भांगरभूंय | प्रतिनिधी
तुमचे कोंकणींत कितें आसा? मराठी, हिंदींतल्या तोला- मोलाची गीतां कोंकणींत केन्ना येतली? आसात ती कातारां आनी बाकीबाबा सारक्यांनी बरयल्लीं थोडी भोव कोंकणी गीतां. तिंवूय जितेंन्द्र अभिषेकी सारक्या गायकांनी गावन अजरंवर करून दवरल्यात म्हूण, ती कोंकणीची अशें तुमकां सांगपाक मेळटा. आयज मेरेन अशी करंदाय, आक्षेप आमी कोंकणी विरोधकां कडल्यान तशेंच कोंकणी उलोवपी, पूण ती सोडून हेर सगल्या भाशांचो मोग करपी विद्वाट्यां कडल्यान आयकत आयल्यात. पूण त्या कोंकणी विरोधकांक समर्पक जाप दिवपी कार्यावळ रवींन्द्र केळेकार ज्ञानमंदिराच्या भुरग्यांनी कालच्या आयतारा सादर केली. सर्गेस्त श्रीधर कामत हांच्या काव्याचेर आदारिल्ली ही कार्यावळ, तिची मांडावळ, येवजण तशेंच प्रेक्षकांचेर तिचो जाल्लो परिणाम पळोवप हो म्हाका आगळो अणभव दिसलो. जर ही कार्यावळ ‘झी’, ‘सोनी’ सारक्या चॅनेलां वयल्यान भारताच्या अख्ख्या लोकां मेरेन पाविल्ली जाल्यार कोंकणीची शक्त सगल्यांक कळटली आसली. देखून इतली ही सोबीत, रंगयाळी कार्यावळ भारतभर पावोवपाचो जाळवणदारांनी यत्न करचो. असो उलो ह्या लेखाच्या माध्यमातल्यान तांकां मारचो, अशें दिसता.
ही सोबीत कार्यावळ दोन वरां वयर चल्ली. भुरगीं जीं नाचताली तीं पुराय तल्लीन जावन. भेस मुदार करुन कितले बेगीन दुसऱ्या गाण्याक- नाचाक तयार जातालीं. सिनेमांतलीं नाच- गाणीं इतले फास्ट जातात तीं पळोवपाची आमकां संवय. पूण थंय चुकले जाल्यार री-टेक करून परतून चित्रीकरण करपाक वाव आसता. हांगासर भुरग्यां कडल्यान गडबडीत लेगीत कसलीच चूक जाली ना. आक्षेप घेवपा सारको चुकीचो पदन्यास वा धांवपळ मात्तूय दिसली ना. भुरग्यां कडल्यान इतले ताकदीचे हे नाचाचे प्रकार, मुस्कायकेचे सोबीत बदल करीत जमिल्ल्या लोकां मुखार सादर करपाक आकांताची तयारी जाय. ती ह्या करून घेवपी आयोजक तशेच नाच- गाणी बसोवपी दिग्दर्शक हांकां चडान चड परबीं फावो जातात. गोंयच्या गांवां-गांवांनी जर ही कार्यावळ जाल्ली, जांव तशी येवजण करून जर ती पावोवपाचो यत्न जालो जाल्यार खऱ्या अर्थान कोंकणी संगीताची ही उंचाय भौसाचे काळजा मेरेन पावतली, अशें म्हाका दिसले.
श्रीधरबाबाक हांव एक- दोन खेपेच मेळ्ळां. तांचो मान- काळजान उक्तो सभाव हांवें अणभवला. तांणी बरयल्ली गीतां सिडी, सिनेमाच्या माध्यमांतल्यान फाटलीं धायेक वर्सां आयकल्यात. ह्या ल्हानशा गोंयकाराक ताणें बरयल्ल्या गीतांनी व्हड केलाच, पूण नाच- तशेच स्टेज माध्यमांच्या आदारान ताका जागतीक पांवड्याचेर व्हरपाची तांक ताच्या गीतां भितर आसा, हो दिश्टावो म्हज्या सारक्या शेकड्यांनी गोंयकारांक ‘अंतरीच्या स्वरा रे श्रीधरा’ हे कार्यावळीन दिलो. खरेंच इतले समर्पक कार्यावळीक नाव आनीक एका फुडली एक अशीं भावार्थान भरिल्लीं गितां पळोवन, आयकून त्या दिसा खरेंपणी हांव तृप्त जालों. मायभाशेंतल्या गितांतली ही शक्त प्रत्यक्ष नाच वा अभिनयांतल्यान माचयेच्या माध्यमांतल्यान दोळ्यां मुखार येवप, हाचे सारकें सर्गीय सुख दुसरें आसचें ना. साहजीक तीं गीतां तितलेच ताकदीन पळयतल्यां मुखार हाडपाक उपाट मेहनतीचीय जोड, यत्न, संयम जाय. सगल्या गजालींचें फळ हें निमणें गोड तेन्नाच मेळटा जेन्ना उपाट भरिल्ल्या थेटरां भितर ती गजाल घडटा. जाणट्या पिरायेच्या कलाकारां कडल्यान सोड, स्कुलांतल्या भुरग्यां कडल्यान इतली अजोड कार्यावळ घडोवन हाडप हाचे वर्णन करपाक म्हजें लागी आनीक मुदयेर थीक कशे बसपी दुसरे शब्द नात.
‘मोग तुजो गो गंध फुलांनी शिरंतरानी फुलू लांगलां’! हे म्हजे सगळ्यांत आवडीचे गीत. गोंयकार जो मेरेन हे धरतरेचेर आसात ते मेरेन हें गीत उरतलें. गोंयचे मातयेतल्यान आयिल्ले. ‘यो रे सायबा यो रे’ तशेंच ‘दवांतल्या हुमेच्या फुलांची कवनां जाली” हीं गीतां. त्या गीता भितरले अशें शब्द येवजप अनीक ते माचयेर मांडप. तुमचे आमचे सारक्यांनी ती सोबीताय अणभवप हो एक सर्गीय योग. ह्या गीतांच्या रुपान आपलें अस्तित्व दवरुन श्रीधर गेलो. बरे कलाकार, लोकांक जाय- जाय दिसपी मनशांक संवसारांतल्यानय बेगीन वचपाची ओड कित्याक लागता काय? हे कुवाडे म्हाका सदांच कोंचायता. काय बरो मनीस जावप होच एक गुन्यांव? आसूं ताचेर अदीक खोल वचप ना. पूण श्रीधर कामती सारके मनीस, तांणी जर हिंदी सिनेमा क्षेत्रांत पावल दवरिल्लें जाल्यार ते खंय पावपाचे? लोक तांकां माथ्यार घेवन नाचपाचे काय? असो हांव विचार करता तेन्ना हें स्वप्नरंजन करचे परस तांगेली ही साबार कोंकणी गीता हिंदीतल्यान अणकारून तीं सिनेमांनी व्हरपाचें यत्न कोणे तरी करपाक जाय, अशे म्हाका दिसता.
मायभास हे माध्यम आपणावन रवीन्द्र केळेकार ज्ञानमंदिरांतल्यान शिकपी हीं भुरगीं. तांगेली तुळा इंग्लीश माध्यमांतल्यान शिकतल्या गोंयभरच्या भुरग्यां वांगडा करपाचो मोह म्हाका जाले बगर रावना. मायभाशेचें माध्यम भुरग्यांक सगल्या आंगानी मुखार काडटा. तांचे भितरल्या कला गुणाक मेकळीक आनी वाव दितात. जाल्यार इंग्लिश जांव हेर माध्यमांतल्यान मुखार आयिल्ली भुरगी आयज जिणेवेलीच उमेद सोंपोवन बसतात. कला- नाच सोड घरच्यांक ल्हान- व्हडाचो मोग करपाक लेगीत खाकुडटात, अशें हांव खंयतरी वाचिल्ले. कार्यावळ पळयतना म्हाका हेच गजालीचो दिश्टावो जालो. कोंकणी माध्यमांतल्यान मुखार आयिल्ल्या कलाकार भुरग्यां भितर उपाट आत्मविस्वास हांवें अणभवलो- पळयलो. दुबाव ना ह्या भुरग्यां मदीं आमची कर्तुबी गोंयकार पिळगी, गोंयचें नाव अदीक व्हड करपी कलाकारांची पिळगी म्हाका पळोवपाक
मेळ्ळी हेंवूय एक कारण आसा! कोंकणी भाशा मंडळाच्या मायभाशेंतल्या माध्यमाच्या भुरग्यांनी सादर केल्ली ‘अंतरीच्या स्वरा रे श्रीधरा’ ही कार्यावळ गोंयच्या गांवां-गांवांनी सादर जावची. कोंकणीची शिक्षणाची दारां मुखा वेल्या पिळग्यांक खरेंपणी उक्ती करपाक आनी कोंकणी मुळाव्या शिक्षणा वटेन पळोवपाची पालकांनी नदर मुदार करपाक!
महेश पारकार
9420768518
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
