भांगरभूंय | प्रतिनिधी
गोंयकार तरणाट्यांक चडांत चड संद मेळपा खातीर निर्णय
भांगरभूंय । प्रतिनिधी
पणजी: काजू प्रक्रिया उद्देगांनी चडांत चड गोंयकार कामगारांक संद दिवची, हे खातीर उद्देग खात्यान काजू प्रक्रिया उद्देगां खातीर रोजगार अनुदान येवजण अधिसुचीत केल्या. येवजणेंतल्यो अटी पुराय करपी उद्देगांक सरकारा कडल्यान वर्सुकी 10 लाखां मेरेनच्या अनुदानाचो लाव मेळटलो.
उद्देग खात्याची ही अनुदान येवजण फुडलीं पांच वर्सा कायम उरतली. सूक्ष्म, लघू आनी मध्यम काजू प्रक्रिया उद्देगांक हे येवजणेचो लाव मेळटलो. येवजणेंतल्यो अटी पुराय करपी उद्देगांक कार्यरत गोंयकार कामगारांचो उण्यांत उणो पगार वा वट्ट खर्चाचे 50 टक्के इतलें अनुदान सरकारा कडल्यान मेळटलें अशें अधिसुचोवणेंत म्हणलां.
येवजणे खातीर अर्ज करपी उद्देगांच्या पडटाळणे खातीर उद्देग खात्या कडल्यान कृती दळाची स्थापणून करतले. उद्देग संचालनालय अशा उद्देगांची प्रत्यक्ष पळोवणी करून ते विशींचो अहवाल कृतीदळा कडेन धाडून दितलें. उपरांत कृतीदळ तांच्या अर्जाचेर निर्णय घेतलें अशेंय उद्देग खात्यान जारी केल्ले अधिसुचोवणेंत म्हणलां.
मजगतीं, स्वयंपूर्ण गोंयचें सपन साकार करतनाच गांवगिऱ्या वाठारांतल्या लोकांक अर्थीक नदरेन स्वावलंबी करपाचेर सरकारान भर दिला. ते खातीरूच उद्देगांक सबसिडी दिवन चडांत चड गोंयकारांक रोजगार मेळोवन दिवपाचो निर्णय सरकारान घेतला.
येवजणेच्या लावा खातीर काजू प्रक्रिया उद्देगाची उद्यम नोंदणी गरजेची.
धा वर्सांचो राबितो दाखलो गरजेचो.
उद्देगांत कायमस्वरुपी 60 टक्के गोंयकार कामगार जाय
कामगार खात्यान निश्चीत केल्लो उण्यांत उणो पगार तांकां मेळप गरजेचो.
कामगारांक बोनस, प्रवास खर्च मेळप गरजेचो.
वर्सुकी धा लाखा मेरेनूच सबसिडी मेळोवं येतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
