भांगरभूंय | प्रतिनिधी
हमारे इलाके में अगर परिंदा भी उड़ता है तो हमारी इजाज़त से और जो बग़ैर इजाज़त के उड़ता है वो मारा जाता है…… राजकुमाराचो डायलाॅग, तिरंगा सिनेमांतलो. फाटलें दोन दीस रेव्होल्युशनरी गोवन्स (आरजी) पक्षाचे बाबतींत जें कितें जालां, तें आयकून थोड्यांक हो डायलाॅग याद जाला आसतलो. म्हादयचें उदक वळोवपाच्या कर्नाटकाच्या निर्णया आड जनजागृताय पदयात्रा काडपाचो निर्णय आरजीन घेतलो आनी सत्तरींतल्यान ती सुरूय केली. मात कायदो आनी सुवेवस्था इबाडटली म्हूण सत्तरी म्हालांतल्या सगल्या पंचायतींनी आनी नगरपालिकेन तिका विरोध केला. सोमारा ठाण्यां आनी उपरांत कोपाड्ड्यां पुलिसांनी ही यात्रा आडयली. मंगळारा दनपरां चर्चा करून हो प्रस्न सोडोवया, अशें यात्रेकरूंक सरकारी यंत्रणेन सांगलें आनी काल बुधवारा निर्णय आयलो, तो 144 कलम लागू करपाचो. आंदोलक एकठांय आयल्यार आतां कलमाचो भंग जातलो. म्हणटकच यात्रा कांय दीस मुखार धुकलची पडली. ते वटेन आरजीचे फुडारी म्हणटात, आमी कायदेशीर सल्लो घेतात. पूण पदयात्रा काडटलेच!!! काडटले. सत्तरींतले फुडारी म्हणटात, पालिकेन आनी पंचायतींनी कर्नाटका आड थाराव घेवन विरोध केला. आमी जागृतच आसात, हांचे कडल्यान जागृत जावपाची गरज ना. हे पदयात्रेक लागून सत्तरींतली कायदो सुवेवस्था इबाडटली, अशेंय तांकां दिसता.
वास्तविक पदयात्रा काडपाक कायदो परवानगी दिता. महात्मा गांधीजींनी साबार पदयात्रा काडल्यो. लोकां मदीं स्वतंत्रताये विशीं जागृताय केली. पदयात्रेच्या माध्यमांतल्यान कायदे मोडले, सरकारा आड बंडूय केलें. फक्त अहिंसक पदयात्रेच्या बळग्यार तांणी ब्रिटिशांक हालयले. कायदे बदलूंक लायले. अन्याय पयस केलो. आरजीकूय ह्या इतिहासा पसून स्फूर्त घेवन तशें कितें करचेंशें दिसलें जाल्यार तातूंत इतलें अस्वस्थ जावपा सारकें कांय नाशिल्लें? आतां 144 कलम, पुलीस, कोर्ट, दोगांयच्या मनांत खदखदपी तिडक…. हाचो स्फोट जायना जाल्यार पुरो. कारण कर्नाटका आडचें हें आंदोलन जितलें शांततायेन जाता, तितलें गोंया खातीर बरें. पदयात्रेक भिवपाची गरज नाशिल्ली. हांगा आतां ब्रिटीश, पुर्तुगेज नात आनी महात्मा गांधीजीय वचून 75 वर्सां जालीं. (तरीय कांय जाण तांचें नांव कानार पडटकच कच्च करून आंग काडटात, ती गजाल सोडात!) आरजीचे वावुरपी वा हेर कोणूय कायदो हातांत घेवपाची भिरांत दिसताली, जाल्यार कडक पुलीस बंदोबस्त दवरपाचो. सत्तरी म्हालांतल्या भोवतेक फुडाऱ्यांचें आपल्या मतदारांचेर पुराय वर्चस्व आसा. सगल्या स्वराज्य संस्थांनी पदयात्रेक विरोध केला ताचे वयल्यान हें सिद्धूय जाता. विरोधकांच्या मतांची बेरीज केल्यार पसून जिखिल्ल्या उमेदवारा इतली ती जावची ना. तातूंत आरजी हो नवो पक्ष. तांचो एकूच आमदार. तरीय पदयात्रेक खर विरोध जालो, हाचे फाटलें कारण अजून तरी उक्तडार येवंक ना.
म्हादयमायंक वाटावपाक साबार गोंयकार आंदोलन करतात. बरी गजाल. तांणी आपलें लक्ष आनी लक्ष्य फक्त म्हादयचेर दवरपाक जाय. म्हादय, म्हादय आनी म्हादय!! आपले राजकी अजेंडा मदीं घुसोवचे न्हय. विरोधक मोर्चा काडटा जाल्यार तो अपेशी कसो जातलो, सभा घेता जाल्यार तिका लोक कशे वच्चे नात हाचेरूच लक्ष दित जाल्यार म्हादय केन्ना हुबारून व्हेली, तें आमकां कळचें पसून ना. फाटीं सांखळे म्हादय प्रस्नाचेर सभा जाली, तिची परवानगी ऐनवेळार रद्द करपाचो प्रकार घडलो. तरीय ती जालीच. सभेच्या दोन दीस पयलीं घराघरांनी वचून सभेक वचूं नाकात, अशें कांयजाण सांगताले खंय अशी काणी सांखळेकार सांगतात. ती खरी काय दंतकथा, तें सांगप्यांक आनी आयकुप्यांक चड बरें खबर आसतलें. म्हादयचेर सभा जातात, तेन्ना विरोधक म्हादय सोडून भलतेच कडेन व्हांवतात. वळयनासतना उदक वळपा सारको हो प्रकार! ही म्हादय जागृती काय सरकार विरोधी मोहीम तेंच मागीर कळना. आतां आरजीची पदयात्रा (शिमग्या पयलीं तीं पूर्ण जावूं.) फक्त म्हादय नदरे मुखार दवरून काडल्या काय तांचो कितें राजकी, पक्षीय हेतू आसा, तें दिसतलेंच. यात्रा आडोवपा फाटल्यान सत्तरींतले दोन प्रतिनिधी आनी सांखळेचो प्रतिनिधी आसा, असो आरोप आरजीन केला. ताचेर अजून दुसरे वटेनच्यान प्रतिक्रिया येवंक नात. पदयात्रा, रॅली सगल्याच पक्षांनी, संघटनांनी काडपाक जाय आशिल्ल्यो. म्हादय प्रस्नाचेर आरजीन वेगळी चूल मांडल्या. हेरांनी दुसरी आनी घडये सरकार पक्षांची तिसरी आसतली. जिणेमरणाच्या ह्या प्रस्नाचेर आमी एकठांय नात. नेमको हाचोच फायदो कर्नाटकाक जायना जाल्यार पुरो. आमी सगलें कितें करतात, तें फकत म्हादय लागून, हें घट मतींत दवरुंया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
