भांगरभूंय | प्रतिनिधी
सचीन नायक: ‘कोंकणी रंगमाची: स्थिती आनी आव्हानां’ विशयाचेर जाली चर्चा
पणजी: आयचे घटकेक गोंयांत सादारण 40 संस्था वेवसायीक कोंकणी रंगमाचयेर कार्यरत आसात ज्यो वर्साक शेकड्यांनी प्रयोग करतात. देखून हो वेवसाय फकत सादो वेवसाय उरनासतना एक लघू उद्योगांत रूपांतरीत जाला अशें कोंकणी रंगमाचये वयले नामनेचे नट सचीन नायक हांणी सांगलें.
सरकारी म्हाविद्यालय केपेंच्या कोंकणी विभागान हालींच ‘कोंकणी रंगमाची: स्थिती आनी आव्हानां’ ह्या विशयाचेर चर्चासत्राचें आयोजन केल्लें. ह्या वेळार सचीन नायक उलयताले. ह्या परिसंवादांत कला चेतना वळवय संस्थे वरवीं कोंकणी नाटकाची निर्मिती करपी राजदीप नायक आनी एका वांगडा पांच नाटकां प्रकाशीत करपी आनी सद्याक गोंयभर गाजपी ‘काणी नव्या युगाची’ ह्या नाटकाची नामनची लेखिका सुचिता नार्वेकार हाजीर आशिल्ली.
सुरवातेच्या काळार नाटक करता म्हणून लोक वेगळे नदरेन पळयताले. घरच्यांक लेगीत ताचो त्रास सहन करचो पडला. पूण आपणें एक उतर दिल्लें तें म्हणल्यार तुमकां घरच्यांक मान सकयल घालपाक पडटा तसलें कांयच करचेना. आनी आयज ताचें फळ म्हणल्यार जे लोक, जीं सोयरीं म्हाका उणाक लेखतालीं तीं मोट्या मानान म्हजें नांव घेतात आनी तें आपलें सोयरें म्हणून सांगतात अशें सुचिता नार्वेंकार हांणी आपल्या उलोवपांत म्हणलें.
हांव फकत कोंकणी नाटक करून पोट भरतलों, असो निर्णय घेतले उपरांत गोंयचे नामनेचे नाटककार पुंडलीक नायक आनी तांची घरकान्न हेमा नायक हांच्या मार्गदर्शना खाला कला चेतना वळवय हे संस्थेची स्थापना केली. आयज हे संस्थे कडेन पांच ते स नाटकां जोडल्यांत. जीं वार्साक शेंकड्यांनी प्रयोग करतात अशें कोंकणी रंगमाचये वयले नामनेचे नट आनी निर्माते राजदीप नायक हांणी म्हणलें.
कांसुलो हें पात्र उबें करतना आपल्याक कशे तरेन तयारी करची पडली हाचे विशीं सांगतना कलाचेतना वळवयचे स्थापनेची गजाल आनी मोख राजदीप नायक हांणी स्पश्ट केली. उपरांत तांणी कांसुलो नाटकाचो प्रवास आनी जैत हाचेर उजवाड घातलो.
दुसरें वर्स कला आनी एम. ए. भाग 1 च्या विद्यार्थ्यां खातीर अभ्यासक्रमाचो भाग म्हणून ह्या परिसंवादाचें आयोजन केल्लें. सचीन नायक हांणी ‘वेवसायीक कोंकणी नाटक: स्वरूप आनी वाटचाल’, सुचिता नार्वेंकार हांणी ‘वेवसायीक कोंकणी नाटकाच्या मळार बायलांचें योगदान’ आनी राजदीप नायक हांणी ‘वेवसायीक कोंकणी रंगमाचयेर मैलाचो फातर थारपी नाटक, कांसुलो: जैत आनी प्रवास’ ह्या विशयांचेर विद्यार्थ्यांक मार्गदर्शन केलें. पयलीं पेपर सादरीकरण आनी उपरांत उक्ती चर्चा अशें ह्या परिसंवादाचें स्वरूप आशिल्लें.
परिसंवादाचे सुरवातेक कोंकणी विभाग मुखेली प्रो. डॉ. राजय पवार हांणी येवकाराचें उलोवप केलें. विद्यार्थी केदार सावंत, सुचिता बांदेकार हांणी वेगवेगळे प्रस्न विचारून चर्चासत्रांत रंग हाडलो.
ह्या वेळार डॉ. राखी आमोणकार, प्रा. सुशांत नायक, प्रा. शमिका बाळ्ळी आनी आशा गांवकार हे शिक्षक हाजीर आशिल्ले. ह्या चर्चासत्राचें सुत्रसंचालन विद्यार्थिनी नेहा वर्देश गुडे हांणी केलें. जाल्यार प्रा. दिपराज सातोर्डेंकार हांणी पुराय कार्यावळीचें संयोजन तशेंच उपकाराचें उलोवप केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
