भांगरभूंय | प्रतिनिधी
शिक्षकांची, एलडीसींची भरती, 17, 18 डिसेंबराक परिक्षा
भांगरभूंय I प्रतिनिधी
पणजी : मुळाव्या शाळांतले शिक्षक आनी एलडीसी मेळून 212 पदां खातीर 12,842 अर्ज आयल्यात. शिक्षकांच्या पदां खातीर शेनवारा जाल्यार एलडीसीच्या पदां खातीर आयतारा परिक्षा जातली. शिक्षण खात्याचे संचालक शैलेश झिंगडे हांणी ही म्हायती दिली.
शिक्षण खात्यांत कायमस्वरूपी पदांची भरती जावपाची आसा. मुळाव्या शाळांतल्या शिक्षकांची 142 पदां जाल्यार एलडीसीची 70 पदां भरपाची आसात. शिक्षकांच्या पदां खातीर 2,073 अर्ज आयल्यात. ते भायर एलडीसीच्या पदां खातीर 10,769 अर्ज आयल्यात. शिक्षकांच्या पदां खातीर शेनवारा 17 तारखेक 2.30 ते 5.30 ह्या वेळांत परिक्षा जातली. एलडीसीच्या पदां खातीर आयतारा 18 तारखेक परिक्षा जातली. परिक्षे खातीर कुजिरा आनी ताळगांव ही दोन केंद्रां आसात.
मुळाव्या शिक्षकांच्या पदा खातीर बारावी उत्तीर्ण तशेंच डी. एड ह्या शिक्षणीक पात्रतायेची अट आसा. जांणी कोणी बी. एड. केलां ते ह्या पदां खातीर पात्र ना. तांणी परिक्षा दिवची न्हय, अशें आवाहन शिक्षण संचालक शैलेश झिंगडे हांणी केलां. डिप्लोमा इन इलेमेंटरी एज्युकेशन आनी बॅचलर ऑफ इलेंमेंटरी एज्युकेशन पदवी घेतिल्ले उमेदवार शिक्षकांच्या पदा खातीर पात्र आसात. परिक्षेक येतना उमेदवारांनी कॉल लेटर, फोटे आशिल्ले वळखपत्र तशेंच शिक्षणीक प्रमाणपत्रां हाडपाची गरज आसा. अर्ज केल्ल्या मदीं 383 उमेदवारांनी बॅचलर ऑफ इलेमेंटरी एज्युकेशन ही पदवी घेतिल्याचे अर्जांत नमूद केलां. बॅचरल ऑफ इलेमेंटरी एज्युकेशन ही पदवी गोंयांत ना. ह्या विद्यार्थ्यांनी बी. एड. ची पदवी घेवपाची शक्यताय आसा. ह्या प्रमाणपत्राची तपासणी जातली. बी. एड. धारक उमेदवार मुळाव्या शिक्षकांच्या पदाक पात्र नाशिल्ल्यान तांणी परिक्षेक बसचे न्हय, अशें शिक्षण संचालकांनी स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
