भांगरभूंय | प्रतिनिधी
आयोगाक चार म्हयन्यांत सादर करचो पडटलो अहवाल
भांगरभूंय । प्रतिनिधी
पणजी: जमीन बळकावप प्रकरणांत निवृत्त न्यायाधीश व्हीके जाधव हांच्या फुडारपणा खाला चवकशी आयोगाची स्थापणूक केल्या. बनावट कागदपत्रां वरवीं जमनी हडप केल्ल्या प्रकरणांची चवकशी करून जबाबदारी निश्चीत करप तशेंच ह्या संदर्भांतले कायदे बदला खातीर सरकाराक सल्ले दिवपाचें काम आयोग करतलो. गृह खात्यान हे विशींची काल (शुक्रारा) अधिसुचोवणी जारी केली.
बनावट कागदपत्रांच्या आधारान सरकारी तशेंच खाजगी जमीन लाटपी तशेंच तांची विक्री करप्यां आड सरकारान कांय म्हयन्यां पयलीं आयपीएस अधिकारी निधीन वाल्सन हांच्या फुडारपणा खाला विशेश तपास पंगडाची (एसआयटी) स्थापणूक केल्या. एसआयटीन ह्या प्रकरणांत खूबशा जाणांक अटक करपाची मोहीम सुरू केले उपरांत अशा प्रकरणांचे चवकशे खातीर निवृत्त न्यायाधिशांच्या फुडारपणा खाला चवकशी आयोग स्थापन करतले अशें मुख्यमंत्री डॉ. प्रमोद सावंत हांणी कांय दिसां आदीं प्रुडंट खबरां चॅनला कडेन उलयतना सांगिल्लें. ते प्रमाण शुक्रारा आयोगा सयत आयोगाचे नेमूय अधिसुचीत केले.
मजगतीं, जमीन हडप प्रकरणांतल्या दोशींक न्यायालया मेरेन पावोवपाचें काम एसआयटी करतली. जाल्यार अशा प्रकरणांतल्या जमनी विशीं कायदेशीर निर्णय घेवपाचें काम चवकशी आयोग करतलो. जमीन हडप केल्ल्याचीं प्रकरणां आयले उपरांत फुडल्या चार म्हयन्यांत आयोग तांची चवकशी करून अशीं प्रकरणां निकालांत काडटले.
आयोगाचें काम कितें?
सरकारी तशेंच खाजगी जमीन हडप प्रकरणांची चवकशी करून जबाबदारी निश्चीत करप.
अशा प्रकरणांत सरकारी अधिकारी, कर्मचाऱ्यांच्या सहभागाची चवकशी करप.
प्रशासकी प्रणालीतली पळवाट सोदून जमीन हडप प्रकरणां कायद्याचे फास्केंत हाडप.
ठोस उपाय येवजण्यां खातीर प्रशासकी वेवस्थेंत बदल सुचोवप.
फुडारांत जमीन हडप प्रकरणां आडावपा खातीर सरकाराक कायदे बदलांचो सल्लो दिवप.
चार म्हयन्यांत चवकशी अहवाल सरकाराक सादर करप.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
