ड्रग्सांची फॅक्टरी

भांगरभूंय | प्रतिनिधी

फाटलीं पांच वर्सां त्या घराच्या आशीकुशीक रावपी कोणाकूच हे ड्रग्स फॅक्टरीची खबर नाशिल्ली. हें एक अजापूच म्हणपाक जाय. लोकांचें एक सोडात, पुलिसांक, थळाव्या लोकप्रतिनिधींकूय हें विशीं कळूंक ना?

गोंयांत घुंवळे वखदांची समस्या फाटल्या बऱ्याच वर्सां सावन कायम आसा. पुलिसांनी हाचेर नियंत्रण दवरपाचो खूब यत्न केलो. पूण तांकां ती सोंपोवप शक्य जावंक ना, हें मान्य करचेंच पडटलें. कारण दर म्हयन्याक उणींच 25 प्रकरणां सांपडटात. पूण, हे सगळे सादे पॅडलर. घुंवळे वखदां हाडपी मुखेल सुत्रधार पुलिसांक अजून सांपडूंक ना. कांय नांवां अदीं मदीं वयर सरिल्लीं. तांकां अटक जावंक ना. घडये तांचे आड पुरावे नासतले. भायल्यान आयिल्ल्या पुलीस यंत्रणांनी मात गोंयांत धाडी घालून ड्रग्स जप्त केल्यांत. फाटल्या चार दिसांनी नार्कोटिक्स कंट्रोल ब्युरोच्या (एनसीबी) गोंय विभागान घुंवळे वखदांचें रॅकेट उध्वस्त केलां. तातूंत हणजुण्यां ड्रग्साचें उत्पादन करपी एक फॅक्टरी आसा. अस्तंत बंगालाच्या ए. कुंदू ह्या दुबावीताक 25 लाख रुपयाच्या ड्रग्सां सयत धरला. गोंयांत पोरसांत, फ्लॅटांत गांज्याची लागवड करपाच्यो घडणुको घडल्यात. संबंदीत ‘शेतकारां’क अटकूय जाल्या. मात ही साबार तरांचे ड्रग्स तयार करपाची फॅक्टरीच गोंयांत आसप ही सगल्यांकूच धपको दिवपा सारकी गजाल.
एनसीबीच्या अधिकाऱ्यांनी विदेशी नागरिकाक अटक केल्ली. ताचे कडल्यान ही फॅक्टरीची म्हायती मेळिल्ली. ते प्रमाण सोमारा सकाळीं धाड घाली आनी हे प्रकरण उक्ताडार आयलें. ड्रग्स तर सांपडलेंच पूण ताचें उत्पादन करपाक लागता, त्या कागदाचो सांठो सांपडलो. तो एलएसडी ब्लाॅटस तयार करपाक वापरतात. चौकोनी कापिल्ले, कापूंक नाशिल्ले कागदाचे कुडके मेळ्ळे. ते कापपाचें यंत्र, ड्राॅपर्स, हेर म्हालूय एनसीबीन जप्त केला. एका घरांत चलपी ही ड्रग्सांची फॅक्टरी. 2018 सावन कुंदून ती सुरू केल्या. म्हणल्यार फाटलीं पांच वर्सां त्या घराच्या आशीकुशीक रावपी कोणाकूच हे ड्रग्स फॅक्टरीची खबर नाशिल्ली. हें एक अजापूच म्हणपाक जाय. लोकांचें एक सोडात, पुलिसांक, थळाव्या लोकप्रतिनिधींकूय हें विशीं कळूंक ना, हाका कितें म्हणटलो? फॅक्टरीची इल्ली तरी सुलूस शेजाऱ्यांक लागतली. कुंदूगेर कोण कामाक वता, तांकां तरी तो नेमकें कितें करता, हें कळू येतालें. काय सामकें गुपीतपणान तो काम करतालो? ताका कोणाचो तेंको आसा, हें एनसीबीचे चवकशेंत भायर सरतलें. असल्यो आनीक कितल्यो फॅक्टरी गोंयांत आसात, गांज्या सारके वनस्पतीचें कोण पीक घेतात, हाचो सोद तरी आतां थळाव्या पुलिसांनी घेवचो. ड्रग्साचो वेव्हार हो रॅकेटां वरवीं चलता. म्हणटकच आनीक फॅक्टरी गोंयांत आसपाची शक्यताय न्हयकारपाक येना.
कुंदू हो मुंबय बँकेंत कामाक आशिल्लो. नोकरी सोडून तो 2017 त गोयांत आयलो. पर्यटकांक बंगले भाड्यान दिवप. तांकां राज्यांतल्या पर्यटन थळांची म्हायती दिवप. थंय घेवन वचप असलीं कामां तो करतालो. 2018 त ताणें हणजुण्यां घर भाड्यान घेतलें आनी थंय हो ड्रग्स तयार करपाचो खूब पयशे दिवपी ‘लघु’ उद्देग सुरू केलो. तो सगलो कच्चो म्हाल, रसायनां भायल्यान हाडटालो. हांगा ड्रग्स तयार करतालो आनी स्वताच गोंय आनी हेर राज्यांतल्या ड्रग्स पॅडलरांक तें विकतालो, अशी म्हायती उक्ताडार आयल्या. आतां तो एकलोच हें सगलें करप शक्य ना. ताचे साथीदार आसतलेच. एनसीबीची तांचेर नदर आसतलीच. गोंय पुलिसांनीय ते नदरेन यत्न करूंक फावो. कुंदू सारके व्हडले सुत्रधार सांपडूंक जाय. ल्हान पॅडलर हे माणा वयल्यान कील- अर्द कील सामान व्हरपी गिरायकां सारके. जो मेरेन मूळ दुकानदार सांपडनात, तो मेरेन ड्रग्स समस्या सोंपची ना.
भारतांत येवपी ड्रग्स आमचीं शत्रू राष्ट्रां धाडटात, अशें म्हणटात. खास करून बोटींतल्यान ड्रग्स येता. अब्जांनी रुपयांचीं घुंवळे वखदां गुजरातांतल्या धक्यांचेर जप्त केल्यांत. तीं पाकिस्तानांतल्यान येतात, हेंवूय सिद्ध जालां. मागीर ह्या धक्यांचेर कडक बंदोबस्त कित्याक दवरीनात? खास करून दर्यादेगेचेर आशिल्ल्या प्रत्येक राज्यान दोळ्यांत तेल घालून नदर दवरली जाल्यार ड्रग्सांचो हो सांवार उणो जातलो. गोंयांतल्या दर्यादेगांचेर आनी थंय चलपी वेव्हारांचेर पुलिसांची नदर आसपाक जाय. एनसीबीक जें दिसलें तें पयलीं आमच्या पुलिसांक दिसपाक जाय आसलें. निदान हाचे मुखार तरी तांणी सादूर रावचें. हांगाच्या घुंवळे वखदांचीं पाळां मुळां खणपी एनसीबीक हे कारवाये खातीर परबीं.