भांगरभूंय | प्रतिनिधी
मुकेश थळीः सुभाष जाण हांच्या ‘शिंपण’ पुस्तकाचें प्रकाशन
प्रतिनिधी । खबरां मेज
पणजीः चिरंतन आनी शाश्वत मुल्यां आशिल्लें अभिजात पांवड्याचें दिवपा खातीर लेखकाचें काळीज निव्वळ जाय. लेखकान नेमान साधना, चिंतन, मनन, वाचन, सराव करीत रावंक जाय, अशें नामनेचे साहित्यीक, कोशकार आनी अनुवादक मुकेश थळी हाणी सांगलें.
केरी-फोंडेंच्या श्री विजयादुर्गा मंदिरांत सुभाष जाण हांच्या ‘शिंपण’ ह्या मराठी पुस्तकाच्या प्रकाशन सुवाळ्यांत ते उलयताले. तांणी कबीराचे दोन दोहे विस्कटावन सांगतना सुभाष जाण हांणी जिणेंतले रंग, थेंबे आनीकूय शिंपीत आपलें साहित्यीक कुशळटायेचें कुळागर आनीक विस्तारचें, अशें थळी हांणी सांगलें.
भूतकाळाच्यो घडणुको विणीत वचपी सुभाष जाण हांचे ललीत लेख भविश्यकाळाचो वेध घेवपी आसात, अशें गोवा मराठी अकादमीचे अध्यक्ष प्रा. अनील सामंत हांणी सांगलें. ह्या पुस्तकांत कांय सोबीत जागे वा रित्यो सुवातो लेखकान सोडल्यात, त्यो वाचकांच्या विचारांक चालना दिवपी आसात, अशें ताणी देखी दिवन सांगलें.
डॉ. विद्या प्रभुदेसाय हांणी पुस्तकाचेर सविस्तर भाश्य केलें. ग्रामीण संस्कृती वा श्रमसंस्कृतींत जांणी भुरगेंपण सारलां त्या ग्रामीण आणि श्रम संस्कृतीचें प्रतिबिंब ह्या लेखनांत उदेलां, अशें प्रभुदेसाय हांणी सांगलें.लेखकाचो शिक्षणीक प्रवास, कोवीड काळांतल्यो समस्या, सांस्कृतीक प्रवासांतलो ‘एकांकी ते महानाट्य’ असो मोटो कालखंड ‘शिंपण’ पुस्तकांत आयला, अशें ताणी सांगलें.
कवी संजीव वेरेंकर हांणी पुस्तकांतलीं सौंदर्यथळां दाखयतना लेखकाची तोखणाय केली. लेखक सुभाष जाण हांचे बापूय बाळकृष्ण जाण हांच्या सहस्रचंद्रदर्शन सुवाळ्या निमतान हो पुस्तक विमोचन दबाजो जाता देखून समाजीक सांस्कृतीक नदरेन ही कार्यावळ देखदिणी आसा, अशें वेरेंकार हाणी सांगलें. सुभाष जाण हांणी आपल्या उलोवपांत आपल्या लेखनाच्या प्रेरणा स्त्रोतांचेर उजवाड घालो. जयश्री अनील सावयकार आणि कृत्तिका सुभाष जाण हांणी ‘शिंपण’ पुस्तकांतल्या लेखांचें वाचन केलें. संगीता अभ्यंकर हांणी सुत्रसंचालन केलें. मुग्धा सुभाष जाण हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
