भांगरभूंय | प्रतिनिधी
सोशल मिडियाचेर ‘भांगरभूंय’ न हालींच तृतीयपंथींच्या प्रकरणाक वाचा फोडली. गोंयच्यो दर्यावेळो ‘गुन्यांव केंद्रां’
जाल्यांत, हें अधोरेखीत करपी हो व्हिडियो. बुधवारा दनपरां मेरेन 212 नेटिझन्सांनी तो शॅर केल्लो. मूळ व्हिडियो आतां मेरेन 93,654 लोकांनी पळयला. शॅर जायत गेल्ल्यान संवसारभर तो पावला. पुलीस यंत्रणेन व्हिडियोची रोखडीच दखल घेतली, हे विशेश. आतां ते मुखार कितें करतात, ताचे कडेन गोंयकारांचें लक्ष आसतलें. हो ‘भांगरभूंय इफेक्ट’ कितलो असरदार थारता, हाचेर गोंयच्या दर्यादेगांचो फुडार निंबून आसतलो, अशें म्हणल्यार अतिताय थारची न्हय.
तृतीयपंथी समाज संवसाराचे फाटीर सगल्याक आसा. तांचे विशीं साबार गैरसमज पातळ्ळ्यात. कांय तृतीयपंथींनी उच्च शिक्षण घेतलां आनी ते प्राध्यापक, वकील, प्राचार्य, समाजसेवक म्हूण काम करतात. 2014 त सर्वोच्च न्यायालयान तांकां समान हक्क, कायदेशीर दर्जो दिला. तांकां लग्न जावपाचो, मालमत्तेंत हक्क दिला. नोकरेंत, शिक्षणांक आरक्षण दिलां. देशांत सादारण 20 लाख तृतीयपंथी आसात. मात, भारतीय समाज तांकां तीं ल्हान आसतनाच भेदभावाची वागणूक दिता. आजून तांकां उरिल्ल्या भारतीयांनी पुरायपणान स्वीकारुंक नात.
तृतीयपंथी म्हणटकच लोकांच्या दोळ्यां मुखार टाळयो वाजयत फोर्सान भीक मागपी साडी नेशिल्लो दादलो येता. रेल्वे वा घराघरांनी भोवून ते पयशे मागतात. मात कांय (सगलेच न्हय) तृतीयपंथी सेक्स रॅकेट चलयतात, घुंवळे वखदांच्या वेव्हारांतूय ते आसात, हें न्हयकारपाक जावचें ना. गुन्यांवकारी विश्वांत खोल मेरेन ते रिगल्यात. ‘भांगरभूंय’न सोशल मिडिया वरवीं जो प्रकार उक्ताडार हाडलो, तातूंतल्यान हें सगल्यांक दिसलें. समाजसेवक शिवा मोरे हांणीय हे खातीर कश्ट घेतले, धोको पत्करलो. ह्या प्रकरणाची फाटपुरवण केली. खुद्द कांय तृतीयपंथीयांनीच हे गैरप्रकार कॅमेऱ्या सामकार सांगलें.
तांणी सांगिल्ले म्हायती प्रमाण, ह्या रॅकेटांत आशिल्ले चडशे अस्तंत बंगालांतले. ते वेगवेगळ्या जाग्यांचेर रावतात. गोंयांत तांचे कांय सुत्रधार आसात. तातूंतलो एक बाॅबी खान. आमकां तो सेक्स रॅकेटाचो भाग जावपाक सांगता. आमी ना म्हणीत जाल्यार मारपेट करता. धमक्यो दिता. दर म्हयन्याक 30 हजार रुपया हाडून दिना जाल्यार सतायता. आमी आतां डान्सबार्रांत नाच करतात. सेक्स रॅकेटाचो वांटो जावपाची आमची इत्सा ना. आमकां मानान जगूंक जाय. सरकारान आमची दखल घेवची. आमी पुलिशेंत कागाळ केल्या. कळंगूट, मिरामार आनी हेर दर्या वेळांचेर दादल्यांक साडयो न्हेसोवन तांचे कडल्यान गैरप्रकार करून घेवपा फाटल्यान हें कळंगूटचें रॅकेट आसा. तें घुंवळे वखदांच्या धंद्यांतूय आसा, पर्वरे फ्लॅटाचेर येवन तांणी आमची गाडी फोडली, घराचीं जनेलां फोडलीं…. अशे बरेच गंभीर आरोप ह्या तृतीयपंथीयांनी कॅमेऱ्या मुखार केले. पुलीस यंत्रणा रोखडीच सक्रीय जाली. बाॅबी आनी हेर तिगांक ताब्यांत घेवन तांची चवकशी केली. आतां पुलीस अधिकारी निधीन वाल्सन ह्या पुराय प्रकरणाची खोलायेन चवकशी करपाचे आसात. तांणी आतां मेरेन लिपिल्लें हें विश्व बेगीन उक्ताडार हाडचें.
तृतीयपंथीयांनी जे आरोप केल्यात, ते खरे मानले जाल्यार गोंय हें गुन्यांवाचो अड्डो जालां, अशेंच म्हणचें पडटलें. शिवा मोरे वांगडाच तृतीयपंथीयांनीय ‘भांगरभूंय’ कडेन गौप्यस्फोट करूंक नाशिल्लो जाल्यार हें अशेंच चलपाचें. (न्हय चलतालें. दोळ्यां आड मसंड पाड म्हणटात तशें) पर्यटनाचे नदरेन गोंय बदनाम जालां, ताका हो तृतीयपंथीयांचो कारभारुय जापसालदार आसा, हें कोणाकूच न्हयकारपाक मेळचें ना. सेक्स रॅकेट, ड्रग्स हें गोंयाक विनाशाचे दिकेन व्हरतलें, तेन्ना आमी बेगीनूच जागें जावपाची गरज आसा. कोण कागाळ करतलो, मागीर आमी कारवाय करतले, हाची वाट पळयनासतना पुलिसांनी वावुरुंक जाय.
कळंगुटे डान्स बार चलतात. ते कायदेशीर काय बेकायदेशीर ताचीय चवकशी पुलिसांनी करची. कारण फाटीं ह्या डान्सबार्रांक विरोध जातालो. मागीर अचकीत तो थांबलो. राजकी सोयी प्रमाण गुन्यांवांक विरोध, मागीर समर्थन अशें जावंक फावना. चूक ती चूक. गुन्यांव तो गुन्यांव. राज्याच्या गृह खात्यान ह्या एकूणच प्रकरणांत लक्ष घाल्यार बरें. ‘भांगरभूंय’ न हो प्रकार जगा सामकार हाडला, आतां सरकारी यंत्रणा नेमकें कितें करता, तें पळोवया.
खास प्रतिनिधी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
