अपघातांनी एकाच दिसा पांच जाणांक मरण

भांगरभूंय | प्रतिनिधी

काणकोणां तिगांक जाल्यार केपें आनी कुट्टी – फोंड्यां दरेकी एकल्याक मरण

भांगरभूंय I प्रतिनिधी
काणकोणः राज्यांत बुधवारा एकाच दिसा रस्तो अपघातांनी पांच जाणांक मरण येवपाची दुर्दैवी घडणूक घडल्या. मडगांवच्यान कारवारा वचपी आनी कारवारच्यान मडगांवां येवपी दोन मोटारी मदीं काणकोण राजबाग म्हामार्गाचेर अपघात जावन तिगांक मरण येवपाची घडणूक घडल्या. मरण आयिल्ल्यां मदीं एके बायलेचो आस्पाव आसा. जाल्यार जखमी जाल्ल्यां मदीं 2 भुरगीं आनी हेर तिगांचो आस्पाव आसा. तशेंच कुट्टी -फोंड्यां आनी पाळी-कोठंबी जाल्ल्या अपघातांत दरेकी एकल्याक मरण आयलें.

हो अपघातं राजबाग काणकोणां मनोहर पर्रीकार बायपासच्या आंबेनास देवस्थाना लागसार काल सांजे 6.30 वराच्या सुमाराक जालो. मेळिल्ले म्हायती प्रमाण, कारवारच्यान मडगांवा येवपी मोटारींत हरीष उल्हास नागेकार (35), उल्हास राम नागेकार (64), विणा उल्हास नागेकार (60) हांकां मरण आयलें. जाल्यार सायवी हरीष नागेकार (2), हर्षिता हरीश नागेकार (26), समिक्षा नागेकार (40), सुक्षता काणकोणकार (31), साई नागेकार (13) हे उपासनगर वास्को हांगाचे नागरीक जखमी जाल्यात. ही मोटार आंबेनास देवस्थाना लागसार पावले उपरांत मडगांवच्यान कारवारचे दिशेन वचपी मोटारीन विरूद्ध दिशेन आसपी दुभाजकाक नेटाचो धपको दिल्ल्यान मोटार कारवारच्यान येवपी मोटारीचेर वचून नेटान आदळ्ळी. हे मोटारींत​ आशिल्ले निखील नागवेंकार, प्रशांत तळेकार (दोगूय किन्नर- कारवार) हे जखमी जाल्यात, अशी म्हायती काणकोण पुलिसांनी दिली.
ह्या विचित्र अपघातांत दोनूय मोटारींचे एरबेग फुटले तशेंच दोनूय मोटारींचे व्हड लुकसाण जालां. तशेंच ह्या अपघाता वेळार माशेंतल्यान येवपी दुचाकी चालक झाकारीस हाका ह्या विचित्र अपघांत किरकोळ मार बसला. कारवारच्यान मडगांवचे दिशेन येवपी मोटारींतलो एक दादलो आनी एके बायलेक जाग्यारूच मरण आयलें. जाल्यार मडगांवचे कारवारचे दिशेन वचपी दुसरे मोटारींतल्या एकल्याक उपचारा मजगतीं मरण आयलें, अशें काणकोणचे पुलीस निरिक्षक चंद्रकांत गांवस हांणी सांगलें.
मडगांवच्यान कारवारा वचपी मोटारींत पांच ते स व्यक्ती आशिल्ले, ते गंभीर जखमी जाल्ल्यान तांकां 108 अॅम्बुलन्सींतल्यान काणकोणच्या समाजीक हॉस्पिटलांत उपचारा खातीर दाखल केल्यात.
जाल्यार कारवारच्यान मडगांवां येवपी मोटारींत अाशिल्लीं चली गंभीर जखमी जाल्ल्याचे अपघात मजतकार्य करपी थळाव्यांनी सांगलें.
अपघाताची म्हायती कळ्ळे उपरांत पुलीस, उजो पालोवपी दळाचे जवानांनी घडणूक सुवातेर धांव घेवन मजतकार्य केले.
पुलीस निरिक्षक चंद्रकांत गांवस हांणी अपघाताचो पंचमानो केलो. तशेंच मरण आयिल्ल्या व्यक्तींच्यो कुडी फुडले तपासणे खातीर मडगांवां सरकारी हॉस्पिटलांत धाडल्यात.
अपघाताची म्हायती मेळ्ळे उपरांत काणकोणचे आमदार तशेंच सभापती रमेश तवडकार, नगराध्यक्ष रमाकांत नायक गांवकार, नगरसेवक सायमन रिबेलो आनी हेरांनी घडणूक सुवातेक भेट दिवन पळोवणी केली.
मजगतीं, आतां मेरेन ह्या बायपास म्हामार्गाचेर आठ परस चड अपघात घडल्यात. काल जाल्ल्या अपघातांत चड जिवितहानी जाल्या. आयच्या जाल्ल्या विचित्र अपघाता उपरांत ह्या मार्गाचेर रम्बलर्स घालपाची मागणी थळाव्यांनी केल्या.

केपें अपघातांत तरणाट्याक मरण

केपें: कोठंबी केप्यां 7 सप्टेंबराक सकाळीं स्कूल बस आनी दुचाकी मदीं जाल्ल्या अपघातांत दुचाकी चालक जेसवर्ड मार्टिन्स (18) हाका मरण आयलें.
बुधवारा सकाळीं अवडेंचे एके शाळेची बस विद्यार्थ्यांक हाडचे खातीर वताली. कोठंबी वचपी रस्तो आनी असोळणें वचपी रस्तो आशिल्ल्या वल्ताचेर मुखा वयल्यान येवपी दुचाकी चालकाचो ताबो सुटिल्ल्यान स्कूल बशीचेर धपको मारलो. ह्या अपघातांत दुचाकी चालक जेसर्वड मार्टिन्स हाका मरण आयलें.

कुट्टी फोंड्यां दोन ट्रकां मदीं चिड्डून क्लिनराक मरण

फोंडें: दीपनगर कुर्टी वाठारांत मंगळारा सकाळीं 6 वरांच्या सुमाराक म्हाल व्हरपी ट्रकाचो हँडब्रेक निकामी जाल्ल्यान ट्रक फुडें गेलो आनी अलॉयसीस थॉमस (21, केरळ) ह्या क्लिनराक दोन ट्रकां मदीं चिड्डून मरण आयलें. ह्या अपघात प्रकरणांत फोंडें पुलिसांनी ट्रक ड्रायव्हर नियाज व्ही. हाका अटक केल्या.
पुलिसांनी दिल्ले म्हायती प्रमाण केएल 13 के 7356 नंबराचो मालवाहू ट्रक मंगळारा सकाळीं दीपनगर पावलो. ह्या वेळार ट्रक ड्रायव्हरान मुखार पार्क केल्ल्या आनीक एका ट्रका मुखार आपलो ट्रक दवरलो. हँडब्रेक ओडून ड्रायव्हर आनी क्लिनर दोगूय सकयल देंविल्ले. ह्या वेळार क्लिनर ट्रकाच्या फुडले वटेन गेलो तेन्ना ट्रकाचो हँडब्रेक निकामी जालो आनी ट्रक सरळ फुडें गेलो. ह्या वेळार दोन ट्रकाच्या मदीं क्लिनर आडकलो. गंभीर अवस्थेंत ताका 108 एम्ब्युलन्सींतल्यान उपजिल्हो हॉस्पिटलांत दाखल केलो. पूण थंय दोतोरांनी ताका आदींच मरण आयिल्ल्याचें घोशीत केलें.