भांगरभूंय | प्रतिनिधी
भांगरभूंय प्रतिनिधी
पणजीः 17 ते 19 एप्रील मजगतीं गोंयांत जावपी जी-20 भलायकी क्षेत्र कार्यगटाचे दुसरे बसके खातीर काल दाबोळी विमानतळाचेर आंतरराष्ट्रीय प्रतिनिधींचो पयलो पंगड दाखल जालो. स्वित्झर्लंडच्यान फ्रँकॉइज वॅनी, स्टेफन मर्फी, डिलन पल्वर, स्टेफनी सिडॉक्स, अलेन लॅब्रिक, डेरिक मुनीन अानी गॅरेट मेल, जाल्यार अमेरिकेंतल्यान एलीस अँथनी आनी स्टिवन पोस्नॅक, तशेंच फ्रान्स, मॉरिशस, इंडोनेशिया, ओमान, ब्राझील, केनिया, नेदरलँड्स, ऑस्ट्रेलिया, युनायटेड किंग्डम सयत भारतांतले निमंत्रीत प्रतिनिधी गोंयांत दाखल जाल्यात.
प्रतिनिधींक येवकार दिवपाक आकर्शीत प्रवेशदारां, थळाव्या संस्कृतीचे दर्शन घडोवपी रांगोळी अानी खोशयेच्या वातावरणांत प्रतिनिधींक येवकार दिवपाक विमानतळाचेर तयारी आनी नियोजन केल्ले. तेच प्रमाण विमानतळार चलन विनिमय कक्ष, सिमकार्ड कक्ष अश्यो सुविधाय उपलब्ध केल्ल्यो.
फुडल्या एक-दोन दिसांत आनीक प्रतिनिधी दाबोळी वा मनोहर आंतरराष्ट्रीय विमानतळाच्या (मोपा) माध्यमांतल्यान गोंयांत दाखल जातले.
अर्जेंटिना, ऑस्ट्रेलिया, ब्राझील, कॅनडा, चीन, फ्रान्स, जर्मनी, भारत, इंडोनेशिया, इटली, जपान, मेक्सिको, कोरिया प्रजासत्ताक, दक्षिण आफ्रिका प्रजासत्ताक, रशिया, सौदी अरेबिया, तुर्की, युनायटेड किंगडम, युनायटेड स्टेट्स ऑफ अमेरिका आनी युरोपीय महासंघ (ईयु) ह्या देशांचो अास्पाव जी20 त आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
