भांगरभूंय | प्रतिनिधी
एखादे गजालींचे आकर्शण आसप हातून अजब कांय ना ! कांय जाणांक आकर्शण घरांनूच लागता, जशें कुडाळ तालुक्यांतल्या बाव गांवातल्या एका शेतकाराची चली, दीपाली गांवकार. तें भारतीय सैन्यांत वचून आतां लेफ्टनन्ट पदार पावलां. तें सांगता, आपल्याक लहानपणा सावन वर्दीचें म्हणल्यार गणभेसाचें आकर्शण आशिल्लें. म्हज्या व्हडल्या भावान एनसीसी घेतिल्लो. ताचो तो परेडीक वतनाचो गणभेस पळोवन म्हाका लश्कराचें आकर्शण निर्माण जालें.
हेच धर्तेर नितळसाण दवरप, सकाळीं स जावचे पयलीं उठप, स्वावलंबी आसप हे गुण लेगीत आमी घरांतल्यान शिकूं शकतात. आयज दरेका गांवांत कोयराची समस्या आमकां दिसता, तेन्ना हो प्रश्न मनाक पडटा, आमी घरांतूय अशेच वागतात काय कितें? हालींच आमच्या सरकाराच्या पर्यटन फांट्यान नवे कायदे हाडल्यात. भौशीक जाग्यांचेर जेवण करप ना, सोरो पियेवप ना, कोयर करप ना…. तें केल्यार 5 ते 50 हजार रुपया दंड भरचो पडटलो . खरें म्हळ्यार आपले वागणुकीचो दुसऱ्याक त्रास जावपाक फावना म्हूण तर आमीं शिक्षण घेतात.
करियर करतना कांय गजाली आमी मतींत दवरपाक जाय. जें हांव करतलो तें चडान चड बरें कशें जातलें? होच विचार मनान आसूंक जाय. नोकरी करतकच हांव तें सुरु करतलों अशें म्हणून जायना. ह्यो गजाली आदीं पसून आपले भितर विकसित करपाक जाय. ल्हानपणा सावनूच बऱ्या मनशांचोच आदर्श घेवपाक जाय. आमच्या देशान जो मेरेन आमी कागाळ करी नात तो मेरेन कांय कृती घडना. हें चित्र बदलपाची तरणाट्यांक व्हडली संद आसा. रस्त्यार जी घाण आसता तिचो त्रास सगळ्यांक जाता, आमी तें न्हयकारुंक जायना. हालींच कमी वजनाचे खूब सिलींडर सांपडले. म्हळ्यार जो कोण ते वापरतालो ताका काय करीनास्तना भुर्दंड. जेन्ना तुमी प्रत्यक्ष करियर करपाक लागतले तेन्ना आपले कडल्यान कोणाचेरूच अन्याय जावचो ना, कोणाकूच मनस्ताप जावचो ना, अशी आपली मानसिकता जाय.
पर्यटक गोंयांत येतात ते पर्यटनाचो आनंद घेवपाक. हातूंत तुमकां हॉटेलूच न्हय तर मार्गदर्शक टूर ऑपरेटर, टॅक्सी चालक, विंगड विंगड साहसी उदकाचे खेळ अशे जायते पर्याय मेळटात. पूण हें करतना फायदो जावंकूच जाय, पूण एके मर्यादेन, नाजाल्यार सुवार्थ मदीं येवन तुमचे नाव पिड्ड्यार जावपाक वेळ लागचोना, खेरीज गोंयचें नाव लेगीत बदनाम जावपाक वेळ लागचो ना. एखादो तरणाटो जर बेकार आसत आनी जर ताका अणभव जाय तर तो जरूर हॉटेलाक प्राधान्य दितलो. थंय ताका खावपा, जेवपाक फुकट तर मेळटात. खेरीज रावपाची वेवस्थाय सहज जाता. पूण खंयचेंय करियर करपाक तुमी वचात, पूण अभ्यास अपडेट कराच. खेरीज बदलाक तयार रावात. तरच तुमचो टिकाव लागतलो. 1998 सालांतली गजाल मुद्दाम सांगीनशी दिसता. त्या वेळार फोटो फिल्म मळार काॅडेकाचें नांव संवसारभर गाजतालें. पूण डिजीटल फोटोग्राफी आयली आनी कंपनी घरघर लागली. लाखांनी कर्मचाऱ्यांक नोकरी सोडची पडली. अशीच गजाल एचएमटी घडयाळ, बजाज स्कुटर, एम्बसेडर गाडयांची. सीडी, डिव्हीडी करपी कंपन्यांची. हीं सगलीं उत्पादनां गुणवत्तेन खंयच फाटीं नासलीं, पूण बदल स्वीकारपाक तांणी उशीर केलो.
पर्यटना भितर लेगीत बदल जातलो. नेमांनी सुधार ही सुरवात आसा. हाची दखल घेवन जर आमीं काम केलेंना तर आमकां ह्या फांट्यांत लेगीत संद मेळचीना. ज्या फांट्यान तुमी काम करपाक सोदतात, ताचो फुडल्या धा एक वर्सांचो आतांच विचार करपाक जाय. म्हळ्यार अभ्यास करपाची संवय दवरपाक जाय. जो बदल अपेक्षित आसा, ताची जाणविकाय दवरून पावलां घालपाक जाय. ना जाल्यार एचएमटी, काॅडेक सारकी गजाल आमची जावपाक वेळ लागचो ना. जे पर्यटकांक मार्गदर्शन करतात, ते खऱ्यांनीच अभ्यास करून उलयतात काय वेळ मारपाक उलयतात ? हाचे कडेन जरूर लक्ष दियात आनी आपुण हाच्या परस चड म्हायती आनी अस्सल म्हायती दितलों, हे नजरेंतल्यान वावर सुरु करात. हें करतलो जाल्यार अभ्यासा बगर पर्याय ना. खेरीज बदल स्वीकारपाची तयारी लेगीत दवरात. आवड, आकर्शण तर जायच.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
