भांगरभूंय | प्रतिनिधी
केरी- सत्तरीः पाडवो म्हणल्यार बलिप्रतिपदा. हिंदू धर्मियांचो हो एक व्हड सण. ह्या दिसाक दिवाळी पाडवो म्हणटात. शेतकार वर्ग हो पाडवो विवीध कार्यावळी वरवीं मनयतात.
शेतकार आपल्या गाय- पाड्यांची सकाळीं पुजा करतात. तांच्या गळ्यांत रोजांची माळ घालतात. ते उपरांत पोळे काडून तांच्या गळ्यांत बांदतात. कांय कडेन वडेय बांदतात. ह्या वेळार पिठांत वाटी बुडोवन ती वाटी गोरवांचे मारून पुराय आंग रंगयतात. ते उपरांत गोरवांक चरपाक सोडटात.
कांय वाठारांनी गांवांतलीं भुरगीं एकठांय येवन गोरवांच्या गळ्यांतले पोळे आनी हेर खाणां काडटात. तीं सगळीं एकठांय करून सगले खातात. आदल्या तेंपाचेर गोरवांचे गोठणीचेर खूबशा वाठारांतलीं गोरवां येतालीं. थंय त्या गोरवांच्या गळ्यांतले सगळे पदार्थ राखणे एकठांय करताले आनी सगले बसून खाताले. पूण तें चित्र सध्या दिश्टी पडना. आतां गोरवांय उणीं जाल्यांत आनी गोरवांच्या गळ्यांतले पदार्थ खावपाची आवड लेगीत. कांय वाठारांनी गोरवांक पळोवपी कोणूच नाशिल्ल्यान तीं मेळत थंय हेडटात. आयच्या काळांत गोरवांची पुजाय केल्ली चडशी दिसना.
कांय वाठारांनी कांय विशिश्ट झाडाच्या दोरा पासून फुलां करून त्यो माळो गोरवांच्या गळ्यांत घालताले. तशेंच गोरवांची शिंगांय रंगयतालें. पूण सध्याच्या काळांत तशीं फुलां तयार करून तांच्यो माळो गोरवांच्या गळ्यांत घाल्ल्यो दिश्टी पडनात. खूबशा गांवांनी आतां गोरवांचो आंकडोय उणो जाला. कांय कडेन जाल्यार सणा परबे वेळार शेण शिंताडो करपाक शेण लेगीत मेळना.
गोरवांक गोठ्यांतल्यान चरपाक सोडले उपरांत शेणा पासून आकर्शक असो गोठो तयार करतात. त्या गोठ्या भोंवतणी रांगोळी घालतात आनी गोठो सजयतात. त्या गोठ्यांत कारिटा पासून पाडे आनी गायो करतात. तातूंत तुळस घालतात. चूल करतात. तशेंच राखणोय करतात. कांय कडेन त्या राखण्याक धेंडलो अशेंय म्हणटात. ह्या गोठ्याची पुजा करतात तशेंच गोरवांची दावीं, नांगर, जूं सारकिल्ल्या शेत कसपाक गरजेच्या आशिल्ल्या आवतांची पुजा करतात. दनपारां त्या गोठ्यांत वाडी दाखयतात आनी जो कोण त्या गोठ्यांतली वाडी खाता ताणें हात धू नासतना थंयच ते हात आपल्या कपड्यांक पुसपाची प्रथा आयजूय कांय कडेन पाळटात. आयज आमी आमच्या भुरग्यांचेर बरे संस्कार करपाक सोदतात जाल्यार तांकां आमच्यो वेगवेगळ्यो रुढी परंपरा सांगपाक जाय. ल्हान भुरगीं अशे खोशयेचे सुवातेचेर मन लावन काम करतात. आतां खूब कडेन अशे प्रकार दिसनात, पूण कांय वाठारांनी आयज लेगीत अशा वावरांत भुरगीं समरस जातात. केळावडे रावण सत्तरी, वरगांव माशेल वाठारांत माणकुल्या भुरग्यांनी आपल्या पालकां वांगडा गोठो करपाची खोस उपभोगली.
भुरग्यांक परंपरा खबर आसाः यशवंत देसाय
आमच्या घरांत आदीं गोरवां आशिल्लीं. तेन्नाच्यान आमी अशे तरेचो गोठो करतात. सध्या एकूच गाय आसा. तरी लेगीत आमची परंपरा सांबाळचे खातीर आनी भुरग्यांक ती परंपरा कळची हे खातीर आमी घरांतल्या ल्हान भुरग्यां वांगडा गोठो करतात. आदले वरी ह्या गोठ्याची मजा घेतना चडशे जाण दिसनात. पूण आमच्या घरांत मात ल्हान भुरग्यांक ही परंपरा खबर आसा, अशें वरगांव माशेलांतले यशवंत देसाय हांणी हे विशीं म्हायती दितना सांगलें.
संस्कृतीची राखण जाताः आत्माराम गांवस
आमगेर आदीं खूब गोरवां आशिल्लीं, पूण सध्या तीं नात. तरी लेगीत आमी गोठो करपाची परंपरा तिगोवन दवरल्या. घरांतल्या ल्हान भुरग्यांक लेगीत एक तरेची खोस मेळटा आनी आमचे संस्कृतीची राखण जाता. कांय वाठारांनी गोरवां आसात, पूण तीं गोठ्यांत नासतात. तीं रस्त्यांचेर हेडटात. ह्या गोरवांची पुजा करतनाय कोण दिसना, अशें रावणचे आत्माराम गांवस हांणी ह्या उत्सवा विशीं उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
