शेती उत्पादन केल्यार सरकारी नोकरे परस चड जोडूं येता

भांगरभूंय | प्रतिनिधी

पार्शेंच्या श्रीराम साळगांवकार आनी प्रमिला साळगांवकार हांच्या काजू उत्पादनाक नेट

हुर्राक जातलें म्हारग

अंदूं काजिच्या उत्पादनाचेर कांय वाठारांनी परिणाम जाल्ल्यान हुर्राक निर्मितीचेर हाचो वायट परिणाम जाला अशें श्रीराम साळगांवकार हांणी सांगलें. आदीं व्हडा प्रमाणांत शेजारच्या राज्यांतल्यान काजी हाडून हुर्राक करताले. त्या वाठारांनीय काजिंचेर परिणाम जाल्ल्याचें दिसून आयलां.

पेडणें: आयज सरकारी नोकरी मेळोवपाक बरेच यत्न करचे पडटात. उच्च शिक्षण आसून लेगीत नोकरी मेळटना वा ती नोकरी मेळोवन दितना पालक कशे त्रास सोंसतात हाचीं उदाहरणां परत परत आमकां दिसतात. सरकारी नोकरे फाटल्यान धांवचे परस तरणाट्यांनी आपली शेत जमीन आसल्यार ताचेर विंगड विंगड प्रयोग करून शेती उत्पादन केल्यार सरकारी नोकरे परस चड जोडूं येता. पूण सरकारी नोकरे खातीर वा खाजगी नोकरे खातीर जसो वेळ दितात तसोच शेतवडी खातीर नेमान वेळ दिलो जाल्यार तुमची येणावळ नोकरेच्या पगारापरस दुप्पट न्हय तर तिप्पट लेगीत जावंक शकता, असो विस्वास युवा शेतकार बायल प्रमिला श्रीराम साळगांवकार हांणी उक्तायलो.
पार्शेंच्या श्रीराम साळगांवकार आनी प्रमिला साळगांवकार आपल्या दोंगरार विवीध काजवाचीं कलमां लावन काजू वेवसाय सुरू केला. दोंगरार रस्तो नासतना, उदकाची वेवस्था नासतना ते सुवातेर वाहन वचून, उदकाची वेवस्था जावचे खातीर ह्या कुटुंबान बरेच यत्न केले आनी काजिंचे मळे फुलयले. सध्या व्हडा प्रमाणांत गांवठी काजिच्या झाडांक मुट्टे लागल्यात तें पळोवन बरें दिसता. तशेंच तांणी आतांच हुर्राक भट्टी परंपरीक रितीन सुरू केल्या.
 गर्मेच्या दिसांनी काजिच्या मुट्ट्यां पसून मेळपी निरो आनी हुर्राकाक व्हडा प्रमाणांत गोंयांत आनी गोंयां भायर मागणी आसता. साळगांवकार कुटुंबीयांनी निरो, हुर्राक, फेणी कशे तरेन तयार करची हाची प्रक्रिया नेटान सुरू केल्या.
  प्रमिला साळगांवकार हांणी फुडें सांगलें, दोंगराचेर आमची पुर्वजांची जमीन आसा. तेच जमनीर आमी विवीध जातिच्या काजिंचीं कलमां लावन उत्पन्न मेळयलां. जर मेहनत घेवन बागायती वाठार नितळ दवरलो आनी काजिच्या झाडां कडेन आमी संवाद सादलो जाल्यार तीं भरभरीत वाडून उत्पन्न दिवपाक लागतात. हें सिद्ध जालां, अशें म्हणीत तिणें खोस परगटायली.

मनीस आयज सैमाचेर जैत मेळोवपाक वावुरता. उदरगतीच्या नांवान दोंगर पातळ करप, झाडां मारप, पाचवीं रानां तयार करचे बदला काँक्रीटाचीं रानां बांदपाक लागल्यात. हाचो परिणाम सैमाचेर जाल्ल्यान सैम आपले नेम बदलपाक लागला. पावस केन्नाय पडटा. शिंयाळ आनी गिमाळो हे हंगाम बदलत आसात. ताका लागून हाचो परिणाम उत्पादनाचेर जावपाक लागला.

शेतकार श्रीराम साळगांवकार हांणी, दोंगरार वतना सरळ रस्तो नासतना. झाडांक उदक दितना बर्‍योच आडखळी येतात. आयच्या सर्तीच्या युगांत काजिच्या नव्या नव्या जातिंची लागवड करची पडटा. तशेंच तांकां कीड लागल्या काय ना हे पळोवन ताचो सांबाळ करचो पडटा. खंयचेंय शेतकी काम हातांत घेतल्यार ताचो बरोच फायदो आसता. पूण मातयेंत काम करपाची आवड आसपाक जाय. ही धर्तर आपल्या शेतकारांचे होटयेंत येसूच दितली, अशें तांणी सांगलें.
पेडणें म्हालांत व्हडा प्रमाणांत काजी आनी आंब्याची बागायती आसा. हालीं वातावरणांत व्हडा प्रमाणांत बदल घडतूच आशिल्ल्यान उत्पन्नाचेर परिणाम जाता. तशेंच माकडां पसूनय ह्या उत्पन्नाक धोको जाणवता. ह्या बागायतीचें पीक घसघशीत जावचें देखून वखदाचो फवारो मारता. ताका लागून शेतकी खात्या कडल्यान अनुदान येवजण दिता.