भांगरभूंय | प्रतिनिधी
अामच्या देशांत व्यक्तीपुजेक खूब म्हत्व. पुजपाक कोण मेळटा काय म्हूण लोक वाटूच पळयत आसतात. हाका राजकी मळूय आडवाद ना. दक्षीण भारतांतल्या राजकारणाचो अभ्यास केल्यार हे जाणवतलें. एनटीआर, जयललिता, एमजी रामचंद्रन अश्या जायत्या फुडाऱ्यांक लोकांनी देवाचें स्थान दिलां, अशें म्हणल्यार अतिताय थारची ना. काळ मुखार वचत आसता. पक्षाचो खांपो फुडारी गेलो म्हूण पक्ष दुबळो जाता आसत, पूण सोंपना. कोणाचें कोणा बगर अडना. नवी व्यक्ती तो जागो घेता. काल सकाळीं राष्ट्रवादी काँग्रेस पक्षाचे (एनसीपी) फुडारी शरद पवार हांणी आपूण पक्षांचें अध्यक्षपद सोडटां. हाचे मुखार खंयचीच वेंचणूक लढोवचो ना, अशी घोशणा केली आनी पक्षा भितर एकूच खवदळ जालो. वावुरपीच न्हय, तर फुडारी रडपाक लागले. कांय ज्येश्ठ फुडाऱ्यांनी तर अक्षरशा पवारांचे पांय धरले. थोडे उपासाक बसले. ‘लोक माझे सांगाती’ हे आपले राजकी आपजीणेच्या सुदारीतआवृत्तीच्या लोकार्पण सुवाळ्यांत पवार हांणी ही घोशणा केली. ते निर्णयाचेर ठाम आसात. मात, आतां वावुरपी आनी फुडाऱ्यांनी निर्णय फाटीं घेवपाचो हट्ट धरिल्ल्यान फुडल्या 2-3 दिसांनी ते परत विचार करतले, अशें तांच्या घरच्यांनी जाहीर केलां.
शरद पवार हांचे प्रमाण शिवसेना फुडारी बाळासाहेब ठाकरे हांणीय शिवसेना अध्यक्षपद सोडिल्लें. उपरांत वावुरप्यांनी आग्रो केल्ल्यान निर्णय फाटीं घेतिल्लो. सोनिया गांधी हांकां तर प्रधानमंत्री जावपाची संद आशिल्ली. तांणी न्हयकार दिल्लो तेन्नाय असोच बोवाळ जाल्लो. पूण ती निर्णयाक दसून रावली. गोंयचे मुख्यमंत्री मनोहर पर्रीकार संरक्षणमंत्री म्हूण अचकीत राष्ट्रीय पांवड्याचेर गेले, तेन्नाय वावुरप्यांक भावना अनावर जाल्ल्यो. फुडाऱ्या वयलो मोग कार्यकर्त्यांक हें करपाक लायता. पूण खंयचोच फुडारी अमरपट्टो घेवन येना. शरद पवार फाटलीं 60 वर्सां राजकारणांत आसात. जाण्टे जाल्यात. तांची भलायकी बरी नासता. ताका लागून तांणी हो निर्णय घेतला आसतलो वा पक्षांत आपल्याक अजून कितलें म्हत्व आसा, तें तांकां पळोवपाचें आसतलें. कांय राजकी जाणकारांच्या अदमासा प्रमाण, पक्षांतले कांय फुडारी सध्याच्या सेना- भाजपा सरकारांत वचपाक सोदतात, म्हूण बेजार जावन तांणी हो निर्णय घेतला. खरें कितें तें तांकांच खबर आसतलें. घडये हो राजकी डावपेचूय आसपाक शकता. कारण सध्यां राजकारणांतले ते ‘जाणता राजा’ आसात, हें न्हयकारपाक मेळचें ना. ‘आपूण भौशीक जिणेंतल्यान निवृत्त जावचो ना. स दशकां लोकां खातीर वावुरलो, आतांय सेवेंत खंड पडपाक दिवचो ना. उदरगत, शेती मळा खातीर चड वेळ दितलों’, अशें तांणी सांगलां. खरें म्हणल्यार, तांच्या अध्यक्षपद सोडपाच्या निर्णयाचो फुडारी, वावुरप्यांनी आदर करपाक जाय. फुडलें अध्यक्षपद प्रफुल्ल पटेल, जयंत पाटील हांकां मेळटा, काय अजित पवार, सुप्रिया सुळे हांकां हें पळोवपाचें. जो अध्यक्ष जातलो, तो शरद पवार हांच्या मार्गदर्शना खालाच निर्णय घेतलो, अशें पुतणये अजित हांणी घोशीत केलां. तरीय शरद पवार नाशिल्ल्यान महाराष्ट्राच्या राजकारणाक मोडण मेळटलें, अशें कांय जाणांक दिसता. तें सामकेंच न्हयकारु नज.
शरद पवार राजकारणांत येवपाक गोंय कारण थारलां. 1956 त पिरायेच्या सोळाव्या वर्सा तांणी गोंय मुक्ती सत्याग्रहाक तेंको दिवपाक विद्यार्थ्यांचो मेळावो आयोजीत केल्लो. मागीर काॅलेजींत विद्यार्थी संघटनेच्या सुवाळ्यांत मुख्यमंत्री यशवंतराव चव्हाण हांचेर तांच्या भाशणान मोनेळ घालो. फुडें 24 व्या वर्सा ते महाराष्ट्र युवक काँग्रेसीचे अध्यक्ष जाले. 1967 वर्सा ते बारामतींतल्यान विधानसभेचेर वेंचून गेले. 29 व्या वर्सा राज्यमंत्री जाले. 1978 त तांणी काँग्रेसीचे 12 आमदार फोडून विरोधी जनता पक्षा वांगडा युती केली आनी वसंतदादा नाईक हांचें सरकार उडयलें. तेन्ना ‘पवारांनी माझ्या पाठीत खंजीर खुपसला’, हें वसंतदादांचें वाक्य खूब गाजिल्लें. 1978 ते 1980, 88 ते 91 आनी 1993 ते 1995 ह्या काळांत पवार महाराष्ट्राचे मुख्यमंत्री आशिल्ले. 1999 त विदेशी प्रधानमंत्री नाका, म्हूण तांणी, तारीक अन्वर, प्रफुल्ल पटेल, पी ए संगमा हांकां घेवन राष्ट्रवादी काँग्रेस पक्ष स्थापन केलो. महाराष्ट्रांत एनसीपीन स्वताचें स्थान निर्माण केलें, पूण राष्ट्रीय पक्ष म्हूण आतां ताका मान्यताय ना.
शरद पवार हांणी केंद्रीय मंत्रीपदांचेरुय काम केलां. विदेशी मुळाची व्यक्ती प्रधानमंत्री जावपाक शकना, ह्या कारणा वयल्यान सोनिया गांधींक सुरवेक विरोध करपी ह्या पक्षान उपरांत काँग्रेसी वांगडा युती केली. सोनियांक विरोध करूंक नाशिल्लो, काँग्रेसींतूच राविल्ले जाल्यार घडये शरद पवार प्रधानमंत्री जावपाचे. अर्थांत जर, तर ह्या उतरांक राजकारणांत अर्थ ना. पूण, शरद पवार हांचो महाराष्ट्राच्या राजकारणाचेर अजून शेक आसा, हें मान्य करचेंच पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
