भांगरभूंय | प्रतिनिधी
35 वर्सां पिराये सकयल्या वैज्ञानिकांची जातली निवड, मुख्यमंत्री डॉ. प्रमोद सावंत हांची घोशणा
भांगरभूंय I प्रतिनिधी
पणजी : राज्याची उदरगत तशेंच म्हत्वाचे निर्णय घेतना सर्गेस्त मनोहर पर्रीकार हांणी वैज्ञानीक दिश्टीकोणाचो वापर केलो. तांच्या नांवान दर वर्सा युवा वैज्ञानीक पुरस्कार देशांतल्या वैज्ञानिकांक दिवपाची घोशणा मुख्यमंत्री डॉ. प्रमोद सावंत हांणी केली. पर्रीकार विज्ञान महोत्सवाच्या उक्तावणा वेळार तांणी ही घोशणा केली.
आदले मुख्यमंत्री सर्गेस्त मनोहर पर्रीकार हांचे यादस्तीक दर वर्सा 13 डिसेंबराक विज्ञान महोत्सव जाता. सदचे भशेन एनआयओ सभाघरांत विज्ञान महोत्सवाचें उक्तावण जालें. मुख्यमंत्री डॉ. प्रमोद सावंत, विज्ञान आनी तंत्रज्ञान खात्याचे मंत्री बाबूश मोन्सेरात, मुखेल सचीव पुनित कुमार गोयल, एनआयओचे संचालक डॉ. सुनीलकुमार सिंग, विज्ञान सचीव रमेश वर्मा आनी हेर मानेस्त उक्तावण सुवाळ्याक हाजीर आसले. परंपरीक दिवली पेटोवन विज्ञान महोत्सवाचें उक्तावण जालें.
आदले मुख्यमंत्री सर्गेस्त मनोहर पर्रीकार हांच्या नांवान दर वर्सा युवा वैज्ञानिकाक युवा वैज्ञानीक पुरस्कार गोंय सरकार दितले. 35 वर्सां पिराये सकयल्या देशांतल्या वैज्ञानिकांची पुरस्कारा खातीर निवड जातली. रोख 5 लाखांचो पुरस्कार विज्ञान महोत्सवा वेळार भेटयतले, अशें मुख्यमंत्र्यांनी भाशणांत सांगलें. मनोहर भाई पर्रीकार हांकां विज्ञान आनी तंत्रज्ञान विशयात गती आसली. दर्जेदार शिक्षणाचेर तांचो भर आशिल्लो. विद्यार्थ्यां मदीं आनी समाजा मदीं वैज्ञानीक दिश्टीकोण तयार जावपाक जाय, अशें तांचें मत आशिल्लें. विज्ञान महोत्सवा निमतान विद्यार्थ्यांक वैज्ञानिकांची भाशणां आयकुपाची संद मेळटली. विद्यार्थ्यांनी एनआयओ, गोंय विद्यापीठ, सालीगांव कोयर प्रकल्प, काकोडें कोयर प्रकल्प हांकां भेट दिवपाची गरज आसा. दर्जेदार शिक्षण सुविधा तयार करपा सयत विज्ञान शिक्षण विद्यार्थ्यां मेरेन पावोवपाचे सरकाराचे यत्न आसात, अशें मुख्यमंत्र्यांनी सांगलें.
ह्या वेळार विज्ञान आनी तंत्रज्ञान खात्याचे मंत्री बाबूश मोन्सेरात हांचे भाशण जाले. विज्ञान आनी तंत्रज्ञानाची जिवितांत कार्यवाही करपाक पर्रीकारान सेगीत प्राधान्य दिले, अशें तांणी सांगलें.
आयोजन समितीचे अध्यक्ष जुजे नोरोन्हा हांणी येवकाराचे उलोवप केले. एनआयओचे संचालक डॉ. सुनील कुमार सिंग आनी मुखेल सचीव पुनीत कुमार गोयल हांची भाशणां जाली. ह्या वेळार मनोहर पर्रीकार हांच्या कार्याची म्हायती दिवपी चित्रफीत दाखयली.
विज्ञान महोत्सवांत वैज्ञानिकांच्या व्याख्याना सयत तरेकवार कार्यावळी जातल्यो. 5 हजार विद्यार्थी महोत्सवांत वांटेकार जातले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
