भांगरभूंय | प्रतिनिधी
दुयेंस केन्ना उदेत तें सांगप अशक्य. कोरोनाचो अणभव पुराय संवसाराक आसा. सामको हुस्क्याचो असो हो काळ. अजूनय सोंपूंक ना. सध्याचें युग आधुनिक. भलायकीच्या मळाचेर क्रांतीच जाल्या, पूण दुयेंसां उणी जावपाच्या बदला वाडत आसात. वाडटी भेसळ, हवा- उदकाचें प्रदुशण, जागरणां, खंयच्याय वेळार खावप- जेवप, व्यसनां, कश्ट करप ना, फक्त पयशां फाटल्यान धांवपी नोकरदार, सर्त, ताण, हुस्को…. सगले कडेन हेंच पळोवंक मेळटा. ताका लागून दुयेंसांचें प्रमाण वाडलां. बदलिल्ली जिणेशैली जाग्यार घालीत जाल्यार आमचीं अर्दअधिक दुयेंसां पळून वतलीं. गोंयांत सद्यां जी- 20 परिशदेच्या भलायकी कार्यगटाची बसका चलता. तातूंत भलायकी वेवस्था, उपक्रम, वैजकी पर्यटन आनी हेर विशयांचेर जाणकारांनी विचार मांडल्यात. ताचेर प्रत्यक्ष कृती जावची. कारण जायते फावटी बऱ्यो येवजण्यो फक्त कागदाचेर उरतात.
जी – 20 गटांत व्हडल्यो अर्थवेवस्था आसात. अर्जेंटिना, आॅस्ट्रेलिया, चीन, कॅनडा, फ्रान्स, जर्मनी, इटली, जपान, रशिया, अमेरिका, युके, इंडोनेशिया, भारत अशे 19 आनी युरोपियन युनियनांतले देश ह्या गटांत आसा. संवसारांतलो 90 टक्के जीडीपी आनी 80 टक्के जागतीक वेपारांत ह्या देशांचे योगदान आसा. संवसारांतले दोन तृतियांश लोक जी- 20 त रावतात, हें विशेश. ताका लागून जगांतलीं सगलीं मळा मुखार व्हरपाक हे देश सहज योगदान दिवंक शकतात. भलायकी उपक्रमां मदीं समन्वयाची गरज आसा, असो विचार केंद्रीय पर्यटन राज्यमंत्री श्रीपाद नायक हांणी उक्तायलो. हेर मळां वयले सगले उपक्रमूय ह्या देशांनी आपल्या आंतर सरकारी मंचा वरवीं एकमेकांच्या आदारान चालीक लावन, मनीस जातीचो उत्कर्श सादपाक जाय. हें सहज जावं येता. एकमेकांचे पांय ओडचे परस आनी संरक्षणाच्या नांवा खाला फक्त झुजां कशीं जातलीं, हाचेर मेंदू झरोवचे परस तो भलायकी, शिक्षण, पर्यावरण मळांचेर उजार जाल्यार बरो. कारण आयज ताचीच तर चड गरज आसा. खास करून आफ्रिकी, आशियाई गरीब देशांनी काम करपाची व्हडली संद आसा. एक जल्म पावचो ना, इतलें काम पावला पावलार आसा.
भायल्या देशां परस आमच्या भारतांत भलायके संबंदीचे उपचार सवाय. ताका लागून दर वर्सा 15 लाखां परस चड पर्यटक हांगां येतात. मात हे उपचार खात्रेचे आसप गरजेचें. कारण खंयूय कितें चुकल्यार देशाचें नांव बदनाम जावं येता आनी ताचो परिणाम वैजकी पर्यटनाचेर! आयुर्वेदीक, सैमीक उपचारांचेंय आकर्शण पर्यटकांक आसा. पंचकर्म, मसाज, आयुर्वेदीक उपचारांचेर केरळ सारकें राज्य खूब जोडटा. रानवटी वखदीं रोपांची लागवड राज्य सरकारां करतात. आतां सरकारी हाॅस्पिटलांनी आयुर्वेदीक दोतोर नेमल्यात. अस्सल भारतीय आहारुय वैजकी पर्यटन मळाचेर देशी, विदेशी पर्यटकांक पसंत पडूंक जाय. फकत हे उपचार करपीच न्हय, तर ही वनस्पत, फळां पिकोवपी शेतकार, वखदां करपी कारखानदार, कामगार, विक्रेते, म्हाल, वखदांची येरादारी करपी… सगल्यांकूच रोजगार मेळटलो. मात हें करतना पर्यटक दुयेंतींचो विस्वास आमी वगडावंक जायना. कसलेंय गांवठी वखद घेतल्यार हें बरें जाता, तें बरें जाता, असले दावे केले आनी गुण पडूंक ना, तर ताचो धपको भलायकी मळाक बसतलो. वखदांचें मोलूय उणेंच आसचें. कारण गिरायकांक पिशे करून चार आण्याची वस्त बारा आण्यांक विकपाची कळाशी आशिल्ले बरेच उत्पादक आमचे कडेन आसात.
भलायकी मळाचेर जायतीं आव्हानां आसात, ताचेर उपाय काडपाक प्राधान्य दिवंक जाय, असो विचार भलायकी कार्यगटाचे बसकेंत व्यक्त जालो. हे खातीर प्रगत देशांनी हेर देशांक मजत करची. कांय गिरेस्त देश खपनाशिल्लीं, बेगीन गुण पडनाशिल्लीं, आवटडेट जाल्लीं वखदां गरीब देशांनी हाडून ओततात. भारता सारक्या देशाची लोकसंख्या चड, म्हणटकच बाजारपेठूय व्हडली. हांगा, पूर्व आशियाई देशांनी कांय वखदां मेळटात, तीं अमेरिका, युरोपांत काळाच्या पड्ड्या आड गेल्लीं आसतात. जी -20 देशांनी हाचेर नियंत्रण हाडूंक जाय. आतां कॅन्सर, काळजाच्या आताकाचेर वासीन येवपाचें आसा खंय. हे तरेच्या संशोधनाचेर भारतान भर दिवपाक जाय. जी – 20 देश हे बाबतींत एकमेकांक साह्य करूं शकतात. भलायकी मळाचेर करपा सारकें खूब आसा, पूण सगल्यांत पयलीं दुयेंस जावचेंच ना, हे खातीर शक्य ती खबरदारी घेतल्यार चड बरें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
