भांगरभूंय | प्रतिनिधी
देड वर्सां पयलीं चिपी विमानतळ चर्चेंत आयलो तेन्ना पर्यटनाचे नदरेन तो आमकां म्हारग पडूं येता, असो विचार मुखार आयलो. आतां मोपा जाल्ल्यान चिपीचो हुस्को ना. पूण तरीय मोपा गोंयच्या पर्यटनाक तारक आनी मारकूय थारूं येता. कारण तो सिंधुदुर्गाक लागीं आसा. पर्यटनाचे सर्तींत जो दर्जेदार सेवा दितलो, तो तिगतलो, जिखतलो. मात, आतां महाराष्ट्र सरकारान घेतिल्लो एक निर्णय गोंयच्या पर्यटनाक घडये मारक थारूं येता. ही धोक्याची घांट समजून पावलां उबारुंक ना जाल्यार आमी शेणपाची भिरांत न्हयकारपाक येना. हो निर्णय म्हणल्यार शॅक्स. महाराष्ट्र सरकारान गोंयां प्रमाण आपल्या दर्यावेळांचेर शॅकां उबारपाचें थारायलां. हो यत्न येशस्वी जालो जाल्यार पर्यटकांच्यो रांको थंय लागूं येतात.
गोंयांत शॅकां आनी हेर वेव्हार सुर्य वयर सर मेरेन चालू आसतात. मात, महाराष्ट्रांतलीं हीं शॅकां सकाळीं 7 ते सांजवेळा 7 मेरेन चालू उरतलीं. एके दर्यावेळेर फक्त 10 च शॅकां. रोजगार थळाव्यां खातीर राखीव. उणोच 80 टक्के. संगीत पार्ट्यांचो त्रास कोणाक जावचो ना, हाची जतनाय घेवची पडटली. सध्या हीं शॅकां रायगड, पालघर, रत्नागिरी आनी सिंधुदुर्ग जिल्ह्यांत सुरू जातलीं. सिंधुदुर्गांत कुणकेश्वर आनी तारकर्ली दर्यावेळेर. हेर दर्यादेगांचेरुय फुडल्या वर्स- देड वर्सांत तीं सुरू करपाचो सरकाराचो विचार आसा.
कोणाक कितेंय दिसूं, पूण गोंयांतलें पश्चिमी आनी मेकळें वातावरण, इंग्लीश, आधुनिकताय, नुस्तें, सोरो (आतां ड्रग्स, शिंदळकी)….अशा कांय कारणाक लागून बरेच पर्यटक येतात. सैम, शांतीकाय (आतां ती नेमकी खंय आसा? कारण चडशें गोंय फांतोड जाय मेरेन जागें आसता.), देवळां, चर्ची हाकाय लागून पर्यटक येतात. कौटुंबीक पर्यटन देंवलां. साहसी- इतिहासीक (दोंगर चडप, किल्ले, राफ्टिंग, उदका खेळ, आदलीं घरां, धर्मीक थळां) पर्यटन अजून फुलपाचें आसा. पर्यटन मळाचेर सगल्यांच चड शेक आसा तो ‘खाओ, पिओ, मजा करो’ वृत्तीच्या पर्यटकांचो. अर्थांत स्वताक आनी दुसऱ्यांक मनस्ताप करीनात, तो मेरेन हातूंत कांय वायट ना. पूण सध्याची दर्यादेगांची परिस्थिती पळयत जाल्यार ‘सब कुछ ठीक नहीं है’ अशेंच म्हणचें पडटलें. कारण गैरप्रकार, गुन्यांव, मस्ती सदचीच जाल्या. दिसाळीं, सोशल मिडिया वाचप्यांक हें वेगळें सांगपाक नाका. हे तरेचे पर्यटन मना पसून आवडपी पर्यटकांचो तसो एक गट आसा. जीण ही फक्त असले तरेची मजा, थ्रील घेवपा खातीरूच, असो तांचो प्रामाणीक समज. पूण कौटुंबीक, धर्मीक, इतिहासीक, संस्कृतीक पर्यटक आसात, ते असल्या गजालीं पसून पयस रावतात. दुसरीं थळां सोदपाक लागतात. गोंयांत हो दुसरे तरेचो पर्यटक कितलो येता, तांचे खातीर आमी कितें दिलां? सुटयांच्या दिसांनी सांजवेळा भुरगीं- बाळां घेवन दर्यावेळेर येवपी भायलो, भितरलो पर्यटक वाडला काय ना, ताची खबर सरकारी यंत्रणांक आसतलीच. माडांची सळसळ, ल्हारांची खळखळ, इगर्जेच्या घांटीचो मंद वाऱ्या वांगडा व्हांवत येवपी धीरगंभीर आवाज, पयसुल्ल्यान येवपी रेंदेराचें गायन आयकत मोव रेंवेंत बसून दर्या दोळ्यांत सांठोवपी पर्यटकाक आयज खंयची दर्यावेळ आवडली काय?
गोंयांत येवपाक जे पर्यटक फाटीं- फुडें जातात ते कोंकणाच्या दिशेन वळटले. तशे आतांय ते वतात. खुद्द बरेच गोंयकार शेनवार-आयतार धरून कोंकणांत मालवण, गणपतीपुळे मेरेन वचूंक लागल्यात. आतां शॅकां जातकच तीं संवकळीचीं आशिल्ले देशभरांतले पर्यटकूय थंय वतले. गोंयचें आनी सिंधुदुर्ग, रत्नागिरीचें वातावरण, भास, संस्कृताय, जेवण- खाण (खास करून नुस्ते) हांचो लागींचो संबंद आसा. ताचो फायदो कोंकणाच्या पर्यटन मळाक जावं येता. गोंयांत नायट टुरिझम ऐन रंगांत आसता. मात, कोंकणातलीं शॅकां सांजवेळा साता उपरांत बंद दवरतले. (लिपचोरयां रातचींय तीं उरूं शकतात.) थंय आवाजाचेर बंधनां आसतलीं, म्हणटकच रातच्यो पार्ट्यो आसतल्यो काय नात हें आतांच सांगपाक येवचें ना. पूण नेम मोडपाक आमी भारतीय हुशार आशिल्ल्यान रातीं 10 मेरेन शॅकां आनी पार्ट्यो चालू उरूं येतात.
तशें जाल्यार गोंयच्या पर्यटनाचो मांटव मात्सो तरी हालतलोच. तेन्ना कोंकणांतलें हें शॅक पर्यटन आमी गंभीरपणान
घेतल्यार बरें!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
