भांगरभूंय | प्रतिनिधी
राष्ट्रीय सरचिटणीसांचे गोंय भेटी उपरांत चर्चा
भांगरभूंय I प्रतिनिधी
पणजी : भाजपाचे राष्ट्रीय सरचिटणीस बी. एल. संतोष बुधवारा गोंयांत आयिल्ले. ते फाटभुंयेर राज्यांत मंत्रीमंडळ फेररचणुके विशीं नेटान चर्चा चल्ल्यात. तशेंच मुख्यमंत्री डॉ. प्रमोद सावंत हांणी मंगळारा प्रुडंट मिडिया खबरां चॅनेला वयले ‘हेड ऑन’ मुलाखतींत मंत्रीमंडळ फेररचणुके विशीं उलयतना तशें संकेत दिल्लें.
काँग्रेसीच्या आठ आमदारांच्या भाजप प्रवेशाक 6 म्हयने पुराय जाल्यात. फाटल्या सप्टेंबरांत काँग्रेसीच्या आठ आमदारांनी वेगळो गट स्थापन करून भाजपांत प्रवेश केल्लो. डिलायला लोबो, संकल्प आमोणकार, राजेश नायक हांकां म्हामंडळा मेळ्ळ्यांत, पूण दिगंबर कामत, अालेक्स सिक्वेरा, मायकल लोबो हांकां अजून मेरेन कसलेंच पद मेळूंक ना. म्हामंडळा मेळिल्ले आमदार लेगीत खोशी नात. काँग्रेसींतल्यान भाजपांत आयिल्ल्या सगल्या आमदारांची निरशेवणी जाल्या.
काँग्रेस आमदारांच्या भाजप प्रवेशा उपरांत विधानसभेची दोन अधिवेशनांय जालीं. अधिवेशना उपरांत मंत्रीमंडळांत फेरबदल जातलो, अशें मुख्यमंत्र्यांनी हाचे पयलीं स्पश्ट केल्ले. शिंयाळ्या अधिवेशना उपरांत आतां अर्थसंकल्पी अधिवेशन जालां. हाका लागून मंत्रीमंडळ फेरबदलाची परतून चर्चा सुरू जाल्या. गोपां कडल्यान मेळिल्ले म्हायती प्रमाण दिगंबर कामत, अालेक्स सिक्वेरा हांकां मंत्रीमंडळांत सुवात मेळटली. दोन मंत्र्यांचो नव्यान सोपूतविधी करचे पयलीं आदल्या दोन मंत्र्यांची मंत्रीपदां काडचीं पडटलीं. कोणाचीं पदां काडपाचीं हाचेर एकमत जावंक नाशिल्ल्यान नव्या मंत्र्यांच्या सोपूतविधीक अजून म्हूर्त मेळना.
मंगळारा मुख्यमंत्री डॉ. प्रमोद सावंत हांची प्रुडंट मिडिया खबरां चॅनेलाचे ‘हेड ऑन’ कार्यावळींत मुलाखत जाली. सोपूतविधी सुवाळ्याची तारीख थारले उपरांत दोन दीस पयलीं हांव कळयता. वावड्यांचेर विस्वास दवरचो न्हय, अशें मुख्यमंत्री डॉ. सावंत हांणी सांगिल्लें.
काँग्रेसींतल्यान जे आमदार भाजपांत आयल्यात, ते आपणे जावन आयल्यात. तांकां प्रवेश दिवपाचो निर्णय केंद्रीय पांवड्यार जाला. तांकां कितें ना कितें पद मेळपाक जाय. मंत्रीमंडळांत कोणाचो आस्पाव करचो वा ना, हो मुख्यमंत्र्यांचो अधिकार. पक्ष हाचेर निर्णय घेवंक शकना, अशें प्रदेश भाजप अध्यक्ष सदानंद शेट तानावडे हांणी स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
