भांगरभूंय | प्रतिनिधी
गोंय सरकार बदलाची वाट चलतना वाटे वयलीं आडमेळीं अजूनय पयस जावंक नात. सरकारी धोरणां आड उलोवप, धरणें, आंदोलन करपाक फूस लावप आनी कितें तरी सादोवपाचो येत्न करप हें कांय विरोधकांच्या वावराचें अस्त्र. तातूंतल्यो काडयो काडपाच्या येत्नांतल्यान गरज थंय सरकाराचेर नदर दवरपाक विरोधी राजकी पक्षांतले लोकप्रतिनिधी विसरतात. तेन्ना सरकारा भितर लिपिल्ली विरोधांतली प्रवृत्ती तकली वयर काडटा. राज्य सरकार हे प्रवृत्तीक वळखता, मागीर तांचेर कारवाय करपाक कळाव कित्याक? 2022 वर्सा सत्तेर आयिल्ल्या सरकाराक एक वर्स पुराय जालां. मुख्यमंत्री डाॅ. प्रमोद सावंत ठाम निर्णय घेवपाक लागल्यात. विरोधी वांगड्यांकच न्हय जाल्यार सरकारांतल्या वांगड्यांकय मुख्यमंत्री घालतां तें दरेक पावल उस्तुऱ्यां वचपाची शक्यताय आसा. वर्सावळीचो नियाळ तांणी घेतला आसतलोच, कोणे कसो वावर केला ताची मोलावणी करून आतां भितल्ल्यांचेर तरसाद फिरोवन फुडें वचप म्हत्त्वाचें.
सरकाराक आत्र्या पयऱ्यान लजेक घालपी, वावरांत आडमेळ्यांची सांखळ बांदपी भागिदारांचेरय अळंग तरसादी फिरोवन तांकां कुशीक काडप आनी नव्यांक सुवात दिवन फु़डारा कडेन पळयल्यार गोंय जैतवंत जातलें.
2019 वर्सा आदले मुख्यमंत्री मनोहर पर्रीकार हांचे उत्तराधिकारी म्हणून सत्तेर येतकीच वर्सभर शिकपाक आनी उपरांत चुको सुदारून बदलांतल्यान विरोधी राजकी पक्षांक चेकमेट करपाचो वावर मुख्यमंत्र्यांनी केलो. विधानसभा वेंचणूक 2022 जिखपा खातीर 2021 वर्सभर सादूर रावन केल्ल्या वावरांतल्यान मार्ग दाखोवपाक मुख्यमंत्री जैतवंत जाले. पयलेच फावट दोन व्हड राजकी स्थित्यंतरां जाल्लीं समेस्तांनी पळयलीं. दुसऱ्या राजकी स्थित्यंतरांतल्यान राज्याक, राजकारणाक घटाय मेळटा अशें मुख्यमंत्र्यांनी हालीं घेतिल्ल्या निर्णयांतल्यान कळटा. मात त्याच निर्णयांआड सरकारांतले आमदारच न्हय मंत्री उलयतात, विशय उस्तून काडून शांत मनां पेटयतात हें मुख्यमंत्र्यांक होलमलां व्हय? मोपा विमानतळ जावचो न्हय, ताचे वेल्यान येरादारी जावची न्हय अशे निमणे मेरेन केल्ल्या येत्नांचे भकीक मुख्यमंत्री पडले नात. आडमेळ्यांआड झुजत तांणी मोपा विमानतळ तशेंच कांय प्रकल्प पूर्ण केल्यात. चवथी मेरेन तांच्या येत्नांक, लोकसभा वेंचणुकेंत उपाट येस मेळपाक जाय जाल्यार भितल्ल्यांचेर कारवाय करप गरजेचें. गोंयची शांतीकाय इबाडप्यांक, धोंशी घालप्यांक ख्यास्त भोगची पडटली अशेंय कळीत करचें. लोकूय सरकार कठोर जावपाची, नवे दिकेन वचपाची वाट पळयतात. गोंयांतल्यान केंद्र सरकाराक टॅक्सांतल्यान बरी येणावळ मेळ्ळ्या, पूण केंद्राचो वांटो गोंयांक फाव तसो कित्याक मेळूंक ना? गोंयचो पाखो घेवंक, केंद्रा मुखार मांडूंक सरकारांतले वांगडी, मंत्री फाटीं रावतात? आपल्याक जाय तेंच मेळोवन सुवार्था कडेन वतात? सोदल्यार मुख्यमंत्र्यांक जापो आपसूक मेळटल्यो. मंत्र्यां वांगडा प्रशासन लोकां मेरेन धाडपाक शंभर टक्के नासत पूण मात्शें येस मेळ्ळां, हें न्हयकारपाक जावचेना.
येरादारीची कोयंडी कित्याक जाता? अपघातांचेर नियंत्रण कित्याक ना? रस्ते सुळसुळीत जातना गाड्यांचो आंकडो वाडत आसा, चोरयां येरादारीय जाता तिका कोण जापसालदार आसा? येरादारी खात्यांत जाय तितलें मनीसबळ ना? तातूंतली यंत्रणा सदळ जाल्या? नाका थंय येरादारी पोलिस रावतात? येरादारीचे नेमावळीक पाळो न दिवपी खंयच्या रस्त्यां वेल्यान धांवतात? शिस्त मोडटल्यांचेर कारवाय करून येरादारी खातेंच हजारपटींनी गिरेस्त जालां? आदले येरादारी मंत्री सुदिन ढवळीकार हांकां विश्वासांत घेतल्यार बरें. गोंयची मानसिक सवस्तकाय अपघात, येरादारीचे कोयंडेतल्यान इबाडल्या हें मतींत दवरूनच सरकाराक तरसादी फिरोवच्योच पडटल्यो, जापसालदारकी निश्चित करचीच पडटली. श्री. ढवळीकार हे उत्कृश्ट येरादारीमंत्री आसले अशें न्हय, पूण अणभवांतल्यान, खातें चड तेंप तांचे कडेन उरिल्ल्यान येरादारींत सुसुत्रताय हाडप तांकां शक्य जाल्लें. रस्ते, पूल बांदले, आधुनिकता आयली म्हणून जावचे ना. रस्ते, पूल चड जातात तशें येवप वचप, नेमावळी कडेन आडनदर करपीय हजारांनी वाडटात हें पर्रीकार हांणी उगतेपणान मान्य केल्लें. येरादारी संचालनालय, पुलीस येरादारी विभागांतल्या अधिकाऱ्यां वांगडा बसका घेवन तांच्या वावराची लेखी म्हायती घेवची आनी तिच्या आदाराचेर सचिव पंगडा कडेन भासाभास करून अपघात आळाबंदा हाडपाक येवजण आंखची.
पणजे स्मार्ट जातना ती मोडची ना, बुडची ना हाचो हुस्को थळावे आमदार आतानासियो मोन्सेरात हांणी परगटायला. स्मार्ट सिटीच्या वावराक नेट दितनाच इतिहास, दायजाक धपको बसपाच्यो घडणुको घडटात. जाता तितलो सैम सांबाळपाचो कंत्राटदार कंपनी येत्नय करता आसत पूण तोडप, फोडप जालां तेंय रातयां मागीर दुबाव घेवपी कित्याक नासतले? पुर्तुगिजांच्या तेंपावेल्या सैमाचीं, इतिहासाचीं कुरु बावलीं रातयांच तक्त्यां वरवी जावचींच ना अशें न्हय. गोंय आपले राजवटी खाला घेतिल्ल्या पुर्तुगिजांचो इतिहास कितलो तेंप सरकारान आपल्या खर्चान सांबाळप हाचो निर्णय सरकाराक घेवचो पडटलो. 450- 500 वर्सांचे पणजेतलें पोरणें सचिवालय बरें स्थितींत आसा? ताची बांदावळ करची पडटली? थंय कितलें मनीसबळ येता- वता ? एकदां सचिवालयच न्हय जाल्यार पोरणो पाटो पूल आनी हेर दायजाचें आॅडिट करचें पडटलें. दायज सांबाळपा इतलेंच सचिवालयांत भितर भायर वचपी, येवप्यांचो फुडार म्हत्त्वाचो. नव्या तंत्रज्ञानातल्या बांदावळींतल्यान जावपी नव्यो वाटो, अटल सेतू हाचो वातावरणाचेर परिणाम जाला. वारें, ल्हारां, उदक नेटान व्हांवता, रस्ते सुळसुळीत जाल्ल्यान येरादारी वाडल्या आनी ताचें चेपण नव्या रस्त्यांचेर पडून ते चेंपतात. व्हडली मनीसहानी अजून जावंक नासली तरी अपघात जातात, बॅरिकेडस काडिल्ल्यान येरादारीची नेमावळ मोडपीय वाडल्यात, पूण तांचेर नदर दवरपी पोलिसच कांय मुखेल वाठारांनी ना.
इतिहास, सैमीक दायज पुस्तकांच्या रुपान सांबाळून दवरपाक सरकार मजत करपाक शकता. इतिहासीक वाटोय नवें रुप घेतात तेन्ना तक्टे आसपाची न्हय जाल्यार पुस्तकां, वेबसायटी वरवीं सत राखून दवरचें. सैमाचे नवनिर्मणे पासत शिंयाळ्या दिसांनी येत्न जावचे. पणजे म्हापालिकेचे पयलींचे आयुक्त संजित राॅड्रिग्ज हांकां स्मार्ट सिटीच्या वावराचो नियाळ करपाक लावचो. स्मार्ट सिटीची येवजण बांदपांत ते आसले, आदले येवजणेत बदल जाल्यात ते योग्य आसात? संजित हेच सारकी जाप दिवपाक शकतले. स्मार्ट पणजेक नखलामी करपी वावड्यो उठोवपीय आसचे नात, अशें न्हय, त्यो खऱ्यो, फट ताचो अभ्यास करपी यंत्रणा सरकारा कडेन आसा? वावड्यो उठोवपी भितल्लेय आसत, तांचेर तरसाद फिरत?
वर्सा भितर ल्हान व्हड प्रकल्प जाल्यात, प्रशासन लोकां मेरेन वचपाचेय येत्न जाल्यात, हेफुडेंय सरकारान सकारात्मकतेन फुडें वचचें. समेस्तांच्या भलायकेची, शिक्षणाची, रोजगाराची जापसालकी घेवची.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
