भांगरभूंय | प्रतिनिधी
40 वर्सां जाल्ल्या देवस्थानांची सक्तीन जातली सरकारी नोंदणी
भांगरभूंय प्रतिनिधी
पणजी : देवस्थानांचाे कारभार सुरळीत आनी पारदर्शक करपा खातीर राज्य सरकारान गोंय देवस्थान नियमन कायद्याच्या कांय कलमां मदीं दुरुस्त्यो करून प्रस्ताव तयार केला. हे विशींच्या विधेयकाक मंत्रीमंडळान मंजुरी दिले उपरांत फुडल्या पावसाळी अविधेशनांत ते मान्यताये खातीर विधानसभेंत येतलें. दुरुस्ती कायदो अस्तित्वांत आयल्यार 40 वर्सां जाल्ल्या सगल्या मंदिरांची सरकारी नोंदणी सक्तीची आसतली.
फाटल्या कांय वर्सांत विवीध देवस्थानांच्या वेवस्थापकीय समित्यो आनी थळाव्यां मदीं विवीध कारणा वयल्यान वाद सुरू आसात. पोरणी समिती नवे समिती कडेन वेळांत हिशोबांचे पुस्तक दिनात. तातूंतल्यान अर्थीक घोळाचे आरोप सुरू जातात. हाचे मुखार त्या आरोपांचे रुपांतर वादांत जाता. देवस्थान समित्यां मदल्या भितरल्या वादाचे परिणाम देवस्थानांच्या कारभाराचेर जातात. ताचो फटको भाविकांक बसता. ताका लागुनूच सरकारान देवस्थानांचो कारभार सुरळीत आनी पारदर्शक करपाच्या हेतान गोंय देवस्थान नियमन कायद्यांत दुरुस्ती करपाचो प्रस्ताव तयार केला, अशी म्हायती सरकारी सुत्रांनी दिली
देवस्थान नियमन कायद्यांत जावपी दुरुस्ती
1) 40 वर्सां पयलीं स्थापन जाल्ल्या आनी सरकारान निश्चीत केल्ल्या म्हाजनांची उण्यांत उणी संख्या आशिल्ल्या सगल्या देवस्थानांची नोंदणी सक्तीन करची. एकाच देवस्थाना खातीर वेगवेगळ्याे समित्यो, ट्रस्टाची स्थापणूक थांबोवची. सगल्या देवस्थानांनी प्रमाणीत कार्यपद्दती पाळची आनी वेंचून आयिल्ली समिती ते प्रमाण करपांत अपेशी थारल्यार देवस्थानाच्या प्रशासकाक देवस्थानाचो वर्सुकीं उत्सव, कार्यावळ करपाक फावोसो अधिकार दिवचो.
2 – मंदिरांच्या वेवस्थापकीय समित्यांनी नुतनीकरण आनी दुरुस्ती खातीर केल्ल्या सगल्या खर्चाचेर योग्य नियंत्रण दवरपा खातीर ताचे लेखापरिक्षण राज्य सरकारान नेमणूक केल्ल्या लेखापरिक्षका वरवीं जावपाक शकता. ताका लागून गैरवेव्हारांक आळाबंद बसतलो आनी तातूंतल्यान म्हाजनां मदलो वाद टाळपाक शकतात.
3 – सगल्याच म्हालांतल्या देवस्थानांचेर कनिश्ठ लिपीक वा देवस्थान लिपिकाची नेमणूक जावपाक शकता. त्याच म्हालांतल्या कार्यक्षम व्यक्तीची नेमणूक देवस्थानांचे रेकॉर्ड एकठांय करपाक जावपाक शकता. ताची जापसालदारकी प्रशासक वा लेखापरिक्षकांचेर आसतली.
4 – वेंचणुकेंत हारिल्ली समिती नवी वेवस्थापकीय समिती कडेन सगल्या हिशोबांचीं पुस्तकां सादर करिना. ताका लागून वाद निर्माण जातात. तशेंच वेंचून आयिल्ली नवी समितीय काम करपाक शकना. ते खातीर खर तजविजो जातल्यो. ताका लागून देवस्थान प्रशासकांक कागाळींचेय निवारण करचे पडटले.
5 – देवस्थानाच्या सगल्या प्रशासकांक सुरक्षेची तजवीज. देवस्थाना खाला आयिल्ल्या सगल्या कागाळींचे देवस्थान कायद्या खाला आळाबंद घालपाक मेकळीक मेळटली.
6 – प्रशासकांक विवीध देवस्थानांतल्या तांच्या विस्वासू म्हाजनांचे मजतीन उत्सव आयोजीत करपाचे अधिकार मेळटले. वेवस्थापकीय समिती उत्सव आयोजीत करपात अयेसस्वी थारल्यार तांचेर नियंत्रण दवपाक ही दुरुस्ती जावपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
