भांगरभूंय | प्रतिनिधी
कुशळटाय उदरगत, स्वयंपूर्णताय अर्थसंकल्पाच्या केंद्रस्थानाचेर आसतली, अशें मुख्यमंत्री डाॅ. प्रमोद सावंत हांणी सांगलां. शिक्षण, भलायकी, नितळसाण, आदिवासी कल्याणाचेरुय भर दितले. स्वयंपूर्ण गोंय येवजणे खाला सरकारान साबार कामां चालीक लायल्यांत, ‘स्वयंपूर्ण मित्र’ गांव पांवड्याचेर बरें काम करतात. तांणी सरकारी येवजण्यांची म्हायती तळागाळा मेरेन पावयली जाल्यार गोंयकारांक ताचो फायदोच जातलो. आयज सरकारी येवजण्यांचो लाव घेवन कश्ट करपी, स्वताच्या पांयांचेर उबे रावपी बरेच गोंयकार, परप्रांतीय हांगा आसात. मात, कोणेंच सवलत, अनुदान मेळटा, त्याच येवजण्यां कडेन पळोवचें न्हय. बरेच फावटी सरकारा कडल्यान कितें तरी सुट्टलें, होच हेतू मनांत दवरून भोवतेक लोक पावलां मुखार उडयतात. मागीर त्यो सामाजीक येवजण्यो जांव वा धर्मीक. सरकार लोकांच्या करांतल्यान जमयिल्लो पयसो कांय वेंचिक लोकांचेर मोडटा. अर्थांत गरीब, गरजू, निराधार लोक आसल्यार समजूं येता. प्रधानमंत्री नरेंद्र मोदी हांणी हालींच हे फुकटे संस्कृतायेचो उल्लेख ‘रेवडी’ असो केल्लो. ‘मेजा वयलें केळें दिवन इश्टागत जोडपा’ सारकोच हो प्रकार. ताचे परस सरकारान सगल्या लोकांक उण्या कळंतरान (व्याज) रिणां दिल्यार तांकां घाम गळोवपाची संवय लागतली. ‘रेवडी’ मेळटली म्हूण आशेन रावपी वा ती मेळिल्ले काळ वता तशे- तशे आळशी, लाचार जातात आनी रेवड्यो मेळप बंद जाल्यो काय सरकाराकूच वायट उतरां दितात.
कुशळटाय म्हणल्यार आंगांतले बरे कलागुण. शिकूनय ते मेळोवं येतात. पारंपरीक वेवसायांत ही कुशळटाय चड करून दिश्टी पडटा. मात, गोंयकारांचो आंकडो उणो जाल्ल्यान आनी शिक्षणाच्या प्रसाराक लागून गोंयकारांनी हे वेवसाय सोडल्यात. अर्थीक कारणां खातीर तांकां ते आयज करपाची गरजूच ना. साहजिकूच ते वेवसाय परप्रांतीयांच्या ताब्यांत गेल्यात वा बंद तरी जाल्यात. केस कापप, मेस्तपण, गंवडेंपण, टायल्स बसोवप हे वेवसाय आयज कितले गोंयकार करतात, तें पळोवचें पडटलें. आतां पाडेली पसून उत्तर प्रदेशांतले दिसतात. पारंपरिक वेवसायाक आधारभूत मोल दिवचें काय ना, हो प्रस्न कुशीक दवरून हे वेवसाय परत फुलतले, फळटले हे खातीर उपाय घेवप शक्य ना?? पिळग्यान पिळग्यो हातूंत आसपी कुटुंबां वांगडाच नव्या लोकांनी ह्या पारंपरीक वेवसाय, धंद्यांक माथें मारल्यार जग बुडचें ना. कोरोना काळांत पोदेर, खाजेंकार, चणेंकार हांकां अर्थीक मजत दिवपाची घोशणा जाल्ली. हे वेवसाय नेटान उबे रावपाक ताची कितली मजत जाली, तें सगल्यांक कळ्ळ्यार बरें. गोंयची वळख आशिल्ल्यो भाजयो, फळां जे तरेन ना जायत चल्ल्यांत तशीच हावळ पारंपरिक वेवसायाचेर आयल्या वा हाचे मुखार उरिल्ल्या सुरिल्ल्या धंद्यांचेर येतली! ते खातीर सवलतीं बदला तांकां संजिवनी दिवपाचेर लक्ष केंद्रीत जावचें.
गोंयांत गुन्यांव, गैरकारभार वाडल्यात. कांय सुवार्थ्यांक फक्त आनी फक्त पयशेच दिसतात. हातूंत फक्त परप्रांतीयूच न्हय, तर गोंयकारुय दिसतात. पंचतंत्रांतलो कोलो बैलाच्या फाटल्यान आशेन भोंवता, पूण ताका बाबड्याक दिसता तें खांवपाक मेळना. हे सुवार्थी मात फुडारी, अधिकाऱ्यां फाटल्यान भोंवून आपलें सादोवन घेतना दिसतात. सध्या रानांनी उजो लागपाचे प्रकार वाडल्यात. हो खरेंच वाडिल्ल्या तापमानाचो परिणाम, काय आनीक कितें, तें बेगीन सोदून काडचें पडटलें. सरकार हे बाबतींत कडक आसा, अशें सध्या तरी दिसता. घुंवळे वखदां विकतना अक्षरशा दिसाक एकलो तरी सांपडटा. हालींच तृतीयपंथी प्रकरण भायर सरलें, जमनी हातासपाचो प्रकार घडलो, दोंगर बोडकावप….. हाका लागून गोंय बदनाम जावपाक लागलां. पर्यटनाचेर हाचो परिणाम जाता. अपघातां आडूय आतां कितें तरी करचें पडटलें. अवजड वाहनांक लागून कोंयडी जाता, ती केन्ना सोंपतली? कोयराच्यो राशीय वाडत चल्ल्यात. अर्थसंकल्पांत लोकांचेर टॅक्साच्या रुपान आनीक वजें घालचो ना, अशें मुख्यमंत्री सावंत हांणी जाहीर केलां. बरी गजाल. पूण वाडिल्ली म्हारगाय उणी करपाचेर भर दिवप सामकें गरजेचें. गोंयांत पयलींच सगलें म्हारग, तातूंत हो म्हारगायेचो शिगमो! सर्वसामान्य गोंयकारांक दिसपट्टी जीण जगतना थाकाय मेळटली, असो हो अर्थसंकल्प आसतलो, अशी अपेक्षा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
