भांगरभूंय | प्रतिनिधी
चालकाक हुलपून मरण; तीन मोटारींकूय लागलो उजो
भांगरभूंय । प्रतिनिधी
पणजी: टोंक करंझाळे रायकार नर्सींग होमा कुशीक काल (बिरेस्तारा) फांतोडेर जाल्ल्या भिरांकूळ अपघातांत सुजय सुर्लकार (33, रा. ठाणें, मुंबय) हाका लासून जाग्यारूच मरण आयलें. ताचे मोटारी सयत हेर तीन मोटारींकूय उजो लागलो. तातूंत मोटारीचें लुकसाण जालां. ह्या प्रकरणांत पणजी पुलिसांनी अपघाती उज्याची दुर्घटणा म्हूण नोंद करून तपास सुरू केला.
ह्या प्रकरणांत पुलिसांनी मुळावी चवकशी केली तेन्ना, चालक सुजय सुर्लकर हाचो मोटारी वयलो ताबो सुटिल्ल्यान ताणें थंय पार्क केल्ले मोटारींक धपको दिलो. नेटाच्या धपक्यान मोटारीक भिरांकूळ उजो लागलो. हातूंत मोटार चालकाक होरळून मरण आयलें. तशेंच होंडा सिटी मोटारी सयत हेर दोन स्विफ्ट आनी एक सॅन्टो मेळून चार मोटारींक उजो लागलो. ह्या प्रकरणांत पणजीचे पुलीस निरिक्षक निखील पालयेंकार हांच्या मार्गदर्शना खाला पुलीस उपनिरिक्षक मयूर पणशीकार हांणी अपघाताची नोंद करून फुडलो तपास सुरू केला.
उजो पालोवपी दळान दिल्ले म्हायती प्रमाण, बिरेस्तारा फांतोडेर 4.10 वरांचेर टोंक करंझाळे रायकार नर्सींग होमा कुशीक मोटारीक उजो लागिल्ल्याची म्हायती उजो पालोवपी दळाच्या नियंत्रण कक्षाक मेळ्ळी. ही म्हायती कक्षान पणजी उजो पालोवपी स्टेशनाक दिली.
ते प्रमाण पणजी उजो पालोवपी दळाचे स्टेशन फायर ऑफिसर रुपेश सावंत हांच्या मार्गदर्शना खाला जवानांनी ताकतिकेन घडणूक थळार धांव घेतली.
थंय दळाचे जवान पावतकूच तीन-चार मोटारींक उजो लागिल्ल्याचें तांकां दिसून आयलें. उज्याचें उग्र रूप लक्षांत घेवन आनीक एक बंब मागयलो. दोनूय बंबाचे मजतीन उज्याचेर नियंत्रण मेळोवपाक तांकां येस आयलें. फुडलो तपास पुलीस करतात.
फांतोड्डे वेळार घडलो अपघात
मोटारींक लागिल्लो उजो आटापांत आयले उपरांत एके मोटारींत चालक सिटार कोणतरी आशिल्ल्याचें उजो पालोवपी दळाच्या जवानांच्या लक्षांत आयलें. तांणी पुलिसांक म्हायती दिली. पणजी पुलिसांनी घडणूक थळार धांव घेवन पंचनामो केलो. मोटार चालक सुजय सुर्लकार हाका लासून जाग्यारूच मरण आयिल्ल्याचें दिसून आयलें. पुलिसांनी ताची कूड ताब्यांत घेवन फुडले प्रक्रिये खातीर बांबोळे गोंय वैजकी म्हाविद्यालय हॉस्पिटलाच्या मड्या कुडींत धाडून दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.