकां दुसऱ्यांचे भलायकेचें पडिल्लें ना. दुदांत पसून फाॅर्मेलीन, युरिया, शांपू वापरपाचे प्रकार आमच्या देशांत घडल्यात. तेन्ना नुस्तें उजरावचे, कल्लोवचे पयलीं कांय वेळ उदकांत भिजोवन दवरचें, बरे धुंवचें, अशें दोतोर सांगतात. पावसाच्या दिसांनी तर शक्यतो नुस्तें खावप टाळपाक जाय. सरकाराक जर फाॅर्मेलिनाचो वापर जाता, असो दुबाव आसल्यार संबंदीत नुस्ते येरादारी कंपनींचेर, ते भायल्यान घेवपी ट्रकांचेर कडक कारवाय करपाक जाय. ती कित्याक जायना?
फाॅर्मेलीन मेकअप केल्लें नुस्तें गोंयांत येवपाक नाका जाल्यार गोंयांतलो नुस्त्याचो सांठो वाडूंक जाय. आमच्या न्हंयांनी प्रदुशणाक लागून नुस्तें उणें जालां. तेन्ना न्हंयो बुरश्यो जावच्यो नात, हें पळोवप सरकाराची लागणूक. बाजारांत गांवठी नुस्त्याची आवक वाडपाक जाय. तांचें मोल परवडपी हजारांनी गोंयकार आसात. देखून गांवठी नुस्त्याची पैदास हो एक बरो वेवसाय जावं येता. अर्थांत गोंयचीं शेतां इबाडून न्हय. अंदूं हाॅटेलांनी ताल्ले, पेडवे कमीच दिसतात. विस्वणूय कमी जाला. दर्यांतल्या नुस्त्याचें प्रमाण देंवपाक लागलां, ही हुस्को करपा सारकी गजाल. मुळांत गोंयांत येवपी पर्यटक नुस्तें खावप पसंत करतात. ताका लागून बाजारांत आदले वरी तरातरांच्या नुस्त्यांच्यो राशी दिसनात. दिसल्यो जाल्यारुय त्यो सामान्य मनशाक परवडपा सारक्यो नासतात. नुस्तें हें गोंयकारांचें मुखेल अन्न. म्हणटकच ताका तें धादोशी जायसर खावपाक मेळपाक जाय. सदां उठून फाॅर्मेलीन नुस्तेंच मेळ्ळें जाल्यार ताचो गोंयकारांचे भलायकेचेर परिणाम जातलो. हें मतींत दवरून नुस्तेमारी खात्यान ह्या फाॅर्मेलिनाचो सोक्षमोक्ष लावचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
