गुळावले वागाचे अजून तरी पुरावे मेळूंक नात

भांगरभूंय | प्रतिनिधी

कॅमेऱ्या सयत रानां खात्याची गस्त सुरूच

पणजी : गुळावली वाठारांत वाग भोंवता अशी खबर लोकां मदीं पातळिल्ली आसली तरी रानां खात्याक वागाचे पुरावे मेळूंक नात. फाटले चार दीस रानां खात्याचे कर्मचारी वाठाराचेर गस्त घालून आसात. ते भायर रानां खात्यान कॅमेरा ट्रॅपाची वेवस्था केल्या. कॅमेऱ्यांत लेगीत वागाची नोंद जावंक ना अशी म्हायती रानां खात्याचे अधिकारी आनंद जाधव हांणी दिली.

कोपाड्ड्यां फांसांत आडकून बिबट्याक मरण आयलें. बिबट्याच्या मरणाचो तपास सुरू आसा. हो फांस कोणे लायिल्लो, हाची म्हायती रानां खात्याक अजून मेळूंक ना. बिबट्याक मरण आयले तेन्नाच गुळावले वाग भोंवता अशी खबर आयली. दोन वर्सां पयलीं ह्याच वाठारांत वागीणी सयत तीन पिलांनी वीख खाल्ल्यान मरण आयिल्लें.

हे फाटभुंयेर रानां खात्यान खबरदारेचो उपाय म्हूण गस्त सुरू केल्या. थारावीक काळांत 60 ते 70 कर्मचारी रानांनी भोंवतात. ते भायर थारावीक ठिकाणांचेर कॅमेरे आसात. अजून मेरेन तरी वाग भोंवता हाचे पुरावे मेळूंक नात अशी म्हायती राना खात्याच्या अधिकाऱ्यांनी दिली.

गुळावली वाठार हो म्हादय अभयारण्यांत येता. हांगा वाग हाचे पयलीं दिश्टी पडिल्लो अशें पर्यावरण अभ्यासक प्रो. राजेंद्र केरकार हांणी सांगलें. रानां खात्याचे अधिकारी फाटले काय दीस गस्त घालीत आसात अशेंय तांणी सांगलें.