भांगरभूंय | प्रतिनिधी
सत्तरींतले काजू उत्पादक खोशयेंत; 400 परस अदीक भाटयांचेर चल्लां नेटान काम
भांगरभूंय । प्रतिनिधी
वाळपयः काजू फेणी आनी हुर्राकाक बाजारांत अंदू बरो दर मेळपाक लागला. ताका लागून अंदूं सत्तरी म्हालांतल्या परंपरीक भाटयांनी सोरो काडपाच्या वावराक नेट आयला. मेळिल्ले म्हायती प्रमाण 400 परस अदीक भाटयो नेटान चल्ल्यात. अंदूं काजू फेणी आनी हुर्राकाचें उत्पादन चड जावपाची शक्यताय आसा.
सत्तरी म्हालांत व्हड प्रमाणांत काजू बागायती आसात. फाटल्या कितल्याशाच वर्सां सावन थंय परंपरीक भाटयो लायतात. पोरूं काजींचें उत्पादन उणें आशिल्लें. ताक लागून मर्यादीत प्रमाणांत काजी फेणी आनी हुर्राकाचें उत्पादन जाल्लें.
मेळिल्ले म्हायती प्रमाण गोंय सरकाराच्या अबकारी खात्या वतीन अंदूं दोन खेपे भाटयांची पावणी करपाची प्रक्रिया हातांत घेतिल्ली. ताका बरो प्रतिसाद मेळ्ळो. सत्तरी म्हालांत वट्ट 550 भाटयांची नोंद जाली. हो आंकडो समाधानकारक आसा. तातूंत आनीक वाड जावपाची शक्यताय अबकारी खात्याच्या अधिकाऱ्यांनी उक्तायल्या.
गोंय अबकारी खात्या वतीन पावणी प्रक्रिया पणजे हातांत घेताले. मात काजू उत्पादकांक पणजे येवपाक त्रास जावचो न्हय हे खातीर फाटल्या कांय वर्सां सावन ती वाळपय करतात. हेच खातीर काजू उत्पादकांचो बरो प्रतिसाद हे प्रक्रियेक मेळटा, अशें अधिकाऱ्यांनी स्पश्ट केलें. काजू फेणी आनी हुर्राकाक बाजारांत खूब मागणी आसा. ह्या उत्पादनांची व्हड प्रमाणांत निर्गतूय जाता. सत्तरी म्हालांत ताचें व्हड प्रमाणांत उत्पादन जाता. ताची विक्री करतना गोंय अबकारी खात्याचो परवानो घेवप गरजेच आसता. ह्या वेवसायाचेर अंदूं बारीक नदर दवरतले. अशा तरेच्या उत्पादनांतल्यान सरकाराक व्हड प्रमाणांत महसूल मेळटा. परवान्या बगर हें उत्पादन विकपाचो यत्न केल्यार तांचेर खर कारवाय जातली, अशें अधिकाऱ्यांनी स्पश्ट केलां.
80 टक्के परस चड भाटयो
सत्तरी म्हाला भोंवतणी दाट काजू बागायती आसात. सपाट आनी दोंगराळ वाठारांत ह्यो काजी आसात. ताका लागून सत्तरी म्हालांतल्यान व्हड प्रमाणांत काजीं लागतात. ताका लागून ह्या म्हालांत परंपरीक भाटयांचेर काजू फेणी आनी हुर्राक काडपाचें प्रमाणूय खूब आसता. गोंय अबकारी खात्याच्या अधिकाऱ्यां कडल्यान मेळिल्ले म्हायती प्रमाण आतां मेरेन 80 टक्के काजू उत्पादकांनी भाटयो लायल्यात. केरी वाठारांत ह्या कामाक नेट आयिल्ल्याचें अधिकाऱ्यांनी स्पश्ट केलें.
कर्नाटकांतल्यान म्हुट्ट्यांची आयात
सत्तरी म्हालांत व्हड प्रमाणांत काजी लागतात, पूण भाटयांचेर नेटान काम चलिल्ल्यान तांकां म्हुट्ट्यांचो उणाव जावपाक लागला. ते खातीर शेजारच्या कर्नाटक वाठारांतल्या पारवड, कणकुंबी, चिगुळे, मान, तळावडे, अमाडगांव कालमणी अशा विवीध गांवांतल्यान व्हड प्रमाणांत म्हुट्ट्यांची आयात करतात. दर दिसा 100 परस अदीक पिकअपी म्हुट्ट्यांची येरादारी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
