भांगरभूंय | प्रतिनिधी
ऑलिंपिक, आशियाई, राष्ट्रकुल आनी संवसारीक सर्तींत पदकां मेळोवन देशाक बरें नांव दिवपी भारतीय बायल पेलवानांक चार म्हयन्यांत दुसरे खेपे आंदोलन करचें पडलां. चार म्हयन्यां आदीं दिल्लींतल्या जंतर मंतराचेर भारतीय बायलां पेलवानांनी निशेध करून भारतीय कुस्ती महासंघाचे अध्यक्ष बृजभूषण सिंहाचेर लिंगीक त्रासाच्या प्रकरणांत कारवाय करपाची मागणी केली. त्यावेळार तांकां ह्या सगल्या प्रकरणाची खोलायेन चवकशी करतले, अशें आस्वासन दिल्लें. मागीर तें आंदोलन स्थगीत जालें. पूण चार म्हयने जावनूय कारवाय जाली ना, तांचो राजिनामोय कोणे घेवंक ना, देखून बायलां पेलवान परत एक फावट जंतर मंतर हांगा आंदोलनाचेर बसलीं.
बारा दिसांनी लेगीत सरकारान ह्या निशेधाची दखल घेतली ना. निशेध करपी पेलवानांनी उश्णताय आनी पावसाक धाडसान तोंड दिलें. हालींच पावस आनी जळारांक धाडसान तोंड दिवपी निदर्शकां आड पुलिसांनी बळगें वापरलें. पुलिसांनी बायलां पेलवानांचेर लाठीचार्ज केलो. ह्या लाठी हल्ल्याक लागून व्यथीत जाल्ल्या पेलवानांनी दुकां व्हांवयलीं तरी सरकाराक ह्या आंदोलनाची दखल घेवची अशें दिसलें ना. सरकाराचे हे संवेदनहीनतेचो निशेध करता तितलो उणो.
देशाचें प्रतिनिधित्व करपी बायलां पेलवानांचेर लैंगीक अत्याचार जाता हें अपमानकारक. प्रस्न बृजभूषण सिंहाचो न्हय, तो खंयच्या पक्षाचो न्हय. तो नैतिकताय, बायलांचो आत्मसम्मान. फकत पेलवान न्हय, तर देशांतल्या खंयचेय बायलेक लिंगीक अत्याचाराची कागाळ केल्यार रोखडीच चवकशी करची, पूण हालींच्या काळांत परिस्थितींत खूब बदल जाला. आरोपी खंयच्या पक्षाचो, खंयचे विचारसरणीचो, खंयच्या धर्माचो आनी खंयचे जातीचो आसा हाचेर नदर मारून कारवाय करतात. हें सगळें भिरांकूळ, ताचे परस चड भिरांकूळ म्हणल्यार सोशल मिडियाचेर एक पंगड ह्या बायलां पेलवानांची उक्तेपणान बदनामी करता. पेलवानांचें हें आंदोलना फाटल्यान विदेशांतल्यान पयशे येतात. सगले पेलवान देशद्रोही आसात, अशी वावडी मुद्दाम सोशल मिडियाचेर पातळावप चल्लां. ही सगळी परिस्थिती तिडक हाडपी आसा.
संवसारभर देशाचें नांव गाजोवपी, देशाचो मान वाडोवपी, संवसारभर भारताचो तिरंगो अभिमानान हुबोवपी पेलवानांचे बाबतींत अशें जालें जाल्यार तें व्हडलें दुर्दैव थारतलें. सरकारान ह्या निशेध करपी पेलवानांचे सोंशिकसाणेचो अंत पळयनासतना तांणी केल्ल्या आरोपांची पुराय चवकशी करची. चवकशी पुराय जाय मेरेन बृजभूषण सिंहाक निलंबीत करचो. तपासांत दोशी थारल्यार तांचे आड कायदेशीर कारवाय करची. बायलां पेलवानां कडेन आनीक आडनदर करिनासतना सरकारान तांकां न्याय दिवचो.
श्याम ठाणेदार
11
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
