बिरेस्तार सावन धर्मानंद कोसंबी महोत्सव

भांगरभूंय | प्रतिनिधी

वेगळ्यावेगळ्या पांच विशयांचेर जातलें विचारमंथन

पणजी: फाटलीं 14 वर्सां सेगीत सुरू आशिल्लो धर्मानंद कोसंबी महोत्सव 10 नोव्हेंबरा सावन मडगांवच्या रवींद्र भवनांत सुरू जातलो. पै तियात्र सभाघरांत 10 ते 14 नोव्हेंबर ह्या दिसांनी सद्दां सांजवेळा 5 वरांचेर व्याख्यानां जातलीं. कला आनी संस्कृती मंत्री गोविंद गावडे हांणी शुक्रारा आयोजीत केल्ले पत्रकार परिशदेंत ही म्हायती दिली.

मुख्यमंत्री डॉ. प्रमोद सावत, आमदार दिगंबर कामत, आमदार विजय सरदेसाय, मुखेल सचीव पुनीत गोएल आनी कला आनी संस्कृती विभागाचे सचीव नारायण सावंत हांचे सयत मंत्री गोविंद गावडे उक्तावण कार्यावळीक हाजीर रावतले.

व्याख्यानाची सुरवात ज्ञानपीठ पुरस्कार फावो जाल्ले साहित्यीक दामोदर मावजो करतले. ते ‘61 ते 61’ ह्या विशयांतल्यान भोवभाशीक गोंय हाचेर उलयतले. दुसऱ्या दिसा माधवी मेनन ‘द लॉ ऑफ डिझायर’ ह्या विशयाचेर व्याख्यान दितली. प्रशांती तळपणकार ह्या दिसा संयोजक आसतली. तिसऱ्या दिसा देवदत्त पटनायक ‘गोंयचे देव’ ह्या विशयाचेर उलयतले. अमृता पाटील ह्या दिसा संयोजक आसतली. चवथ्या दिसा सूरज येंगडे हे ‘भारतीय विचारधारेचे दोश’ हो विशय मांडटले. निमाण्या दिसा प्रणय लाल ‘आपलाे इतिहास फुडारा विशीं कितें सांगूंक शकता’ हो विशय मांडटले. आदित्य काकोडकार ह्या दिसा संयोजक आसतले अशी म्हायती मंत्री गावडे हांणी दिली.

सगल्या व्याख्यात्यांची निवड चार वांगडी तज्ञ समितीन केल्या. गोंयच्या चडांत चड विद्यार्थ्यांनी, तरणाट्यांनी, प्राध्यापकांनी हाजीर रावचें आनी आपल्या ज्ञानांत भर घालची अशें आवाहन तांणी ह्या वेळार केलें.

मजगतीं, आयतार 6 वेर सावन बुधवार 9 वेर मेरेन गोंयांत भोवभाशीक नाट्यमहोत्सव जातलो. कुडचड्यार रवींद्र भवनांत हो महोत्सव आयोजीत केला. आमचो एकवोट ह्या कोंकणी नाटकान महोत्सवाक सुरवात जातली. दुसऱ्या दिसा ‘द स्पाईन’ हें हिंदी नाटक सादर जातलें. तिसऱ्या दिसा ‘नेरालडा मनुषारो’ हें कन्नड नाटक जातलें. निमाण्या दिसा भारतीय रंगभुंयेचे आद्य नाटककार वेदांत अश्वघोष मराठी नाटकान महोत्सवाचो समारोप जातलो. सगलीं नाटकां सांजवेळा 7 वरांचेर सुरू जातलीं. सगल्यांक फुकट प्रवेश आसतलो. सगल्यांनी ह्या महोत्सवाक हाजेरी लावची अशें मंत्री गावडे हांणी म्हणलें.

सांखळे त्रिपुरारी पुनवे निमतान गोंय पांवड्यार कालोत्सव मनयतले. ह्या वेळार पर्यावरणपुरक बोट सर्ती आयोजीत केल्यात. महोत्सवाक हाजीर रावन गोंयांतल्या बोट तयार करपी तरणाट्यांक प्रोत्साहन दिवचें आनी सांस्कृतीक कार्यावळीचो आनंद घेवचो अशें मंत्री गोविंद गावडे हांणी म्हणलें.