भियेवपाची गरज आसा

भांगरभूंय | प्रतिनिधी

बरी नवी टॅक्नोलोजी आयल्या म्हणपाचो बोवाळ केलो म्हणून कितें जालें, रस्ते फोडले बगर जाता तर? मात्शे रस्त्यांनी भोंवन पळेयात, ह्या सिवरेज पायप लायनीच्या नांवान रस्त्याच्यो कश्यो भोयो भोयो करून उडल्यात तें दिसतलें.

सद्याक गोंयभर विकासाच्या नांवान रस्त्याचेर बळजबरी जायत आसा. खंयचेच सुवातेर बरो रस्तो मेळप कठीण जालां. ह्या
रस्त्यांची अवतिकाय पळेल्यार घडटात ते अपघात उणेच म्हणचे पडटले. मागीर रस्त्याक खेपप. आतां चूक करता कोण आनी गाळी कोणाक पडटात पळेयात. कांय तेंप आदीं फकत उदकाची पायप लायन रस्त्या पोंदच्यान वताली आनी हें पायप फुटलें वा बदलचें पडलें अथवा कोणाकूय उदकाचें कनेक्शन दिवचें जालें तरूच रस्तो फुट्टालो. आतां तातूंत भर पडल्या. दर एक गजाल रस्त्या पोंदच्यान वता आनी रस्त्याचेर हावळ येता. एकदां फोडिल्लो रस्तो केन्ना सारको जातलो हें खंयचोच ज्योतिशी सांगूक शकचोना. आनी सारको जाल्लो रस्तो कितलो तेंप उरतलो हें सांगप तर कोणाकूच शक्य ना.
कांय वर्सां आदीं दर वर्सा रस्तो फोडपाचो ठेको सरकारी टेलिफोन खात्यान घेतिल्लो. बिएसएनएल दर वर्सा केबल घालचे खातीर रस्ते फोडीत आसतालें. दर वर्सा पावस सोंपता म्हणल्यार रस्ते फोडूंक सुरवात जाताली. निमित्त आसताले केबलाची तांक वाडोवपाचें. दर वर्सा टेलेफोनाची मागणी वाडत वतली देखून मुखावेलो विचार करून पयलींच व्हड तांकीची केबल घालची अशें तांकां केन्ना सुचलेंच ना. घडये दर वर्सा दुडू सोपोवचे ह्याय विचारान खात्याचे लोक हें काम करताले आसूंक येता. पूण रस्ते फुट्टाले आनी लोकांक तशेंच वाहनांक त्रास जाताले. मोबायल आयले आनी लेंड लायनीचे दीस सोंपले. रस्त्यानूय सुटकेचो निस्वास सोडलो आसतलो.
एका खात्यान रस्त्याक सोडलो म्हूण कितें जालें? आनीक खातीं नात तर? सिवरेजच्यो लायनी घालपाक बांधकाम खात्यानूच रस्ते फोडूंक सुरवात केली. बरी नवी टॅक्नोलोजी आयल्या म्हणपाचो बोवाळ केलो म्हणून कितें जालें, रस्ते फोडले बगर जाता तर? मात्शे रस्त्यांनी भोंवन पळेयात, ह्या सिवरेज पायप लायनीच्या नांवान रस्त्याच्यो कश्यो भोयो भोयो करून उडल्यात तें दिसतलें. खड्डे सांबाळप काय धुल्ल तेंच कळना. कितलो वेळ म्हणून स्वास कोंडून दवरप? बरें पायपां घालून जालीं म्हणून सुटका ना. घरांक कनेक्शनां दिवंक जाय, दर एका घराक, बिल्डिंगेक ह्या सिवरेज पायपांक जोडूंक जाय. आनी म्हणून परत एकदां रस्ते फोडूंक जाय. रस्त्याचें दुखणें सोपपाचें ना.
तातूंत सिवरेज पायपां घालतना उदकां पायपां फुट्टात. तीं सारकीं करपाक आनी रस्ते फोडपाचे. हें उणें म्हणून आतां विजेच्यो तारो जमनी पोंदच्यान घालपाचें काम सुरू जालां. एकदां विजेच्यो तारो जमनी पोंदच्यान गेल्यो म्हणजे वीज खंय कशीच वचची ना. गोंयांक चोवीस वरां वीज मेळटली. संपूर्ण गोंय खंय चोवीस वरां झगझगतलें म्हणपाचें वीज मंत्र्यान जाहीर केलां. आयचो वीजमंत्री कांय वर्सां आदीं बांधकाम मंत्री आसलो तेन्ना संपूर्ण गोंयांक चोवीस वरां उदक मेळटलें म्हणून सांगतालो. ‘घरघर जल’ ही घोशणाय जाल्ली त्या वेळार. पूण सद्याची परिस्थिती कितें? पेडण्यां नळाक उदक ना, सत्तरी सुकल्या, काणकोणां लोक उदका सोदाक भोंवतात. परवरे लोक टँकराची वाट पळेतात. चड कित्याक मंत्र्याच्याच गांवची परिस्थिती पळेयात. फोंड्यां लोक तानेल्यात. बेतोडें सुकलां. खंय गेल्यो त्यो चोवीस वरां उदकाच्यो फटाश्यो? मंत्री बदललो आनी उदक सुकलें? वीज खात्यांत पावतकूच चोवीस वरां वीज आनी उदका खात्यांत पावतकूच चोवीस वरां उदक हें कशें?
सद्याचो बांधकाम मंत्री सांगता आमी लोकांक चार वरांय उदक दिवंक पावनात. एके वटेन तो आपलें खातें हे बाबतींत नापास थारलां म्हणपाचें जाहीर करता. मागीर खंय गेलीं तीं चोवीस वरां उदक दिवपाचीं आश्वासनां? भायल्या देशांतल्यान तंत्रज्ञान हाडलें, जायका प्रकरण जालें, रिणां काडलीं, धरणांची उंची वाडयली, उदकाची दर वाडयली हें सगळें फुकट गेलें म्हणपाचें? काय मंत्री बदललो म्हणजे सगळेंच बदलता? आनी तोच मनीस आज वीजमंत्री जातकूच चोवीस वरां विजेचो झगझग पडटलो म्हणून सांगता. कशें पातयेवपाचें हांकां? हें सगळें पळेतकूच भंय दिसता. जें उदकाचें जालां तेंच विजेचें जावचेंना मूं? विजेचे दर वाडल्याच, आतां लायनी जमनी पोंदच्यान वतल्यो आनी फाल्यां चोवीस खंयची चार वरां लेगीत लायट ना अशें बी जायना मूं?
जमनी पोंदच्यान सरयो घाल्ल्यान जर वीज वचपाची बंद जाता जाल्यार मडगांवां केन्नाच वीज वचूंक जायना आसली. पूण हांगची वीज वता काय ना तें कोणाय मडगांवकाराक विचारल्यार कळटलें. ज्या दिसा गोंय चोवीसूय वरां झगझगतलें म्हणपाचें जाहीर जालें त्याच दिसा सांजेवेळां साडे स ते साडे णव मेरेन आकें काळखांत आशिल्लें. आनी वीज खात्याचे लोक फोल्ट सोदताले. हाचोच अर्थ लायट खांब्या वयल्यान आसली वा जमनी पोंदच्यान गेली तरी लायटींत फोल्ट येताच. मंत्र्यान फटासो मारचे पयलीं हें जाणून घेवपाची गरज आसा. गांवांनी झाडां पडून वीज वचपाचे प्रकार जातात ते पावसांत वा वादळांत. पूण बाकी दिसांनी कितें? पावस, वारें, वादळ कांयच नासतना दिसाक चारचारदां वीज वता ताचें कारण कितें? मंत्र्यान हाचेर अभ्यास केला? सद्याक चल्लां तें फकत राज्याची तिजोरी रिती करपाचें काम. हातूंत मंत्र्याच्या आनी काँट्रेक्टराच्या घरांत झगझग पडटलो हातूंत दुबाव ना. पूण लोकांकूय अखंडीत वीज मेळटली? दुबाव. एक गजाल मात जातली ती म्हणल्यार वीज दरांत वाड. हो सद्याक चल्ला तो खर्च भरून काडूंक नाका? एप्रिलांतल्यान कांय प्रमाणांत वाड जाल्याच आतां दर वर्सा ती वाडत वतली. झगझग चकचक कुशीक उरतलो आनी आमचो खपखप मात वाडटलो. आमकां भियेवपाची खर्‍यांनीच गरज आसाशें दिसना?

अभयकुमार वेलिंगकार
9423884687