भांगरभूंय | प्रतिनिधी
‘गवळी धनगर’ म्हूण अधिसुचीत करपा विशींचो अभ्यास सुरू
पणजी : राज्यांतल्या धनगर समाजाक केंद्रा कडल्यान अनुसुचीत जमातीचो (एसटी) दर्जो मेळोवपाक पयलीं सरकारी राजपत्रांत धनगर समाजाक हेर मागासवर्गीयांत (ओबीसी) ‘गवळी धनगर’ म्हूण अधिसुचीत करचे पडटले. ते खातीरची प्रक्रिया सरकारान सुरू केल्ल्याची म्हायती समाज कल्याण खात्याचे संचालक संध्या कामत हांणी आमच्या प्रतिनिधी कडेन उलयतना दिली.
गोंयांतल्या धनगर समाजाक एसटीचो दर्जो मेळचो हे खातीर राज्य सरकारा कडल्यान जायत्या वर्सां पसून यत्न सुरू आसात. हे विशीं केंद्र सरकाराकूय जायते खेपे प्रस्ताव धाडिल्ले. केंद्राच्या सुचोवणे प्रमाण सातत्यान गरजेचें बदल केल्यात, अशें कामत हिणें सांगलें.
राज्यांतल्या धनगर समाजाक ओबीसी गटांत सुवात दिल्या. पूण गोंयांत हो समाज मूळ गवळी ह्या नांवान वळखतात. ताका लागून एसटी समाजाचो दर्जो मेळोवपाचे प्रक्रियेंत ह्या समाजाक पयलीं ‘गवळी धनगर’ म्हूण ओबीसींत अधिसुचीत करचे पडटले. तशीच त्रूट केंद्र सरकारानूय गोंयच्या प्रस्तावाचेर काडिल्ली, अशें कामत हिणें सांगलें.
धनगर समाजाक गवळी धनगर’ म्हूण सरकारी राजपत्रांत अधिसुचीत करपा विशींचो अभ्यास सध्या हेर मागासवर्गीय आयोगा कडल्यान (ओबीसी) सुरू आसा. अभ्यासा उपरांत आयोग ते विशींचो अहवाल सरकाराक सादर करतलो. ह्या अहवालाचेर विधानसभा अधिवेशनांत चर्चा जावन तो मान्यताये खातीर मंत्रीमंडळा मुखार येतलो आनी ताचेर फुडलो निर्णय जातलो, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
