भांगरभूंय | प्रतिनिधी
पणजी : गोंय सरकारान उदरगतीचो आराखडो तयार केला. गोंयचे उदरगती सयत 2047 मेरेन नव भारताच्या निर्मितीचे उद्दिश्ट तरणाट्यांनी दवरचें असो उलो प्रधानमंत्री नरेंद्र मोदी हांणी मारलो. राजभवना वेल्या रोजगार मेळाव्यांत व्हर्च्युअल पद्दतीन ते संबोधीत करताले.
राजभवनाचेर बिरेस्तारा सकाळीं रोजगार मेळावो जालो. ह्या मेळाव्यांत तरणाट्यांक नेमणूक पत्रांचें वांटप जालें. प्रधानमंत्री नरेंद्र मोदी हांणी व्हर्च्युअल पद्दतीन ह्या मेळाव्याक संबोधीत केलें.
नोकरी मेळिल्ल्या तरणाट्यांक प्रधानमंत्र्यांनी परबीं भेटयली. रोजगार निर्मिती खातीर गोंय सरकारान उबारिल्लें हें म्हत्वाचें पावल आसा. गोंय पुलीस आनी हेर फांट्यांत फुडारांत आनीक भरती जातली. पुलिसांचो आंकडो वाडटलो. पुलिसांचो आंकडो वाडले उपरांत नागरीक तशेंच पर्यटकां खातीर सुरक्षेची वेवस्था करप पुलिसांक शक्य जातलें. भरतीक लागून गोंयचें पुलीस दळ आनीक घटमूट जातलें अशें प्रधानमंत्री नरेंद्र मोदी हांणी सांगलें.
फाटल्या कांय सप्तकांत राज्यांनी रोजगार मेळावे जायत आसात. राज्य सरकारां नोकऱ्यो दिताच. ते भायर केंद्र सरकारान लेगीत हजारांनी नोकऱ्यो दिल्यात. दोट्टी इंजीन आशिल्लीं सरकारां रोजगार मेळावे आयोजीत करून तरणाट्यांक नोकऱ्यो दिवपाक मुखार आसात हाची खोशी जाता अशें तांणी म्हणलें.
मुळाव्यो सुविधा उबारप हें
स्वयंपूर्ण गोंय मोहिमेचें उद्दिश्ट
आसा त्या सुविधांनी सुदारणा करपा सयत मुळाव्यो सुविधा उबारप हें स्वयंपूर्ण गोंय मोहिमेचें उद्दिश्ट आसा. स्वयंपूर्ण गोंय मोहिमेच्या माध्यमांतल्यान गोंय सरकारान उदरगतीचो आराखडो तयार केला. उदरगतीच्या आराखड्याक लागून पर्यटन वाठारांत नव्यो संदी निर्माण जाल्यात. पर्यटन उद्देगांत खूबशो नोकऱ्यो निर्माण करपाची तांक आसा. भात, फळां, भाजी, नाल्ल, ताग आनी मसालो तयार करपी शेतकारांक आप मजत गटां कडेन जोडपाची प्रक्रिया सुरू जाल्या. हातूंतल्यान रोजगार तयार जातले. ते भायर शेती, बागायतीचें उत्पादन वाडटलें.
तरणाट्यांनी गोंया सयत देशाचे उदरगती खातीर समर्पीत नदरेन वावर करपाची गरज आसा. तुमच्या जिवितांतलीं म्हत्वाचीं 25 वर्सां आतां सुरू जातात. गोंयचे उदरगती सयत 2047 मेरेन नव भारताच्या निर्मितीचें उद्दिश्ट तुमचे मुखार आसा. सगले तरणाटे योग्य सेवा दिवन कर्तव्याक पाळो दितले अशेंय प्रधानमंत्र्यांनी सांगलें.
मोपा विमानतळाक लागून नोकऱ्यो
3 हजार कोटी रुपया खर्च करून सरकारान मोपा विमानतळ उबारला. मोपा विमानतळाचें काम पुराय जालां. ह्या विमानतळाचें बेगिनूच उक्तावण जातलें. मोपा विमानतळ तशेंच उदरगतीच्या कामाक लागून हजारांनी लोकांक रोजगार उपलब्ध जाला. केंद्रान गोंयचे उदरगती खातीर हजारांनी कोटी रुपया मोडल्यात अशें प्रधानमंत्री नरेंद्र मोदी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
