भांगरभूंय | प्रतिनिधी
कोडियाळ जाली ‘कोंकणी शिक्षण शास्त्र आनी आधुनीक तंत्रज्ञान’ विशयाचेर चर्चा
पणजी: कोडियाळच्या विश्व कोंकणी केंद्रांत जाल्ल्या ‘कोंकणी शिक्षण शास्त्र आनी आधुनीक तंत्रज्ञान’ ह्या विशयाचेर जाल्ले चर्चेंत मंगळूर आनी गोंयच्या कोंकणी शिक्षण तज्ञानी ‘कोंकणी शिक्षणाचो फुडार खूब बरो आसा’ असो विस्वास उक्तायलो.
ह्या वेळार डॉ. कस्तुरी मोहन पै हांणी सांगलें, गोंय सोडून आयिल्ल्याक 400 वर्सां जावन लेगीत कर्नाटकाच्या कोंकणी लोकांनी घरांत कोंकणी भास उलोवन ती जिवी दवरल्या. आतां 15 वर्सां जालीं शाळेंत कोंकणी शिक्षण चालीक लागलां. आतां मेरेन 4200 विद्यार्थ्यांक कोंकणींतल्यान साक्षर केल्यात, 14 शाळेंत 12 शिक्षिका कोंकणी भास देवनागरी लिपयेंत 6 -10वेच्या वर्गांक तिसरी भास म्हणून शिकयतात. फाटल्या धा वर्सां सावन SSLC परिक्षेंत 100 टक्के निकाल आयला. हाका राज्य सरकाराची मान्यताय, गोंय सरकाराचें शिक्षण विभाग आनी विश्व कोंकणी केंद्राचें अर्थीक बळ आसा. आतां मेरेन सांप्रदायीक पाठ्य पुस्तकां आनी मौखीक शिक्षण चालीक लागलां. डिजिटल माध्यम लेगीत बेगीन सुरू जातलें अशें आयकलां, अशें मत ताणें मांडलें.
डॉ. देवदास पै हांणी, कर्नाटकांत पियुसी स्नातक पावंड्यार कोंकणी शिक्षण एकेच कॉलेजींत आसा. जाल्यार मंगळुरू विद्यापिठांत एम. ए. कोंकणी सुरू करून 8 वर्सां जालीं. विद्यापीठ पांवड्यार दुसर्या भाशांक आसा त्यो सवलती कोंकणीकय लागू केल्यात. अंदूं संगीत विशय सुरू केला. गोंय विद्यापीठाच्या सांगाताक मेळून लिखीत कोंकणीचें प्रमाणीकरण जायत आयलां. कोंकणीचो फुडार बरो आसा अशें ताणें म्हणलें.
स्नेहा सबनीस (कोंकणी राजभास संचालनालय, गोंय) हांणी सांगलें, गोंयांत कोंकणींतल्यान के.जी. सावन, मुळाव्या आनी प्रौढ शिक्षण, स्नातक, स्नातकोत्तर, पी.एच.डी मेरेन शिक्षण मेळटा. वेगवेगळीं पाठ्य पुस्तकां आसात. पूण आयज कोंकणींत डिजिटल मजकूर तयार करपाची चड गरज आसा. भुरग्यांक अंतरराष्ट्रीय भास शिकपाक टी. वी.चो उपेग करून घेवंक जाय. एनिमेशन, तशेंच हेर सहायक शिक्षण गरजेचें आसा. बहुभाशीक शिक्षणाची मजत घेतल्यार कोंकणी शिकोवपाक सोपें जातलें. Technology and digital contents आयची गरज. ल्हान भुरग्यांक कोंकणींतल्यान सुशिक्षीत करूंक तांकां तांचे माय भाशेंत आशिल्ल्या वेगवेगळ्या शब्दांची वळख चित्रणा (visual forms) वरवीं टी.वीचेर दाखोवन करची. जाल्यारूच भुरगीं मायभास बेगीन शिकतलीं. गोंय कोंकणी भाशा मंडळान ह्या कार्यांत खूब वावर केला. यु ट्यूबाचेर खूब तांचे audio-visual आसात. तांचो कोणेंय उपेग करूं येता.
सत्राचे मुखेल संचालक दामोदर घाणेकार हांणी कार्यावळीक हाजीर आशिल्ल्यांच्या प्रस्नांक जाप दिली. गोंय आनी कर्नाटक राज्यां मदीं कोंकणी शिक्षणाक बरो संबंध जोडून फुडें व्हेल्यार कोंकणी शिक्षणाक बरो फुडार आसा अशें समारोप सत्रांत तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
