भांगरभूंय | प्रतिनिधी
विरोधाची म्हूण आपली समिकरणां आसतात, परिस्थिती आसता, कारणां आसतात. विरोध आयज फकत विरोधा पुरतो उरूंक ना.
तो पोट भरता, काम दिता. विरोध फकत नांव आनी प्रसिद्धी दिना जाल्यार तो वेवसायाचो मार्ग जाला. जितलो विरोध चड, तितली येणावळ चड…. आनी जितली तुमच्या सांगातान विरोधकांची रांग व्हडली, तितलो तुमचो मान चड.
मोपा विमानतळाच्या नामकरणा वेल्यान घेऽऽ बोवाळ जालो. ह्या नांवाक विरोध, त्या नांवाक विरोध. निमाणे एक समर्पक अशें नांव वेंचून काडलें अशें दिसतनाच आडनांवाक विरोध. आनी मागीर विरोध करप्यांचो विरोध करपाक आनीक नवीन विरोधकांचे चोंबे. नांवांत कितें आसा, हें आयकत आमी व्हड जालीं. मागीर कळ्ळें नांवांत वळख आसा म्हूण. पूण ती निर्माण करपाक कितले कश्ट पडटात हें कळपाक लागता तो मेरेन थोड्यांची हाडां मशणांत पाविल्लीं आसतात. स्मारकांक नांवा दिवन मनीस उरिल्लो जाल्यार ह्या संवसारांत मनीस कमी आनी असलीं स्मारकां चड आसपाची. विरोध करप्यां मदले कितले ह्या नांवाक जागले वा ताच्या इतलेंय न्ही जाल्यार थोडें तरी काम करपाक पावले हे तांचें तेच जाणात. पूण विरोध गरजेचो, ते शिवाय मनश्याची लागणूक समजना.
कांय तेंप फाटीं ‘लाल सिंग चड्डा’ नांवाच्या एका चित्रपटाक घेऽऽ विरोध जालो. दोन- तीन दीस फाटीं ‘पठाना’क विरोध जावंक लागला. विरोधाचें नेमकें कारण चित्रपट न्हीच. चित्रपट पळोवचे पयलींच ह्या विरोधांक सुरवात जाता. कारण चित्रपटाच्या पोस्टराचेर लागिल्लें ‘खान’ हें नांव त्रास करता. धर्मनिरपेक्ष, सेक्युलर मानपी आमच्या भारतांत आमी आयज ह्या थराचेर पावल्यात. आनी चित्रपट पळयतकर लक्षांत येता की ताचें कथानक नेमकें हेच प्रवृत्तीचेर बडी मारता. मागीर हांसचें कांय रडचें तें कळना. विरोधकांच्या पोक्या मानसिकतायेची कींव केले बगर राव नजो जाता.
विरोधाचें एक मात बरें. तो एकटो एकसुरो केन्नाच पडना. तो चोंब्यांनी भोंवता. आनी ताचें गणीतय आंकड्यांचेर जाता. ‘लाल सिंग चड्डा’ वरीच ‘कश्मिर फायल्स’ चित्रपटाकय कांय जाणांनी विरोध केल्लो. पूण त्या विरोधाक कोण बदले नात. कारण थंय विरोधकांचो आंकडो कमी. ‘कश्मिर फायल्सा’चीं पारायणां करप्यांनी तो विरोध खिणांत ना केलो. इतलो ना केलो की इफ्फिचे माचयेर ह्या चित्रपटाक ‘प्रोपागांडा’ चित्रपट म्हणपी चित्रपटाच्या परिक्षकाक निमाणे कोणाच्यो भावना दुखयल्या आसत म्हूण माफी मागची पडली. प्रोपागांडा चित्रपट न्ही म्हूण आड्ड्यो मारप्यांनी सरकारी पातळेचेर ह्या परिक्षकाचेर टिका केली, निशेध केलो. प्रोपागांडा चित्रपट नाशिल्लो जाल्यार चित्रपट मळारच हो विशय कित्याक सोंपलो ना हें मात विरोधकांच्या कट्टुलांत लेगीत आयलें ना. कारण विरोधाची आनीक एक परिभाशा म्हळ्यार ताचें कुड्डेपण. विरोध करपी चडशे दोळ्यार पट्टी बांदुनच विरोध करतात. ते पळयनात, आयकनात आनी समजयनात.
पूण मुळांत विरोध वायट न्ही. कारण ह्याच विरोधाक लागून आयज म्हजे सारकेल्ले एखादें चली शिकपाक शकता, आपल्याक जाय ते करपाक शकता. आमच्या समाजांतल्या चुकीच्या प्रवृत्तीं आड सावित्रीबाई फुले, फातिमा शेख झटूंक नाशिल्लीं, चलयो शिकनाक म्हणप्यांक विरोध करीत स्त्री शिक्षणाची बुनयाद घाल नाशिल्लीं जाल्यार खंय आसतलीं आशिल्ली आमी ह्या समाजाच्या इतिहासांत? सती सारकेल्ली प्रथा बंद करपाक विरोध जावंक नाशिल्लो? ब्रिटिशांनी हो विरोध पत्कारीत कायदो करूंक नाशिल्लो जाल्यार कितल्योश्यो बायलो ह्या समाजाच्या रुढी परंपरांनी जळून भस्म जावपाच्यो. राजाराम पैंगीणकार आनी तांचे सांगाती विरोध करीत रस्त्यार देवंक नाशिल्ले जाल्यार आयजय देवदासी सारकेल्ली प्रथा गोंयांत मिरोवपाचीच वस्त आसतली आशिल्ली. विरोध जालो म्हूण आमी आयज थोड्याश्या सुदारिल्ल्या संवसारांत जगतात.
आयज मात विरोध करपा सारकिल्ले अशे तरेचे गंभीर, महत्वाचे विशय सोंपल्यात व्हय असो दुबाव मारता. आयजय आमकां आमच्याच माणकुल्या गोंयात विधवांचे जावपी हाल सतयतात, मासिक पाळये वेळार आयजूय गैरसमजांक लागून कितल्योश्योच चलयो आठवे- णववेत शाळा सोडून घरा बसतात, सणा- परबां कडेन गुळयो खावन आपल्याच जिवाचे हाल करून घेतात. सैमाचो ऱ्हास करपी कितलेशेच प्रकल्प आयले आनी बसकण मारून हे मातयेंत रिगले लेगीत, पूण आमी विरोध करतात आय.आय.टींक आनी शिक्षणीक प्रकल्पांक. कोणाचें सादता हातूंत कोणाक खबर ना.
नव्या तंत्रांक धरून खंयचोय तरणाटो कितें नवीन करपाक मुखार सरलो कांय ताका विरोध. तांणे लोककला वापरली जाल्यार ती मातयेभरवण जावपाचो भंय, तांणे साहित्याचें नवें तंत्र हाडलें जाल्यार आमकां मुळां हालपाचो भंय, तांणे शिक्षणांत नवीन तंत्रज्ञान हाडलें जाल्यार तें नव्यान शिकचें पडटलें म्हूण धुसफूस, तांणे नवीन कल्पना सुचयली जाल्यार तातूंन चड काम करचें पडत म्हूण चिडचीड. एकंदर, नवीन कितें जाता जाल्यारय आमचो विरोध.
सोशल मिडीया तर ह्या विरोधाचो एक सगळ्यांत व्हडलो प्लेट्फाॅर्म जाला. सुशेगाद पांय सोडून घरांत बसपाचें आनी विरोधाची एक- एक पिल्लां सोडत रावपाचीं. आयलोच कोण वाद घालपाक जाल्यार मागीर ताचो आवय- बापूय वयर काडपाचो. ताचीं पाळामुळां खणत विशय खंयच्या खंय पावोवपाचो.
विरोध एके विरोध केल्यार हें अशेंच जावपाचें. विरोधाकय एक नैतीक बसका आसप गरजेचें. विरोधाकय तत्वां, मुल्यां लागतात. आनी म्हूण अश्या तरेची नैतिकताय बाळगुपी लोकांचोच विरोध हो समाज गंभीरतायेन घेता. त्या विरोधांत स्वार्थ नासून समाजाचें हीत आसा, हें जेन्ना ह्या समाजाक कळटा तेन्नाच तो ह्या विरोधा मुखार नमतें घेता. चुकीच्या विरोधाक बळी पडनासतना तो योग्य विरोधाच्या मुळां कडेन वता, समजून घेता आनी चुको सुदारता. आमी विरोधांतल्यान व्हड जावया, बरें तें आपणावया आनी विरोधाच्या वेवसायाक जमता तसो विरोध करया…
अन्वेषा सिंगबाळ
9923442746
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
