भांगरभूंय | प्रतिनिधी
न्यायालयाच्या निवाड्या उपरांत आलेमांवाचो राजिनामो
भांगरभूंय । प्रतिनिधी
पणजी: आदले आमदार चर्चील आलेमांव हांणी पिरायेची सत्तरी हुंपिल्ल्यान राष्ट्रीय खळां संहिते प्रमाण ते गोवा फुटबॉल असोसिएशनाच्या (जीएफए) अध्यक्षपदार रावंक शकनात अशें निरिक्षण नोंद करून उच्च न्यायालयान तांकां अपात्र थारायला. न्यायालयाच्या ह्या निर्णयाचो आदर राखून चर्चील आलेमांव हांणी रोखडोच जीएफए अध्यक्षपदाचो राजिनामो दिला.
चर्चील हांच्या अध्यक्षपदाक साश्टी फुटबॉल क्लबान उच्च न्यायालयांत आव्हान दिल्लें. ह्या आव्हान याचिकेचेर निवाडो दितना न्यायालयान चर्चील आलेमांव हांचे अध्यक्षताये खाला वेवस्थापकी समितीन राष्ट्रीय खेळां संहितेंतल्या 70 वर्सांची उण्यांत उणी पिराय मर्यादा काडून उडोवपा विशीं केल्ली दुरुस्ती रद्दबातल केल्या. तशेंच अध्यक्षपदाच्या कार्यकाळांत चर्चील हांणी घेतिल्ल्या निर्णयांचेर कसलेच प्रस्न उपस्थीत करचे न्हय, अशें न्यायालयान स्पश्ट केलां.
मजगतीं, उच्च न्यायालयाच्या निवाड्याक स सप्तकांची स्थगिती मेळची अशी विनंती चर्चील हांचे वकील धवल झवेरी हांणी केल्ली. पूण न्यायालयान ही विनंती भायरावन चर्चील हांणी पिरायेचीं 70 वर्सां पुराय केल्ल्यान ते अध्यक्षपदार रावंकूच शकनात अशेंय न्यायालयान नमूद केलां.
उच्च न्यायालयाचो आदेश स्विकारून जीएफएन रोखड्योच वेंचणुको घेवच्यो आनी संघटणेचेर बऱ्या मनशांच्यो नेमणुको करून गोंयच्या फुटबॉल खेळाचो दर्जो चडांत चड वाडोवचो अशें आवाहन खेळां मंत्री गोविंद गावडे हांणी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
