भांगरभूंय | प्रतिनिधी
गर्मी वाडली काय लोक दर्यावेळो, पर्यटन थळां, धबधबे, न्हंयो, तळयो, कुळागरां… अशा जाग्यांनी भोंवपाक वतात. जांकां शक्य आसा, ते देश- विदेशांतल्या थंड हवेच्या थळांचेर वचून म्हयनोभर पसून रावून येतात. येरादारीची सुविधा जायत सावन आमी भारतीय गर्मेच्या दिसांनी वा सणा- परबांक, सुटयांनी गांवा भायर फिरपाक लागल्यात. घडये ही पद्दत ब्रिटिशांक लागून सुरू जाल्या आसुये. कारण तांकां भारतांतलो गिमाळो सोंसनाशिल्लो. मागीर तांणी हिलस्टेशनां सोदून काडलीं. थंय रेस्ट हावसां, गेस्ट हावसां बांदलीं. एप्रील, मे म्हयनो कांय वरिश्ठ अधिकारी थंय कुटुंबा सयत वचून रावताले. न्यायालयां म्हयनोभर बंद आसतालीं. दार्जिलींग, सिमला, माथेरान, उटी, डेहराडून, मसुरी, गुलमर्ग, नैनिताल, कोडयकनाल हीं तांणी सोदिल्लीं कांय हिल स्टेशनां. स्वातंत्र्या उपरांत लोकांच्या हातांत पयसो घोळपाक लागलो, तेन्ना प्रत्येक जाण टुराक वचपाक लागलो. चड करून धर्मीक पर्यटन. मात आतां फक्त ताण उणो करूंक, सुशेग घेवपाक, फामाद थळां पळोवपाक लोक परराज्यांत वतात. थंय वचून ते धुमशेणां घालीनात. कारण सोरो, ड्रग्स घेवन सांवार कांडल्यार थळाव्यांचो मार पडटलो आनी उपरांत पुलीस बंदखणींत बसचें पडटलें. पूण, कांय लोक हे गैरप्रकार करतात. खास करून धबधबे, न्हंयांचेर न्हांवपाक वचपी. हालींच उस्तें- सत्तरींत न्हांवपाक आयिल्ल्या कांय तरणाट्यांनी बांदाची नासधूस केली. बोवाळ घालो. सोरो पियेवन मस्ती केली, असो आरोप जाला. उदका शिंपणावळ अधिकाऱ्यांनी पुलीस कागाळ करपाचें थारायलां. थळाव्या नागरिकांनी असल्या लोकांक गांवांतूच घेवचे न्हय, असो निर्णय घेतला. हाचो परिणाम कुटुंबां वांगडा येवपी नागरिकांचेर जातलो, हें निश्चित.
फाटल्या सप्तकांत फाटोफाट सुटयो आयिल्ल्यो. तेन्ना धबधब्यांचेर, न्हंयांचेर गर्दी जावप सभावीक. कांय कुटुंबांय उस्त्यां न्हावपाक आयिल्लीं. थंय कांय बेबद्या, सुरांट्या तरणाट्यांनी धुडगूस घालो. ताचे पयलीं उदक आडावपाक घाल्ल्यो लोखंडाच्यो फळयो मोडिल्ल्याच्यो, हालयिल्ल्याचे दिसून आयलां. ताका लागून शेतां, बागायतीं खातीर आडायिल्लें उदक फुकट गेलें. फळयो निटायेर घाली मेरेन उदक मेळूंक ना. उपरांत थळाव्यांनी बसका घेतली. वाळपयच्या उदका शिंपणावळ अधिकाऱ्यांची भेट घेतली. तांणी हें प्रकरण गंभीरपणान घेतलां. ताका लागून सहलीक येवपी सगल्यांकूच ताचें पानवळ भोगचें पडूं येता. सहलीक वतना मस्ती करपाकूच जाय अशें कितें आसा? पिवपाक हेर पेयां नात? बियर, व्हिस्की, ब्रॅण्डी, रमूच व्हरपाक जाय? सोरो, चिकन, मसाल्याच्या, तेलकट जिनसा बगर आमची एकूय पिकनीक जायना. हाचो परिणाम भलायकेचेर जाता. सहलींत मजा, बोवाळ, हांसप, खिदळप जाताच, ताका कोण कांय म्हणचो ना, पूण नशा करून नाका जाल्लें करप. मागीर मारामारी, गाळी…. उस्त्यां तर बांद मोडलो असो आरोप थळाव्यांनी केला. हाचे फाटल्यान सहलीक आयिल्ले तरणाटे आसात, असो तांचो आरोप.
खंयचीय सहल यादगार जावंक जाय. जाण्टेपणार तिच्यो बऱ्यो यादी काळजा कुर्कुटांत उरपाक जाय. हांवें सोरो पियेवन गाळी संविल्ल्यो, म्हजो इश्ट बुडिल्लो, वाड्याचेर, काॅलनींत मागीर झगडीं, कोत्रपण जाल्लें…. असल्यो यादी आमकां दवरपाच्यो आसात? यादी, घडणुको ह्यो आपशीच घडटात, पूण केन्नाय आमी स्वताच त्यो निर्माण करपाच्यो आसतात, हें विसरूंक फावना. आमच्या गोंयांत कांय जाग्यांचेर गिमाच्या, पावसाच्या दिसांनी लोक हमखास वताच. थंय प्लास्टिकाचो कोयर करप, बाटल्यो फोडप, धुडगुस घालप, नशा करप असल्यो गजाली घडटात. सरकारी यंत्रणेन वा थळावे पंचायतीन सीसीटीव्ही कॅमेरे बसयल्यार मस्तेपणाक मात्सो आळो बसतलो. पंचायतींनी हें मनार घेवचें. नशेंत कितें आगळीक जाल्यार ती गांवकारांक वा पर्यटकांक म्हारग पडूं येता. कोणाचें वायट जावचें न्हय, पूण मनीस चुकीचो वागल्यार कितेंय विपरीत घडूं येता. न्हय घडलां. ह्या तरणाट्यांनी स्वताक आवर घालचो. नाजाल्यार पाटलेंतलो एक आंबो बाकीचे आंबे कुसयता, तसो प्रकार जातलो, वेसनां वाडटलीं आनी एक दीस गोंयांतलीं, आशीकुशीचीं सोबीत थळां लोकां खातीर कायमचीं बंद जातलीं!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
