ऋषी सुनकाच्या नांवान भारतांत शबै शबै कित्याक ?

भांगरभूंय | प्रतिनिधी

देशाचे भलायके खातीर धर्म, वंशवाद कुशीन दवरत अल्पसंख्याक समाजांतल्या एका अश्वेताचेर विस्वास दवरून देशाची सुत्रां ताच्या हातांत दिलीं हाचे खातीर टॉरी पक्ष तोखणायेक पात्र थारता.

मूळ भारतीय ऋषी सुनकाक साम्राज्यवाद, वसाहतवादाचो कुप्रसिद्ध इतिहास आशिल्ल्या श्वेत भोवसंख्याक ब्रिटनाचो पयलो हिंदू आनी अश्वेत प्रधानमंत्री जावपाचो मान मेळ्ळो म्हूण आमच्या देशवासीयांक उपाट खोशी जावप हे समजूं येता, पूण मिडियांतले कांयजाण अतिरेकी साजरीकरणांत गरजेपरस चडूच व्हांवले अशें दिसले. देशाच्या एका मुखेल इंग्लीश दिसाळ्यान ‘साम्राज्याचें युग ते ऋषी राज’ अशी हेडलायन दित पेपरभर ‘ऋषीपुराण’ छापलें, तर एका राष्ट्रीय पांवड्या वयल्या चॅनल अँकरान ‘लगान’ सिनेमांतल्या जैता उपरांत एका भारतीयान त्या देशाचो ‘ताबो’ मेळयलो इतले मेरेन म्हणलें.
ऋषीच्या आज्याचें कुटुंब अविभाजीत भारतातल्या पंजाबातल्या गुजरानवाला गांवात रावतालें, जो आयज पाकिस्तानांत आशिल्ल्यान पाकिस्तानानूय सुनकाचेर आपलो दावो ठोकला. आजो 1935 वर्सा नायरोबीत स्थलांतरीत जावन थंयच्यान 1960 वर्सा ब्रिटनाक गेल्लो. 25 वर्सां राबित्यांत आशिल्लो म्हूण केन्या देशाक सुनक आपलोसो दिसता. केन्याक बराक ओबामाय आपलोसो दिसतालो खरो, पूण ताच्या अमेरिकन अध्यक्षपदाचो तांकां फायदो जालो ना.
ऋषीचे भारतातले संबंद हालींचे आनी योगायोगान जाल्यात म्हणू येता. अमेरिकेंतल्या कॅलिफोर्नियांत स्टॅनफर्ड विश्वविद्यालयांत एमबीएचे शिक्षण घेता आसतना ताची इश्टागत इन्फोसिस संस्थापक नारायण मूर्तीची धुव अक्षता वांगडा जाली. फुडे लग्ना उपरांत ऋषी हो नारायण आनी सुधा मूर्तीचो, बेंगळूरूचो आनी भारताचो जांवय जालो. 2015 वर्सा सांसद म्हूण ताणें श्रीमद्भगवतगीतेक साक्ष मानून सोपूत घेवप, अर्थमंत्री आसतना सरकारी आवासांत दिवे पेटोवन दिवाळी मनोवप आनी आतां प्रधानमंत्री पदाचीं सूत्रां स्विकारता त्या दिसा हातांत तांबडो दोरो – कळावा – बांदप ही हिंदू संस्कृती आनी मूल्ल्यांचो आदर करपी कृत्यां आमी तोखणाय करपा सारकीं आसात खरी, पूण हिंदू ब्रिटीश प्रधानमंत्री ह्या नात्यान ताचो भारताक लाव मेळटलो काय कितें, हाचो मात दुबाव दिसता.
मॉरिशियन तमिळ आवय आनी गोंयकार बापायची धूव, 42 वर्सां पिरायेची सुवेला ब्राव्हरमेन गोंयांत आसगांवात जल्मल्ली आसली तरीय ब्रिटनांत ‘खर उजवी’ अशी तिची वळख आसा. युरोपीयन संघाच्या सभासदत्वाक लागून युरोपांतल्यान ब्रिटनांत येवपी अप्रवाशांची घिट्टी उणावपाक ब्रेग्झीट खाला ब्रिटनान संघ सोडलो ताची ती सुनका परस चड कट्टर पुरस्कर्ती. आता बेकायदेशीरपणान देशांत घुशिल्ल्यांक एक मार्गी तिकेट दिवन पूर्व आफ्रिकेच्या ऱ्हवांडा देशांत धाडपाची तजवीजूय केल्या. ब्रिटनांत विजाची मुजत सोंपले उपरांत रावपी लोकांत भौसंख्याक हे भारतीय आसतात, अशें वक्तव्य करून सुवेलान भारताच्या ब्रिटना वांगडाच्या संभाव्य मुक्त व्यापार धोरणाक अपशकून केलो. दोन देशां मदी लोकांचो सहज संचार आनी त्या बदलाक ब्रिटनांतल्यान भारतांत आयात जावपी स्कॉच सोऱ्याचेर उणे शुल्क आकारप हो भारता वतीन धोरणाचो एक मसुदो जावन आसा. मूळ गोंयकार सुवेला अश्वेत आसली तरी आपली निष्ठा ही फकत आनी फकत ब्रिटीश साम्राज्या वांगडा आसा आनी फुडारांतूय ती अशीच आसतली अशे राजीनाम्या उपरांत बीबीसी वाहिनीक दिल्ले मुलाखतींत तिणें म्हणलां. ही तिची फाटभूंय आसतना पूर्व प्रधानमंत्री लीझ ट्रसान गृहमंत्री पदा वयल्यान भायरायिल्ल्या सुवेलाक सुनकान परतून सरकारांत गृह मंत्रीपद दिवन भविश्यातल्या खर अप्रवासी विरोधी धोरणांचो संकेत दिला.
ब्रिटनची अर्थव्यवस्था सद्या भयंकर म्हारगाय आनी वाडट्या कळंतराचो दोट्टी मार सोंसत आसा. मध्यमवर्गीयांक दोन वेळांचे जेवण मेळोवपाक उठाबशी काडच्यो पडटात. हिस्पाभायर वाडिल्ली उर्जा बिला भरपाची तांक ना ही परिस्थिती. अशा वेळार स्विमींग पूलाचेर ४ लाख पावंड खर्च करून राजेशाही बंगल्यात रावपी, प्रादा फॅशन हाउसाचे मोचे घालपी, गिरेस्त उद्देजक आनी इश्टा मदीं वावुरपी ऋषी सुनकांत ब्रिटीश जनतेक समदुख्खी प्रतिनिधी कसो काय दिसतलो, होच प्रस्न आसा.
देश वायट आर्थिक स्थितीत आसतना सुनक जोडप्याची कर चुकोवपाची फटींगपणाय सद्या थंय चर्चेत आसात. किंग चार्ल्स III हांचे वट्ट संपत्तीचे तुळेन दुप्पट इतली 7300 लाख पाउंडाची (डॉलर 7000 लाख) संपत्ती आसतना कायद्याचो आधार घेत सुनक जोडप्यान आपल्या संपत्ती वयलो कर वाटोवपाक नैतीक फटींगपणा आपणायिल्लीं. आपली भारतीय नागरिकता राखून दवरत अक्षतान भारतांतल्या उत्पन्ना वयलो 20 कोटी पाउंड कर भरूंक नाशिल्लो. ऋषी वेंचणुकेंत देवलो तेन्ना मिडियांत बोवळ जाल्ल्या कारणान तिणें नायलाजान तो भरपाची तयारी दाखयली. हालीं बोरीस जॉन्सन मंत्रीमंडळांत अर्थमंत्रीपद भूशयतनाय ऋषीन आपलो अमेरिकन ग्रीन कार्ड स्टेटस रद्द करनासतना अमेरिकन उत्पन्नाचेर कर चुकोवपाचो यत्न केला. “शिस्तीचो अभाव आनी कर चुकोवपाची प्रवृत्ती आशिल्ल्यान जपान, अमेरिकेच्या तुळेन भारत फाटीं पडला”, अशे मत उक्तावपी अक्षतान ब्रिटनांत मात कर चुकोवपाची फटींगपणा केलीं.
अमेरिकेंत कमला हॅरीस उपराष्ट्रपती जाल्ली तेन्नाय भारतांत तिची भारतीय आवय आनी मावशांच्या काणयांनी सोशल मिडियाचेर धुमाकूळ घाल्लो. उपरांत मोदींच्या व्हायट हावस भेटीच्या दरम्यान संयुक्त पत्रकार परिशदे वेळार तिणें लोकशाहीचेर मोदीक दिल्ले लेक्चर राजकीय शिश्टाचाराक धरून नाशिल्ले. भारताचो विरोध झुगारून आयज अमेरिका पाकिस्तानाक डॉलर 45 कोटींची संरक्षण मजत दिवपाक तयार जाला. हॅरीसाचो जयजयकार करत नाचून व्हडलोसो फायदो देशाक जालो ना. पाश्चिमात्य देशांत सक्रीय राजकारणांत आशिल्ल्या मूळ भारतीयांचो भारताची अर्थव्यवस्था, वेपार, सुरक्षा मळार सकारात्मक फरक पडलो ना. सुनक, ट्रंप, बायडेन हे आपल्या सरकारी निवासांत दिवाळी साजरी करतात तो तांच्या हिंदू मतदारांक खोशी करत राजकारण फुलोवपाचो भाग. देशांत मुस्लिम मतां खातीर लालू, नितीश ईदाचे इफ्तार पार्टींत सामील जातात तसले ते प्रकार.
ब्रिटनाच्या ‘सुनक’ निर्णयांतल्यान आमी बोध घेवपा सारको एक भाग आसा. देशाचे भलायके खातीर धर्म, वंशवाद कुशीन दवरत अल्पसंख्याक समाजांतल्या एका अश्वेताचेर विस्वास दवरून देशाची सुत्रां ताच्या हातांत दिलीं हाचे खातीर टॉरी पक्ष तोखणायेक पात्र थारता. सुनकाचे साजरीकरण करतना आमच्या देशांत अल्पसंख्यकांक कसली वागणूक दितात, ताचेर विचार करप गरजेचें. आदी मुस्लिम राष्ट्रपती, मुख्यमंत्री जावन गेल्यात, हाचो हवालो दितात खरे, पूण आयज सत्तापक्ष भाजपान वखदाकूय मुस्लिम सांसद आनी आमदार दवरलो ना. दिल्लींत जाहीर सभेंत एक मंत्री अल्पसंख्यकांक ‘गोली मारो’ म्हणता तर सांसद बहिष्कार घालपाचें फर्मान दिता. प्रधानमंत्री आनी गृहमंत्री मोनेळ पांगुरतात. पुलीस कारवाय करनात. कारवाय करात म्हूण सर्वोच्च न्यायालयाक लक्ष घालचे पडटा हे दुर्दैव.

दीपक लाड
पर्वरी