ड्रोन फायद्याचें थारतलें

भांगरभूंय | प्रतिनिधी

तंत्रज्ञान दिसान दीस आधुनिक जायत आसा. सुदारत आसा. ताचो चडांत चड वापर सरकारी यंत्रणेन करपाक जाय. मात ते खातीर पयलीं सगलें शिकून घेवचें पडटलें…..

————————————–

छत्रपती शिवाजी महाराजान दर्यांतले येरादारीचें म्हत्व वळखल्लें. 24 आॅक्टोबर 1657 त तांणी कल्याण- भिवंडी वाठार काबीज केलो आनी नौदल उबारपाचो निर्णय घेतलो. पुर्तुगेज आनी हेर पश्चिमी अभियंत्यांचे मजतीन तांणी बोटी बांदल्यो. दर्यांत, दर्यादेगेर किल्ले उबारले. उदकांतल्यान वेपार हो उद्देश आसलोच, ताचेच वांगडा आपल्या राज्याची राखण करप कितलें म्हत्वाचें, हें तांकां कळिल्लें. दुस्मान दर्यांतल्यानूय येवपाक शकता, हें मुंबय हल्ल्या वेळार 26 नोव्हेंबर 2008 त सिद्ध जालें. पाकिस्तानी आतंकवाद्यांनी अरबी समुद्रांतल्यान येवन लोकांचेर फारपेट केलो. तातूंत 175 वयर सामान्य मनीस, पुलिसांक, पर्यटकांक मरण आयलें. आमचें गोंय हें पर्यटन थळ आशिल्ल्यान हांकां सरकारी यंत्रणा आनी समाजानूय सुरक्षे विशीं सदांच गंभीर आसप गरजेचें. आतां गोंय सरकारान सुरक्षा वेवस्थे खातीर ड्रोनाचो वापर करतले, अशें जाहीर केलां. सर्व्हे, वैजकी उपकरणां पावोवपा खातीरुय ताचो उपेग जातलो.  ते फायद्याचें थारचे हे खातीर प्रामाणीक यत्न गरजेचे. 

सरकारान हालींच ड्रोन धोरण तयार केलां.  तेलंगण आनी हिमाचल प्रदेश ह्या राज्या उपरांत आतां आमचो नंबर लागता. गोंयांत घुंवळे वखदांचो वेव्हार हिस्पा भायर वाडला, हें वेगळें सांगपाक नाका. ताका लागून तातूंत घुस्पल्ले खांपे गुंड, अंडरवर्ल्ड डाॅन हांची हांगा यो- वच आसतली. ड्रग्स खंयच्यान येतात, तांची सांठवण, वांटप खंय जाता, कोण करता, ताची टेहळणी करपाक  ड्रोनाचो वापर करूं येता. सीसीटीव्ही कॅमेरे आशिल्ल्यान दर्यादेगां वयल्या पुराय वेव्हाराचेर (गैरवेव्हारुय) नदर दवरप शक्य जातलें.  सैमीक संकश्टां येतात, तेन्ना मजत धाडपाक, म्हायतीचें दिवप- घेवप करपाक ड्रोन बऱ्याक पडटलें. शेती, भलायकी, पर्यटन मळांकूय ताचो फायदो जातलो. खास करून येरादारीचेर ड्रोना वरवी काकदृश्टी दवरूं येता. कारण सगलें खबर आसूनय कांय जाण वेगान गाडयो चलयतात आनी दुसऱ्यांक त्रासांत घालतात. चलोवप्याची मस्ती देंवोवपाक ड्रोना वरवीं रस्त्यांचेर पाळत दवरल्यार बरी. 

गोंयांत कोण येतात, कोण वतात हें कळप समाजीक नदरेन बरें. पुलिसांनी हाचेरुय लक्ष दवरूंक फावो. तंत्रज्ञान दिसान दीस आधुनिक जायत आसा. सुदारत आसा. ताचो चडांत चड वापर सरकारी यंत्रणेन करपाक जाय. मात, ते खातीर पयलीं सगलें शिकून घेवचें पडटलें….. आनी हांगाच भोवतेक सरकारी कर्मचारी आपूण जावन मुखार येनात. शिकिल्लें खंय वचना. पूण नवें शिकल्यार तें काम आमच्याच बोडार पडटलें, ही मानसिकताय कांय जाणां  मदीं आसा. ती पयलीं बदलची पडटली. 

टॅक्सी अॅप आनी टॅक्सीकार

मोपा विमानतळ जातकच दक्षीणेंतले टॅक्सीकार अस्वस्थ जावप सभावीक. सरकारान दोनूय विमानतळ उरतले अशें आस्वासन दिलां. उक्तावणा वेळार आनी पयर मुक्ती दीस सुवाळ्यांतूय. मोपा विमानतळाचेर पेडणेंच्याच टॅक्सीकारांक प्राधान्य मेळटलें, अशें पर्यटन मंत्री रोहन खंवटेन काल म्हणलां. एमपीटींत पर्यटन टॅक्सी कावंटर जातलो. ते विशींची भासाभासूय सरकारी पांवड्याचेर जाल्या, अशें आमदार संकल्प आमोणकार सांगलां. टॅक्सी सेवा अॅपूय तयार जालां. आतां बाॅल टॅक्सीकारांच्या कोर्टांत. ते कितें निर्णय घेतात, तें पळोवपाचें. 

गोंयांक चडांत चड पर्यटकांची गरज आसा. कारण सध्या तरी तांचेरूय राज्याची अर्थवेवस्था अवलंबून आसा. देखून पर्यटन मळाक कसलेंच खत लागचेंना हाची जतनाय सरकाराक घेवची पडटली. हालींच एमपीटींत अमेरिकेच्या पर्यटकांक आडावपाचो जो प्रकार घडलो, तो चुकीचो आशिल्लो. परत अशें घडप मारक थारूं येता. सरकारान अॅपा वरवीं येणावळ मेळटली, तिचो टॅक्सीकारांच्या कल्याणा खातीर वापर  जातलो, अशी घोशणा केल्या. फाटीं मिटर बसोवपाक खर विरोध करपी, गोवा मायल्स, ओला, उबेर दोळ्यां मुखार नाका म्हणपी टॅक्सीकार ह्या गोंय टॅक्सी अॅपाक कसो येवकार दितात, तें पळोवचें पडटलें. काळा प्रमाण बदलूंक जाय. टॅक्सीकारांनी हाका आडवाद थारचें न्हय. तांचे विशीं प्रवासी कागाळी करतात. अर्थांत सगलेच टॅक्सीकार तोंडाक येता, तें भाडें सांगिनात. पूण कांय जाणांक लागून सगल्यांचेरूच टिका जाता. अॅप सुरू जातकच ती सोंपतली, अशी अपेक्षा.