भांगरभूंय | प्रतिनिधी
डॉ . प्रमोद सावंत हांच्या सरकाराच्या काळांत नोकऱ्यो वा रोजगाराची चर्चा बरीच जाता. प्रकल्पाचें उक्तावण आसूं वा एखाद्या विशयावेलो परिसंवाद, नोकऱ्यां विशीं मुख्यमंत्री विधान करतात. रोजगार उपलब्ध जातले वा रोजगार तयार करपा विशी ते घोशणा करतात. रोजगारा विशी ते आंकडेवारी जाहीर करतात. ताका लागून आरोप- प्रत्यारोप सुरू जाता आनी हो वादाचो विशय थारता. राज्या मुखार बरेच प्रस्न आसा. इबाडिल्ली कायदो सुवेवस्था, वाडटे अपघात, घुंवळे वखदांचो वाडटो वेव्हार, खणबंदी अश्यो बऱ्योच समस्या आसात. तातूंत नोकऱ्यांची समस्या कायम आसा. ती आयची न्हय. बऱ्याच वर्सा सावन ती आसा. राज्याची लोकसंख्या वाडत आसा. भायले लोक राज्यांत येत आसात. भायल्यान येवपी लोकांचो ताफो बंद करप आतां लागीं लागीं अशक्य जालां. रस्ते तशेच बांधकामांच्या कामा खातीर राज्यांत मनीसबळ मेळना. हाका लागून भायल्यान मानाय हाडचे पडटात. ताचे भायर उद्येगीक वसणुकेंत नोकरी करपा खातीर शीमे लागसारच्या गांवांतल्यान हजारांनी कामगार गोंयांत येतात.
आमदार तशेच मंत्र्यां कडेन बरेच जाण कागाळी वा समस्या घेवन वतात. सगळ्यांत चड लोक नोकरी मागपा खातीर वतात. सरकारी नोकरेची जायरात आयली काय बरेच जाण अर्ज करतात. उपरांत आमदार तशेच मंत्र्यांच्या घरांचीं सोंपणां झरयतात. ‘आमचे कडेन नोकऱ्यो मागपाक बरेच जाण येतात. कोणाक म्हूण आमी नोकरी दितले? सगळ्यांक सरकारी नोकरी दिवप शक्य ना’, अशें मंत्री जाहीर सांगतात. सांगपाचो उद्देश, सरकार कोणाचेंय आसलें, तरी नोकऱ्यांची समस्या कायम उरतली. पुराय तरेन ती सुटावी करप खंयच्याच सरकाराक शक्य जावचें ना. तरी तरेकवार पद्दतीन रोजगार वा नोकऱ्यो उपलब्ध करपाचे सरकाराचे येत्न आसात. रोजगार मेळाव्यांत अमक्या हजार लोकांक नेमणुकेचीं पत्रां मेळ्ळीं. फुडल्या वर्साभरांत कांय हजार सरकारी नोकऱ्यो तयार जातल्यो, अश्यो घोशणा बरेच खेपो मुख्यमंत्र्यांनी केल्या.
त्यो सुरू आसतना कौन्सिल फॉर माॅनेटरिंग इंडियन इकोनॉमी (सीएमआयई) संस्थेन अहवाल जाहीर केला. गोंयांतले बेरोजगारीचें प्रमाण 13.6 टक्के आशिल्ल्याची नोंद तातूंत आसा. बेरोजगारीच्या प्रमाणाची राष्ट्रीय सरासरी 8.1 टक्के आसा. राष्ट्रीय प्रमाणा परस बेरोजगारीचें प्रमाण गोंयांत चड आसा. बेरोजगारीचें प्रमाण चड आसपी राज्यांचे वळेरेंत गोंय आठवे सुवातेर आसा. हातुंतल्यान रोजगार निर्मितीचो सरकाराचो दावो फोल थारता. रोजगारा विशीं सरकार जी आंकडेवारी दिता, ती चुकीची आशिल्ल्याचो आरोप गोवा फाॅरवर्डाचे विजय सरदेसाय हांणी केला. सीएमआयई अहवालाचो आधार घेत तांणी हो आरोप केला. राज्यांत रोजगार निर्मिती जायना. नवे उद्देग सुरू जायनात, अशें ह्या अहवाला वेल्यान स्पश्ट जाता. पोरूं पसून सीएमआयई अहवालात राज्यांतले बेरोजगारीचें प्रमाण देशाचे सरासरी परस चड आसलें. बेरोजगारीचें प्रमाण चड आसा, ताका जापसालदार कोण, असो प्रस्न आतां मुख्यमंत्र्यांनी केला. शिक्षणा विशींचे एके परिशदेंत उलयतना मुख्यमंत्र्यांनी बेरोजगारीचें प्रमाण वाडपाक जापसालदार कोण, असो प्रस्न केला. बेरोजगारीचें प्रमाण कित्याक वाडटा, हाचेर चिंतन जावपाक जाय. पदव्यो मेळयल्यो, बरे गुण घेतले म्हूण नोकरी मेळटाच अशें ना. ते खातीर कुशळटाय मेळोवपाची गरज आसा. राज्यांत आयटी तशेच फार्मसी उद्येगांक वाव आसा. तातूंत प्रदुशण नाशिल्ल्यान थळाव्या लोकां कडल्यान विरोध जावपाची शक्यता ना. आयटी तशेच फार्मसी उद्देग सुरू जाले, जाल्यार कुशळ मनीसबळाची गरज आसा. फार्मसी म्हाविद्यालय तशेच संगणक अभ्यासक्रमाक लागून दोनूय क्षेत्रांत कुशळ मनीसबळ मेळप कठीण जावचें ना.
प्रधानमंत्री नरेंद्र मोदी हांचे हस्तुकी आयतारा मोपा विमानतळाचें उक्तावण जाता. थंय एक हजारां वयर गोंयकारांक नोकरी मेळ्ळ्या. मोपा विमानतळाक लागून पर्यटकांचो आकडो, येरादारी वाडटली. हाका लागून सरबराय मळाचेर (हॉस्पिटेलिटी) नोकऱ्यो तयार जातल्यो. पर्यटन तशेच हॉटेल वेवस्थापनाचे जे अभ्यासक्रम सुरू केल्यात, तांचो गोंयकारांनी लाव घेवपाची गरज आसा. राज्यांत दर्जेदार शिक्षण संस्था तयार जायत आसात. आयटीआय सयत हेर संस्थांनी कुशळटाय अभ्यासक्रम सुरू जाल्यात. एखादें रोप लायलें की तें व्हड जावपाक कांय वर्सां लागतात. रोपाचें झाड जाले उपरांत कांय तेंपान ताका फळां लागतात. कुशळटाय अभ्यासक्रमाची फळां मेळपाक सुद्धां थोडो वेळ लागतलो. दर्जेदार शिक्षण संस्थांची उबारणी, कुशळटाय अभ्यासक्रम, रोजगार मेळावे अशे बरेच उपक्रम सरकारान सुरू केल्यात. हे सगळे उपक्रम तोखणाय करपा सारके आसात. दीर्घ काळाचो विचार केलो जाल्यार रोजगार निर्मिती खातीर तांचो निश्चितपणान लाव जातलो. कुशळ मनीसबळ तयार जावपाक थोडो वेळ लागतलो. मात तें निश्चितपणान जातलें. सरकारान उद्देगीक धोरण तयार केलां. आयटी तशेंच पर्यटन धोरणाक सुद्धा मान्यताय दिल्या. फावो ते प्रमाणात आयटी वा पर्यटन उद्येग सुरू जावंक ना. उद्देगीक वसणुकेत बरेच भूंयखंड रिकामी आसा. आयटी वा नवे उद्देग सुरू जावचे म्हूण सरकारान उद्येजकां कडेन संवाद सादपाक जाय. सगळ्यांत पयली तांकां जमीन दिवपाक जाय. हेर राज्यांच्या तुळेन गोंयांत उदक तशेंच विजेची स्थिती समाधानकारक आसा. पूण, कालांतरान चड लायट जाय पडटलीच.
कोरोनाची भिरांत पयस जाल्ल्यान आतां स्थिती सामान्य जाल्या. कोरोना वेळार लॉकडावन जालो. लॉकडावना उपरांतूय विमानसेवा बंद आशिल्ली. हाका लागून पर्यटन वेवसाय ठप्प आशिल्लो. हेर उद्देगूय बंद पडले. म्हापसा अर्बन बँक, जुवारी एग्रो कारखानो बंद जालो. हाका लागून बेरोजगारी वाडली. फाटली पांच वर्सां खण वेवसाय बंद आसा. तो सुरू करपाचे येत्न चालू आसात. खण वेवसाय बंद आशिल्ल्यान ट्रक तशेंच बार्ज वेवसाय बंद आसा. हाका लागून ट्रकांचे चालक, क्लीनर बेकार आसा. गॅरेजींची कामगारांची गरज उणी जाल्या. बेकारीचे प्रमाण वाडपाक अशीं बरींच कारणां आसात. ट्रक, बार्ज हे वेवसाय खण म्हाल येरादारीचेर निंबून आसात. खणी सुरू जाल्यो जाल्यार दिवचल, सांगे, केपें म्हालांतली अर्थीक मंदी पयस जातली. नवे उद्देग सुरू जाले जाल्यार रोजगार तयार जावन उद्देगीक मंदीय सोंपतली.
गणेश जावडेकार
9860610762
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
