भांगरभूंय | प्रतिनिधी
भांगरभूंय । खबरां मेज
पणजीः केपेंच्या सरकारी कला, विज्ञान आनी वाणिज्य म्हाविद्यालयाच्या कोंकणी विभागान हालींच गोंयच्या लोकनाचांचेर आदारीत तीन दिसांची व्याख्यानमाळ घडोवन हाडली. खासा बी. ए. आनी एम. ए. कोंकणीच्या विद्यार्थ्यां खातीर आशिल्ले हे व्याख्यान माळेंतशिगमो – तालगडी, गोफ, तोणयांमेळ तशेंच धालो, फुगडी आनी चपय अशा गोंयच्या लोकनाचांचेर जाणकारांचीं व्याख्यानां जालीं.
व्याख्यान माळेंतलें पयलें व्याख्यान सोमार 13 मार्च ह्या दिसा ‘शिगमो आनी गोंयचे लोकनाच’ ह्या विशयाचेर जालें. लोकवेद अभ्यासक आनी पत्रकार देविदास गांवकार हे ह्या सत्राचे मार्गदर्शक आशिल्ले. ह्या व्याख्यानांत तांणी ‘शिगमो आनी शिगम्या वेळार नाचपी लोकनाच खास करून तालगडी, गोफ आनी तोणयांमेळ’ ह्या लोकनाचांचो इतिहास मांडटानाच, ह्या लोकनाचांत कशे तरेन बदल जाता हाचेर खोलायेन उजवाड घातलो. तशेंच शिगम्या वेळार वेगवेगळ्या वाठारांनी जावपी खेळ आनी तांची पारंपारीक फाटभूंय आनी विकास हांचेर भाश्य केलें. आयज शिगम्याच्या मांडार जावपी कांय पारंपारीक नाच वा खेळ बंद जावपाक लागल्यात हे विशीं तांणी हुसको उक्तायलो.
सोमार 20 मार्च 2023 ह्या दिसा ‘धालो आनी फुगडी’ ह्या लोकनाचांचेर लोकवेद संशोधिका डॉ. जयंती नायक हांचें व्याख्यान जालें. धालो आनी फुगडी ह्या उतराची व्युत्पत्ती तशेंच धालो आनी फुगडी हांचे भितरलें वेगळेपण स्पश्ट करतना धालांनी साबार नाट्यांचें रुपांतर एका ‘विधी’ रुपांत जाता जाल्यार फुगडी ही उमेद आनी उत्सव मनोवपा खातीर खेळटात अशें तांणी सांगलें. तशेंच आयच्या काळांत फुगडी नाचांत येवपी साबार प्रकारांची मांडणी आनी आदल्या काळार तयार जाल्ली नाचांची संकल्पना तांणी स्पश्ट
केली.
हे माळेंतलें तिसरें व्याख्यान मंगळार 21 मार्च ह्या दिसा चपय ह्या धनगर समाजांतल्या लोकनाचाचेर जालें. ह्या व्याख्यानाक धनगर समाज आनी ‘चपय’ नाचाचो अभ्यासक अलोक मोडक मार्गदर्शक म्हणून लाबिल्ले. तांणी आपल्या व्याख्यानांत धनगर समाजाचे जिणेचेर उजवाड घालतनाच चपयची पारंपारीकताय आनी फाटभूंय स्पश्ट केली. धनगरी भास, परंपरा आनी लोकनाच हांचेर संशोधन करपाची गरज आसा अशें तांणी सांगलें.
कोंकणी विभागाचे मुखेली प्रो. डॉ. राजय पवार हांणी व्याख्यान माळेच्या तिनूय व्याख्यानांच्या मार्गदर्शकांक येवकार दितनाच कार्यावळीचें प्रस्तावीक केलें. हे व्याख्यानमाळेचें पुराय संयोजन प्रा. शमिका बाळ्ळीकार हांणी केलें. हे व्याख्यान माळेक कोंकणी विभागाचे शिकोवपी प्रा. सुशांत नायक, डॉ. राखी आमोणकार, प्रा. ॲडना वाझ फर्नांडीस, प्रा. पराज सातोर्डेकार, प्रा. आशा गांवकार, तशेंच इंग्लीश विभागाच्यो शिकोवपी डॉ. तन्वी बांबोळकार, प्रा. गौरवी खंवटे, प्रा. शर्वरी प्रभुदेसाय हाजीर आशिल्लीं. व्याख्यानमाळेच्या तिनूय सत्रांचें सुत्रसंचालन आनी उपकाराचें उलोवप रिमी वाझ, मेल्विटा फर्नांडीस, प्रिन्सी डिकोस्ता आनी स्नेहा सबनीस ह्या कोंकणी विद्यार्थ्यांनी केलें.
लोकवेद संशोधनाचो वावर जावचो
लोकसंस्कृतीचो अभ्यास करतना लोकवेदाच्या साबार प्रकारांचो संशोधनात्मक वावर जालो जाल्यार आयचे पिळगेक आमचे लोक संस्कृतायेचो खरेलो दिश्टावो जातलो. ते खातीर दर म्हाविद्यालयांनी लोकवेदा कडेन संबंदीत व्याख्यानांचें आयोजन करप म्हत्वाचें असो सूर केपें म्हाविद्यालयाच्या कोंकणी विभागान घडोवन हाडिल्ले व्याख्यानमाळेंत व्यक्त जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
