भांगरभूंय | प्रतिनिधी
वारो नेटान मारतालो. जो रानांत रहस्यमय शिळोणेचो आवाज करतालो. ह्या वातावरणान भिवकुरो सोसो खूब भिल्लो. तांणे स्वताक आंब्या झाडा पोंदा आपल्या बिळांत लिपयलो. अचकीत, तांणे मोठ्ठो धप्प आवाज आयकलो. भियेल्लो सोसो आपल्या बिळांतल्यान भायर आयलो आनी रानांत धांवलो. सोसो मोठ्यान बोवाळ मारतालो, “धांवा, मळब पडटा!”
वाटेर, कोल्यान भियेल्या सोश्याक धांवतना पळयलो. तांणें विचारलें, “कितें जालें, तूं इतल्या गडबडीन कित्याक धांवता?” “तुंवें मोठ्ठो आवाज आयकुना? मळब पडटा. जिविता खातीर धांव,” धांवत धांवत सोश्यान सांगलें.
कोलोय ताचे वांगडा धांवपाक लागलो. वाटेर तांका जिराफ मेळो. ते इतल्या घाई-गडबडीन कित्याक धांवतात कांय म्हूण जिराफान वासपूस केली आनी जेन्ना ताका मळब पडटा म्हूण कळें, तोय तांच्या वांगडा धांवपाक लागलो. रोखडोच हत्ती, हरण, घोडोय धांवपी पंगडा वांगडा धांवपाक लागले.
बोवाळ आयकून, शींव आपले घोलींतल्यान भायर आयलो आनी विचारलें, “तुमी इतली गडबड कित्याक करतात?” जनावरांनी एका सुरांत जाप दिली, “मळब सकयल पडटा आनी आमी आमचो जीव वाटवपाक धांवतात.” हें विलक्षण सांगणें आयकून शींव अजापीत जालो. तांणें विचारलें, “हें तुमकां कशें कळें?” “मोठ्या धप्प आवाजान मळबाचो कुडको सकयल पडटा तो हांवें पळयला.” उत्तेजीत जावन सोश्यान सांगलें.
सोश्यान जे म्हळें ताचेर शींवाक दुबाव आसलो. म्हूण तांणें विचारलें, “तूं म्हाका तो जागो दाखोवंक शकता, जंय मळबाचो कुडको सकयल पडला?”
सोसो भियेल्लो आसलो तरी, तांणें शींव आनी हेर जनावरांक आंब्या झाडा कडेन व्हेंली, जंय तांणे आवाज आयकल्लो. थंय, शिंवान एक मोठ्ठो आंबो पडलेलो पळयलो. तांणे आंबो उखल्लो आनी म्हळें, “तर, हो मळबाचो कुडको!”
जनावरां अत्यंत खजील जालीं जेन्ना कळें की तीं कानार पडिल्ली खबर आयकून पिश्यां सारकीं धांवलीं.
देख : प्रकरणाचो पुराय तपास केल्या शिवाय खंयच्याच निश्कर्शाचेर उडी मारची न्हय.
( अणकारीत)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
