भांगरभूंय | प्रतिनिधी
पेडणे तालुको म्हळ्ळ्यार सैमाची खणच न्हय, जाल्यार शेजारच्या राज्यांच्या एकवटाची, देसाक महासत्ते कडेन व्हरपाची वाट. त्या तालुक्यांत जावपी मोपा विमानतळ गोंया भायरच न्हय देसा भायर राबीत्याक आशिल्ल्या गोंयकारांक एकठांय हाडटलो हातूंत दुबाव ना. गोंयच्या विखुरिल्ल्या
घराब्यांतले भाव. भयणी मोपा निमतान परतून घरा येतले तेन्ना तांकां एक घर कमी पडटलें म्हणून आदींच चार भावांनी चवगांच्या नांवार भूंय विकती घेवन दवरल्या, घरांय बांदून भाड्याक दिल्यांत. मोपा विमानतळ आयज ना फाल्यां जातलोच आनी थंयच पेडणे तालुक्याच्या लागसारल्या बार्देश तालुक्याकय म्हत्त्व येतलें, हाची आदल्या लोकप्रतिनिधींक खबर आशिल्ली. सत्तरी, दिवचल तालुके भांगरभूंय मोपा वांगडा जातले, तेन्नाच दक्षीण गोंयांतल्या तालुक्यांतल्या वेवसायिकां मुखार फुडें कशें वचप हे प्रश्न उपरासतले. अशा वेळार तांकां सरकार मार्गदर्शन करीत व्हय? सरकाराची ती लागणूक आसपाकच जाय, फकत आपलो मतदारसंघ न्हय जाल्यार राज्य ही खंयच्याय मुख्यमंत्र्यांची मोख आसपाक जाय.
साठ वर्सां सावन मोपा विमानतळाचें सपन पळोवपी आदले मुख्यमंत्री प्रतापसिंह राणे आयज खोशी आसतले. तांचीं सून, पुता वांगडा आसाच, त्याभायर नातरांय व्हड जाल्यांत. मोपा विमानतळ जातकच गोंयचो विकास कसो जावचो हें तांणी थारायल्लें आनी तेच वाटेन मुख्यमंत्री डाॅ. प्रमोद सावंत वचपाचो विचार करता आसूंक जाय. गोंयचे सांगें, केपें, सत्तरी, काणकोण, धारबांदोडें हे तालुके गोंयच्या फुडाराची दिका थारायतले अशें तेन्ना श्री. राणे आनी तांचें उपरांत चड तेंप राज्याचो कारभार सांबाळपी आदले मुखेलमंत्री मनोहर पर्रीकर हाणी चिंतिल्लें. गोंयच्या उद्येगपतींचे भेटेक ते मुजरत वताले. उद्येगपतींनीय सरकाराक सदांच सांगात केल्लो. अदानी, अंबानी देस महासत्ते कडेन व्हरपाक आदार दितात जाल्यार गोंयच्या उद्येगपतींची फुडली पिळगी आपले परीन मोपाचे मजतीक धांवन येवचीना अशें न्हय. तांचे कडेन भासाभास करपाची संद मुख्यमंत्री, उद्येगमंत्र्यांनी घेवची.
उद्येगमंत्र्यांनी स्वतःच्या उद्येगांत आनी पंचायतींनी घुस्पून रावपा बदला सरकारांतले वरिष्ठ मंत्री ह्या नात्यान वावर करपाक जाय. तांच्या माथ्याववयले वीजच न्हय हेर घोटाळ्यांचे वजें सोंपेपणान देंवचे ना हें मतींत घेतल्यार मुख्यमंत्र्यांनी तांच्या उद्येग खात्यार नदर दवरचीच पडटली. तेय एका तेंपार येणावळ (महसूल) मंत्री आशिल्ले हें विसरूंक येवचें ना, ते मंत्रीपदार आशिल्ले तेन्ना बार्देस, पेडणेच न्हय जाल्यार दिवचल वाठारांत भूंय विकपाचे गैरवेव्हार जाल्ले, अशे आरोप जाताले ताचें कितें? तोरचे दाळीच्या घोटाळ्यांत जशे आनीक सात- आठ अधिकारी आसात अशें मुख्यमंत्र्यांनी उसरां सांगलां तशेच भूंयखंड घुस्पागोंदळांत आनीक अधिकारी नासतले अशें म्हणूंक येतलें व्हय? मामलेदार एकाच तालुक्यांत स- स वर्सां कामार आसात तांचेर तरसाद आसत व्हय?
सरकारान वेवस्थीतपणान अधिकाऱ्यांक विश्वासांत घेतल्यार, तांच्यो बदल्यो करतना तांचे कडेन भासाभास केल्यार विकासकामांचेर परिणाम जावचो ना. सरकारान भ्रष्टाचारा आड झुजतना एक- दोन मंत्र्यांक कुशीक केल्यार समेस्तांक अजाप जावचें ना. आदीं फकत सत्तरीच्या खाश्यांच्या भाटांच्यो काणयो सांगपी आतां दिवचल, दाबोळे, कुठ्ठाळेच न्हय जाल्यार शिरोडें, मडकयच्या भाटकारांच्या दानतीची काणी आयकतना पयसो खंयच्यान येता, पयसो खंयच्यान वता तातूंत सरकारांतच आपालिपा चल्ला, त्योय काणयो सांगत?? जोड सचिवांच्यो बदल्यो वर्सांची वर्सां कित्याक जावंक नात? सरकारांत सेवा दिवपी नव्या कर्मचाऱ्यांची भरती जावप शक्य आसा, काय केंद्रीय पावंड्यार चल्ल्या तशेंच कर्मचारी खात्यांत भरल्यात? तशें जालां आसत जाल्यार उंचेल्या न्यायालयान एका आदेसा वरवीं एकाच वेळार हजारांनी कर्मचाऱ्यांक घरा धाडल्यार कशें जातलें? पयलींच्या सरकाराच्या तेंपा वेल्या पूर्व रोजगार येवजणे वरवी सेवेंत आशिल्ल्याचें कितें जाला? ते येवजणेचे रुपांतर रोजगारपूर्व प्रशिक्षणांत जालां आसत जाल्यार ताका कायद्याचे घट चवकटीचें बळ मेळचें.
मोपा विमानतळाचे बांदावळींत सरकारांतल्यान भायर सरिल्ले कंत्राटी कामगार आसतलेच तशेंच पाच- सात वर्सां साबार कंत्राटाचेर, कृषीमित्र म्हणून वावुरतकीच वाजेवन खात्यांतलीं कामां सोडून वचपीय आसुये.
सरकारी अधिकारी एका तेंपार आपलीं भुरगीं सरकाराचे सेवेंत उरचीं हे खातीर फाटल्या दारान तजवीज करताले, तें हाचेफुडें बंद जावपाक जाय. सरकाराची मान्यताय घेनासतना म्हामंडळांचे सेवेत आशिल्ल्यांची सरकारान चवकशी केल्यार कर्मचारी भरतेंतले व्हड घोटाळे उक्ते जातले. कर्मचारी भरती आयोग, लोकसेवा आयोग, लोकायुक्त कार्यालयांनी दिसपट्टे यो- वच करता ताची म्हायती आतां सरकाराक सोंपेपणान मेळप शक्य आसा. सरकाराची सीसीटीव्ही यंत्रणा व्हड जासूसी करता, पूण त्या वावरांतच न्हय जाल्यार रोबोटिक्स, कोडिंग कामकाजांत आशिल्ले अधिकृत सरकारी अधिकारी आसात? तांचें शिक्षण कितलें जाला? फकत प्रशिक्षण दिल्ल्यांक मोपा विमानतळार सुरवेक सेवेंत घेतिल्ल्यांक विमानतळाच्या कामकाजा संबंदी शिक्षणाची सक्ती कंपनीन केल्या, अशें कळटा. विमानतळ सेवे संबंदी शिक्षण दिवपाक कुशळटाय केंद्र सुरु करतनासुद्धा सरकारान पात्रताय तपासूनच शिक्षक भरती करची. कुशळटायेंत सुद्धां उंचेल्या तांकीची कुशळटाय म्हत्त्वाची. गोंयची आयआयटी तशें मनीसबळ तयार करीत व्हय? गोंयचे आयआयटींत थळावें मनीसबळ आसपाक जायच आनी तें पुराय वेळ शिकोवपी, 65 वर्सां परस उणे पिरायेचें आसचें, हाची जतनाय सरकारान घेवपाक जाय.
तशें पळेल्यार आयआयटी परस आयटीआय – कुशळटाय शिक्षणाक म्हत्त्व येता, आयटीआय कुशळटायेचें शिक्षण दिता आनी तातूंतल्यान 35 ते 40 हजार रुपया म्हयन्याक जोडप शक्य आसा. कुशळटायेंतल्यान उद्येग उबारपाचे आनी दक्षीण गोंयांतय विमानतळ सेवा, वेव्हारा विशीं शिक्षण दिवपी आयटीआय केंद्रां उबारून, कुशळटाय शिक्षणाचें विद्यापीठ गोंयांत हाडपाचे येत्न सरकारान करपाक जाय.
कुशळटाय हीच नवे शिक्षण नितीची चावी आसा, ती भ्रश्टाचार पयस करतलीच, नवे दिकेन गोंयकारांक व्हरतलीच आनी तशें करतना देसांतल्या लोकांक गोंय म्हळ्ळ्यार कुशळटायेची भूंय हो मंत्र दितली, अशी आस्त बाळगूया.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
