भांगरभूंय | प्रतिनिधी
घडये आमकां गोंयकारांक उद्यानांची (बाग, गार्डन, जार्दीन) गरज आसची ना. हरशी गोंयकार सुसेगाद म्हूण फामाद. दनपरां पसरो बंद करून जेवपाक गेले काय आड बी पडून परत चारांक उदेंतले. दरेक खीण आनंदान, हांसत- खेळत वच्चो म्हूण धडपडटले. तरीय आमी उद्यानांचे बाबतींत उदास कित्याक तें कळना. गोंय बालहक्क आयोगान राज्यांत फक्त 158 उद्यानां आसात, अशें जाहीर केलां. बार्देशांत सगल्यांत चड 48, तर दुसऱ्या क्रमांकाचेर साश्टी. थंय 38 उद्यानां. पेडणें, धारबांदोड्यां 1- 1, तर काणकोणां एकूय ना. हो अहवाल विचारांत घेवन गोंय सरकारान हाचेर कितें तरी पावलां उबारपाक जाय. तींय जाता तितले बेगीन.
पुर्तुगेजींत उद्यान म्हणल्यार जार्दीन. तांकां आनी ब्रिटीशांक ताची आवड चड. ब्रिटीशांनी तर गर्मी सोंसना म्हूण गिमाच्या दिसांनी रावपाक खास हिल स्टेशनां उबारिल्लीं. आयज पसून तीं खूब लोकप्रीय आसात आनी स्वतंत्र भारताक लाखांनी रुपयांची येणावळ मेळोवन दिता. आमच्या गोंयांत 158 उद्यानां आसात, तातूंतलीं चडशीं पुर्तुगेजांनी तयार केल्लीं. (बार्देश आनी साश्टींत ती चड आसात, ताचे वयल्यान अदमास काडूं येता.) उरिल्लीं उद्यानां शाळा, पालिका, पंचायतींनी बांदिल्लीं. मतदारांक आकर्शित करपाक हालींच्या वर्सांनी थोड्या फुडाऱ्यांनी शार सोबितीकरणाच्या नांवान कांय उद्यानां बांदल्यांत. ना अशें ना. मात, एकूणच उद्यानां जायच असो कोणाचो हट्ट ना. उद्यानां, स्विमींग पूल, वाचपघर, जाॅगींक- सायकल ट्रॅकांचें कांय वर्सांनी कोणाक आकर्शण आसचें ना, अशें एकूणच चित्र दिसता. भलायकेक वा फॅशनीक लागून व्यायामशाळा (चडश्यो खाजगी) मात तरतरतल्यो.
राज्यांत उद्यानांचो आंकडो, खास करून भुरग्यांच्या, वाडपाक जाय. हाचे फाटल्यान शारिरीक आनी मानसीक भलायकी हें कारण आसाच. सगलीं मैदानां भुरग्यांनी भरून वचपाक जाय. तशींच उद्यानांय. थंय भुरग्यांक खेळपाच्यो सुविधा आसूंक जाय. तांची नेमान देखभाल जाय. भुरग्यांक कसलीच दुखापत जावची ना, हाचेर संबंदीत उद्यान पळोवपी पालिकेचें लक्ष जाय. पालकांनीय सांजवेळा वरभर तरी भुरग्यांक थंय हाडपाक जाय. तेंय बी चुकनासतना. कारण आयजकाल भुरगीं घरकोंबयो जाल्यांत. एक तर तीं टीव्हीचेर कार्टून पळयतात. नाजाल्यार मोबायल फोनाचेर गेमी खेळटात. सोशल मिडियाचेर तीं पावल्यांत. विनोदी व्हिडियो पळोवपूय वाडलां. पूण, ह्याच मोबायलाचो अभ्यास, गिन्याना खातीर वापर करपी भोव थोडीं. सोशल मिडियाच्या चपक्यांतल्यान भुरग्यांक सोडयतलो जाल्यार भौशीक उद्यानां हो बरो उपाय. थंय वा मैदानाचेर वचून खेळ्ळी जाल्यार आमची फुडली पिळगी साबार दुयेंसांतल्यान मुक्त जातली, हे विशीं दुबाव ना. 10 वर्सां उपरांतचें गोंय तंदुरुस्त उरतलें जाल्यार आमच्या भुरग्यांक उद्यानां, मैदानांचेर हाडचेंच पडटलें. शाळा, महिला मंडळां, ज्येश्ठ नागरीक संघ हे बाबतींत खूब कितें करपाक शकतात.
उद्यानांनी घसरगुंडी, झोपाळो आनी हेर खेळपाचीं साधनां आसप म्हत्वाचें. तीं खेळपा योग्य आसप हें तर चडूच म्हत्वाचें. ते बागेंत सांवळी आसपाक जाय. पाचव्याचार तणान, कांटे नाशिल्ल्या फुलझाडांनी तीं नटिल्लीं जाय. आदल्या तेंपार आकाशवाणी पणजी थंय लावडस्पीकराचेर लायताले. आतांय लावं येता वा मंद संगीत. घरांत बसून वाजेल्ले ज्येश्ठ नागरीक सांजच्या आदेसाक फिरपाक वतात. तांकां जार्दीन हो बरो जागो. तांचे खातीर तो सुरक्षीत मात जाय. तांकां बसपाक बाक आसचे. आनी हात- पांय धुंवपाक नळ. सगल्यांक थंय येन दिसप गरजेचें. उद्यान म्हणल्यार सुण्यांक भोंवडावपाचो जागो न्हय, हें आमी घट मतींत घेवचें. कारण सुणीं, माजरां थंय पावलीं काय तें उद्यान हळशीक जाता. ही मोनजात लोकांच्या आंगार धांवून वता तें वेगळें. उद्यानां केलीं म्हूण जायना, तांची निगा राखप हें व्हड जापसालदारकेचें काम. सध्या 158 उद्यानां आसात खरीं, पूण तातूंतलीं कितलीं सगले नदरेन सारकीं आसात, तेंय बालहक्क आयोगान पळयलां आसतलें. राज्यांत 192 पंचायती, 13 नगरपालिका आनी 1 म्हापालिका आसा आनी उद्यानां कितलीं तर फक्त 158. सुसेगाद गोंयकारांक उद्यानांची नसाय, हें अजापूच म्हणपाचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
