भांगरभूंय | प्रतिनिधी
मांद्रें गांवांतल्या एका रिसोर्टांच्या भाड्याच्या तंबूंत न्हिदिल्ले चलयेचेर मध्यानरातीं बलात्कार करपाचो जाल्लो यत्न गोंयाक लजेक घालपी आसा. पुलिसांच्या मतान, तंबूच्या जनेलांतल्यान रिसोर्टाचोच एक बार वेटर अभिषेक वर्मा (डेहराडून- उत्तराखंड) भितर आयलो आनी ते चलयेचें तोंड दाबले. तिणें आरड मारतकच लागींच आशिल्लो युरिको डायस हो तरणाटो धांवून गेलो. उपरांत तो वेटर परत आयलो आनी ताणें युरिकोचेर आनी ते डच चलयेचेर चाकू घेवन हल्लो केलो. तातूंत तीं दोगांय जखमी जालीं. कांय (सगलेच न्हय!!) तरणाटे हांगा येवन घुंवळे वखदां विकतात, हेर गैरप्रकार करतात, हें सिद्ध जालां. तांकां अटकूय जाल्या. लोकांक धमकावन खंडणी एकठांय करपीय जायते तरणाटे हांगां आसात. एकटी दुकटी तरणाटी सांपडली जाल्यार वा चडूच मेकळ्या सभावाची चली दिसल्यार तिचेर अतिप्रसंग करपाचे, खून करपाचेय प्रकार गोंयांतल्या दर्यावेळांचेर जाल्यात. राष्ट्रीय, आंतरराष्ट्रीय पांवड्याचेर ते गाजल्यात. मात, मांद्र्यां जालो तो प्रकार चड भिरांकूळ. खाशेल्या तंबूंत, खोपींत वा रुमांत घुसून बलात्कार करपाचो यत्न करप, मागीर सुरो घेवन हल्लो करप हो प्रकार खूबच गंभीर म्हणपाचो. तो वेटर नशेंत आशिल्लो काय ताणें घुंवळे वखदां घेतिल्लीं, हाचो तपास पुलिसांनी केलाच आसतलो. पूण ‘गोवा सेफ नहीं’ ह्या वाक्याचेर (तें खरें काय अतिशयोक्ती, तें दरेकल्यान थारावचें.) हे घडणुकेन म्होर बसल्या. ही खबर राष्ट्रीय पांवड्याचेर पावल्या. नेमके नेदरलॅण्डाचे कांय कृशी विद्यार्थी सध्या गोंयांत आसात. ते चलयेन ही घडणूक घरा कळयल्याच आसतली. थंयच्या समाजमाध्यमांचेर ही खबर येतलीच. हाचो परिणाम गोंयच्या पर्यटनाचेर जातलो. एक घडणूक लोक विसरचे पयलीं दुसरी घडटा आनी गोंय परत परत बदनाम जाता. आतां उदक नाका मेरेन पावलां.
मुख्यमंत्री डाॅ. प्रमोद सावंत हांणी कामगार खात्याचें लेबर कार्ड आसले बगर हाचे मुखार कोणाकूच कामाक दवरचो न्हय, अशी शिटकावणी दर्यादेगां वयल्या हाॅटेलांक दिल्या. फक्त हाॅटेलांच न्हय, तर शॅक्स आनी हेर उद्देग करप्यांकूय हो नेम लागू जावपाचो आसा. कारण गुंड प्रवृत्तीचे लोक, गुन्यांवकार हांगा येवन नांव बदलून रावपाक शकतात, वेवसाय, नोकरी करपाक शकतात. भाड्याच्या घरांत रावपाक शकतात. हाचे पयलीं हें जालां, म्हणटकच कोणे लेबर कार्ड सक्तीचें केलां म्हूण वायट धरपाक जायना. कसलेंय काम करपाक संबंदीत तरणाटो हुशार आसलो म्हूण ताचे वृत्ती, प्रवृत्ती, सभावा कडेन आडनदर करून चलची ना. तशें पळोवंक गेल्यार कामार घेतिल्लो मनीस वागपाक कसो, ताचे ‘छंद’, व्यसना हाचे विशीं त्या आस्थापनांत काम करपी लोकांकूच न्हय, तर भायल्यांक पसून स म्हयन्यां भितर कळटा. पूण, चडशे म्हाका कित्याक पडलां तें, असो विचार करून सरळ आडनदर करतात. दर्यादेगाचेर कोण कितें करता, तें लिपून रावना. तेन्ना हाचे मुखार थंयच्या हाॅटेलां, शॅक्सां वा हेर वेवसायिकांनी सादूरपणान पावलां उखलचीं पडटलीं. विक्षिप्त, रागीट, व्यसनी, तोपीमास्टर, चालू व्यक्ती आसल्यार तिचेर बारीक नदर दवरपाक जाय. तिच्या वेव्हाराचो कामाचेर परिणाम जावचो ना, आस्थापन बदनाम जावचें ना, त्रासांत पडचें ना, हाचीय जतनाय घेवक जाय. तातूंत ती व्यक्ती गुन्यांवकारी प्रवृत्तीची आसल्यार मागीर मांद्रें सारकी घडणूक घडटा. देखून घरांत भाड्याक, आपल्या दुकानांत, हाॅटेलांत, कारखान्यांत कामाक दवरतना पुलिशेक, पंचायतींक, कामगार खात्याक कळोवंक जाय. ताची गुन्यांवकारी फाटभूंय तपासूंक जाय. सरकारान आतां परतून तसो आदेश दिला.
गोंयांत येवपी कामगारांनी कितें तरी विशिश्ट हेतू, सपन मनांत रंगोवन हांगां येवप चुकीचें. गोंयांत येवन वर्साक 7- 8 लाख तरी जोडटलों, रातदीस मौज- मजा करतलों, कितेंय आंगलट आयल्यार रेल्वेंतल्यान पळून वतलों, धरल्यार पयशे दिवन सुट्टलों… असो विचार करूनय गुन्यांवकार येतात आसतले. राज्यांत कितें चलता, ताचेर लोकांचें बारीक लक्ष आसता, पूण तांकां सोडात, जांणी कारवाय करूंक जाय, तांचे पसून हात बांदिल्ले वा फातरा पोंदां उरतात. देखून एका काळार दरेकल्याचे सुटयेची पयली पसंत आशिल्ली आमची दर्यावेळ आयज बदनाम जाल्या. बीच म्हणलो काय लोकांचे नदरे मुखार भलतेंच कितें येता आसतलें. सरकारान दर्यादेगां वयल्या कामगारां बाबतींत कडक पावलां उखल्ल्यांत, तीं यशस्वी जावचीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
