भांगरभूंय | प्रतिनिधी
काणकोणः काणकोण म्हालांतल्या शेळी लोलयां नुस्तें व्हरपी ट्रक (एमएच 08 डब्ल्यू 8170 ) आनी स्विफ्ट मोटार (जीए 11 ए 1805) हांचो अपघात जालो. ह्या अपघातांत पुलीस काँन्स्टेबल राकेश विर्नोडकार हांकां उपचारा वेळार मरण आयलें. कर्नाटकांतल्या मुरडेश्वरांतल्या देवाचें दर्शन घेवन विर्नोडकार आपल्या घरा परतून येतना हो अपघात जालो.
सोमारा फांतोडेर 2.30 वरांच्या सुमाराक हो अपघात जाल्ल्याची म्हायती काणकोण पुलीस निरिक्षक चंद्रकांत गांवस हांणी दिली.
स्विफ्ट मोटारींत पुलीस हवालदार कालिदास शेट्ये (आगरवाडो, पेडणें), पुलीस हवालदार कृष्णा पालयेंकार (पालयें, पेडणें), पुलीस कॉन्स्टेबल राकेश विर्नोडकार (शिवोली), पुलीस कॉन्स्टेबल प्रितेश मांद्रेंकार (हरमल, पेडेणें) आनी गृहरक्षक राजेश पेटकार (मांद्रें, पेडणें) हांचो आस्पाव आशिल्लो. तातूंतल्या विर्नोडकार हांकां मरण आयलें जाल्यार मोटार चालक कालिदास शेट्ये गंभीर जखमी जाला. तांचेर बांबोळेच्या गोमॅकाँत उपचार चालू आसात.
हे सगळे हणजूणेंच्या पुलीस स्टेशनाचेर कामाक आशिल्ले. सुटी घेवन ते देवदर्शनाक गेल्ले. येतना शेळी लोलयां नुस्तें व्हरपी ट्रक आनी मोटारीन एकामेकाक मुखा वयल्यान धपको दिलो. हो अपघात रस्त्याच्या मदेगात जाल्ल्यान कांय वेळ रस्त्या वयली येरादारी आडावली. उपरांत क्रेनीच्या आदारान दोनूय गाडयो रस्त्याचे कुशीक काडल्यो. ते आदीं जखमींक मुळाव्या उपचारा उपरांत फुडल्या उपचारा खातीर गोमॅकाँत धाडले. हो धपको खुबूच नेटाचो आशिल्लो. ह्या धपक्यान ट्रकाच्या फुडल्या भागाचो तशेंच स्विफ्ट मोटारीचोय खुर्दो जाल्लो. काणकोण पुलिसांनी अपघाताचो पंचनामो केलो. फुडलो तपास पुलीस निरिक्षक चंद्रकांत गांवस करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
