भांगरभूंय | प्रतिनिधी
दर्यादेगांनी घुंवळे वखदांच्या वेव्हाराक आयिल्लो ओतो, मुंबयच्या विमानतळार जप्त केल्लें गोंयचे वाटेर आशिल्लें ब्लॅक कोकेन, भुरग्यांक उबारून व्हरतात हे भिरांतेन कायदो हातांत घेवन दुबावितांक जाता ती मारपेट, कोणाचीच भीड बाळगिनास्तना गोंयांत राबितो करून आशिल्ले बांगलादेशी आनी हेर घुसखोर, घरां फोडून जावपी चोरयो, दिसान दीस वाडत वचपी रस्तो अपघात, लोकांच्यो जमनी हडप करपाचे प्रकार. हीं सगळीं सुशासनाचीं चिन्नां निखालस न्हय, पूण गोंयांत हालींसराक तीं सामकीं स्पश्टपणान दिसपाक लागल्यांत.
हाका लागून गोंयांत कायदो आनी सुवेवस्था खऱ्यांनीच आसा कांय ना, हे विशीं कोणाकूय दुबाव आयल्यार तो तांचो दोश अशें निखालस म्हणपाक मेळचें ना. सध्या जें कितें चल्लां तें खऱ्यांनीच सामको हुस्को करपा सारकें आसा. ‘भिवपाची कसलीच गरज ना. सगलें नियंत्रणा खाला आसा’, अशें सत्ताधारी ताळो सराटून सांगतले, मात जमनी वयले प्रत्यक्ष परिस्थितींत चडसो फरक पडना, हें दिसपट्यो गजाली दाखोवन दिवपाक लागल्यात.
हरशी गोंयकार पूर्वजांनी राखून दवरिल्ल्यो जमनी भायल्या लोकांक विकतात, दुकानां तांकां चलोवपाक दितात आनी वयल्यान आमचे वेवसाय भायल्यांनी ताब्यांत घेतल्यान अशी आड्डी मारतात. सुशेगाद गोंयकारांचो सभावूच तो, अशें म्हणूं येता. मात, सरकारी यंत्रणेक वश करून पडंग आशिल्ल्या जमनींच्या सरकारी नोंदींत फेरफार करून त्यो हडप करपाचे जे प्रकार उक्ताडार आयल्यात ते पळयल्यार गोंय आनी गोंयकारांचें कांय खरें ना, अशें स्पश्ट दिसपाक लागलां. पयसो ओतल्यार कितेंय करपाक जाता, हें महसुली अधिकारी आनी कर्मचाऱ्यांनी सत करून दाखयलां, ही पुराय सरकारी यंत्रणेक लजेक घालपी गजाल. तातूंतले एक म्हत्वाचें प्यादें आशिल्लो बार्देशाचो आदलो आनी सध्याचो मुरगांवचो मामलेदार राहुल देसाय हाका निमणी अटक केली.
गोंयांत राबितो नाशिल्ल्या गोंयकारांच्यो जमनी खंय आसात, हाची म्हायती मेळोवन त्यो हडप करपाचें काम हें हालींच सुरू जालां अशें न्हय. जमनीच न्हय जाल्यार वापरांत नाशिल्ली घरां लेगीत परस्पर विकून उडोवपाचे प्रकार हाचे पयलींय जाल्यात. सरकारी यंत्रणा हाता कडेन आसले बगर ही असलीं कामां करप शक्यच ना. सत्ताधाऱ्यांच्या बऱ्याच उसरां हें लक्षांत आयलें आनी बेकायदेशीरपणान जमीन बळकावप्याच्या ह्या प्रकाराचीं पाळां- मुळां खणून काडपाक पुलिसांच्या विशेश चवकशी पंगडाची म्हणल्यार एसआयटीची स्थापणूक जाली.
जमनी नांवार करपाची उत्परिवर्तन (म्युटेशन) ही एक म्हत्वाची प्रक्रिया. मामलेदार हो तातूंतलो एक म्हत्वाचो सरकारी घटक. जमीन नांवार जातकूच ती विकपाक तालुक्याच्या उपनिबंधका सामकार विक्री पत्र (सेल डीडी) करप ही दुसरी म्हत्वाची प्रक्रिया. हे दोनूय सरकारी घटक वश जाल्यार कोणाचीय जमीन कोणाच्याय नांवार करून ती विकप सामकें सोपें हें जमीन हडप करपी नरकासूरांनी दाखोवन दिलां. ह्या वेव्हाराक मजत करपी मामलेदार राहुल देसायाचेर एसटीआयन देड- दोन म्हयन्यां पयलीं गुन्यांव नोंद केल्लो. ताका अटक करपाक इतले दीस कित्याक लायले, हो विचार करपा सारको प्रस्न.
ह्या जमीन वेव्हारांत कांय राजकारणी घुस्पल्ल्यात हाचें सुतोवाच एसटीआयच्या मुखेलीन हालींच केल्लें. राजकारण्यांक हात लावचे पयलीं तांकां नामानिराळे रावपाक कायद्यांत पळवाटो तयार करपा खातीर देसायान अटक करपाक वेळ लायलो ना मूं, अशें कोणाकूय दिसपाक शकता. एका राजपत्रीत अधिकाऱ्याक अटक करचे पयलीं बारीक- सारीक गजालींचो विचार करचो पडटा, अशें एसआयटी सांगपाक शकता. गुन्यांव नोंद केली व्यक्ती गुन्यांवकार थारपाक शकना हें जरी खरें तरी जमीन हडप प्रकरणात देसाय हाचो संबंद आसा, हें सिद्ध जाले उपरांत ताचेर शिस्तभंगाची वा निलंबनाची कारवाय करनास्तना ताका बार्देशांतल्यान मुरगांवां बदलेचेर धाडिल्ल्यान एकूण चवकशे विशीं लोकांच्या मनांत दुबाव तयार जाल्लो. देसाय बरींच वर्सा बार्देशाच्या मामलेदारपदार आशिल्लो. राजकारणी फाटल्यान आशिल्ल्यान आपलें कोण कांय करपाक शकचो ना, अशें घडये ताका दिसपाक शकता. जमीन हडप प्रकरणांतल्या मास्टरमायंडाक अटक जाली तरी देसाय मेकळो हाचे वयल्यान हें कितें तरी गौडबंगाल, अशेंच दिसतालें. एसआयटीन आतां ताका ताब्यांत घेतिल्ल्यान एसआयटी जमीन हडप प्रकरणाच्या मुळा मेरेन वतली अशी आस्त बाळगुपाक जाता. जमीन हडप प्रकरणाचेर खर उजवाड पडटलो कांय ना, हें आतां पळोवचें पडटलें…
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
