भांगरभूंय | प्रतिनिधी
गोंयच्यो शेतजमनी हाचे मुखार विकपाक मेळच्यो नात. खास करून परप्रांतांतल्या बिगर शेतकारांक. हालींच गोंय कृशी हस्तांतर निर्बंध विधेयकाक गोंय मंत्रिमंडळान मंजुरी दिली. ह्या विधानसभा अधिवेशनांत हें विधेयक मांडटले. हो तोखणाय करी सारको निर्णय. कारण राज्यांत शेतां, भाटां खातीर जे वाठार गाजताले, ते आतां काँक्रिटाचीं रानां जाल्यात. 25 – 30 वर्सां पयलीं जंय – जंय शेतां, भाटां, पोरसां आशिल्लीं त्या जाग्यांचेर मुजरत वचून पळोवचें. थंय इमारती दिसतल्यो. तातूंत रावतात कोण तर चडशे भायले. दक्षीण गोंयांतले कांय आंदोलक मेळटा त्या मेगा प्रकल्पाक विरोध करतात, ताचे फाटल्यान हेंय एक कारण आसा. शेतांतलें पीक ना जातलेंच, वयल्यान भायल्यांचें गांवाचेर आक्रमण जातलें, ते आमचे मदीं मेळून- मिसळून वागचे नात अशें तांकां दिसता.
गोंयांत जमनीं, घरां विकपाचे प्रकार तशे खूब वाडल्यात. ताका जापसालदार कोण? सगळेच. गोंयांत म्हारगाय वाडल्या, राहणीमान उंचेलें, तातूंत आमच्यो गरजो खूब. दुडू मोडपाक आमी कुबेराक पसून फाटीं उडयतले….. मागीर आलायतो पयसो खंयच्यान हाडटले? जमनी विकप सोंपें. सोमतेच हातांत कोटी येतात. ताकाच लागून पडंग शेतांच न्हय, तर लागवडे खालचीं शेतां, भाटां लोकांनी विकल्यांत. दोंगरुय विकपाचे प्रकार जातात. ते नदरेनूय सरकारान निर्बंध घालपाचो वेळ आयला. सैम हो गोंयचो युएसपी, हें विसरूंक फावना.
सध्या गोंयांत सादारण 40 हजार हॅक्टर शेतजमीन आसा, मात फक्त 28 हजार हॅक्टरांत उत्पन्न घेतात. पीक उणें पिकलें, पिकलें ना जाल्यार शेतकारांक लुकसाण जाता. जमीन विकपाचें चेपणूय तांचेर एकेकदां येता. सर्वसामान्य मनीस जमीन माफियां कडेन दोन हात करपाक शकना. ते बरो पयसोय दिवपाक तयार आसतात…. उपरांत रुपांतर आनी विक्री. कांय जमनी खरेंच पडंग आसतात. तांचो शेतकारांक फायदो नासता. म्हणटकच त्यो विकतकच शेतकार अर्थीक नदरेन थीर जाता….. मेळत थंय इमारती उब्यो रावप म्हणचे कोयर, वीज, उदकाच्या सुविधांचेर वजें पडप, हाचो समाज आनी सरकारान विचार केल्यार बरो.
कोरोना काळांत तरणाट्यांननी घरच्या शेतांत, पोरसांत, भाटां- कुळागरांत देवन सैममायेक होरोवपाचो यत्न केलो. कांय जाणांचेर ती प्रसन्नूय जाली. मात, कोरोना उपरांत मातयेंत पांय, हात घाल्ले सगलेच थंय तिगले नात. नोकरी, वेवसाय परतून सुरू जालो. आयज पिळग्यान पिळग्यो भाजी, फळां पिकोवपी, विकपी घराबे उणे जाल्यात. शिक्षणाक लागून भोवतेकांच्या फुडल्या पिळग्यांनी दुसरो मार्ग आपणायल्या. हातूंत तांकां दोश दिवपाक मेळचो ना. तरीय जे कोण ह्या मळाचेर कश्ट करतात, तांकां सगले तरेची उर्बा दिवप गरजेचें. कृशी खातें ती दिताय. सरकार- प्रशासन तुमच्या दारांत सारके उपक्रम सरकारी यंत्रणेन चड नेटान चालीक लायल्यार नवी तरणाटी पिळगी शेतकी मळा कडेन आकर्शित जावं येता. मुख्य म्हणजे, हातूंत पयसो कितलो आसा, हें मुखार येवंक जाय. कारण कांय आडवाद सोडल्यार, बरेच वेवसायिक, धंदेकार पयसो मेळना म्हूण पिरंगत आसतात…. आनी कांय वर्सां भितर बंगले, जमनी, फार्म हावसां घेत आसतात. शेतकी करियराकूय ग्लॅमर, प्रतिश्ठा येवपाक जाय. महाराष्ट्र, कर्नाटका सारक्या राज्यांतल्या शेतकार चल्याक सोयरिको येवपाक आडमेळीं येतात. हाचे वयल्यान कितें तें समजूचें.
शेतकी जमीन विकपा आड विधेयक हाडपा फाटलें आनीक एक कारण म्हणल्यार भाताच्या लागवडी खाला आशिल्ल्या जमनींचें विकप. कारण शेतांत घाम गळोवपी गोंयकार आतां थोडेच उरल्यात. भायले मानायूय मेळनात. मेळ्ळ्यार दिसवडो परवडना. भाताचे लागवडीक पोशक आशिल्ल्यो ह्यो जमनी एकदां विकल्यो काय फळां, फुलां, भाजयां प्रमाण आमकां भाता खातीरुय शेजारी राज्यांचेर अवलंबून रावचें पडटलें. गोंयांत आपल्या कुटुंबाक वर्सभर पुरो इतलें भात पिकोवपी शेतकार आसात. आतां भात पिकोवपाची तयारी ना, जाल्यार त्या शेतकारांक हेर पिकां कडेन (मानस सोडून) वळोवपाचे यत्न जाल्यार बरे.
दोन वर्सां पयलीं मुख्यमंत्री सावंत हांणी आत्मनिर्भर भारत- स्वयंपूर्ण गोंय मोहीम सुरू केल्ली. फक्त शेतांतूच न्हय, तर पडीक जमीन कसोवन थंय पीक घेवचें आनी गोंय, गोंयकार कांय प्रमाणांत तरी स्वावलंबी जावचे, हो हेतू आशिल्लो. पूण जमनींच तिगल्यो नात, तर गोंय स्वयंपूर्ण जातलें कशें? होय विचार शेतांचे विक्री बंदी फाटल्यान आसा. तो चुकीचो म्हणू येना. जमनी विकप बंद जालें ना जाल्यार एक दीस पुराय गोंय पावणेर वचपाक शकता!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
